മാരിമെഡ്, കഞ്ചാവിന്റെ ഉത്പാദനവുമായി ബന്ധപ്പെട്ട് പ്രവർത്തിക്കുന്ന കമ്പനിയാണ്. ഇവർ നിർമ്മിച്ച ‘കഞ്ചാവ് കേക്കിന്’ മൂന്നടി നീളവും മൂന്നടി വീതിയുള്ള കേക്കിൽ കഞ്ചാവിലെ പ്രധാന സൈക്കോ ആക്റ്റീവ് മൂലകമായ 20,000 mg THC (ടെട്രാഹൈഡ്രോകണ്ണാബിനോൾ) കലർത്തിയിട്ടുണ്ട്. കഞ്ചാവ് കലർന്ന ഭക്ഷണശാലകളുടെ ഫ്രാഞ്ചൈസിയായ ബബ്ബീസ് ബേക്ക്ഡിൻ്റെ ഉൽഘാടനവുമായി ബന്ധപ്പെട്ടാണ് കഞ്ചാവിന്റെ കേക്ക് മാരിമെഡ് തയ്യാറാക്കിയത്. കഴിക്കുന്നവർക്ക് ‘വെറുതെ ഇരിക്കുന്ന സമയങ്ങളെ ഓർമ്മിപ്പിക്കാനും ഗൃഹാതുരത്വം നൽകാനുമാണ്’ കേക്ക് തയ്യാറാക്കിയത് എന്നാണ് കമ്പനിയുടെ വിശദീകരണം. ഇത് കൂടാതെ ഡിസംബർ 8ന് അമേരിക്കയിൽ ആഘോഷിക്കുന്ന ദേശീയ ബ്രൗണി ദിനവും കഞ്ചാവ് കേക്ക് നിർമ്മിക്കുന്നതിന് കമ്പനിക്ക് പ്രേരണ നൽകി.
ഉയർന്ന അളവിലുള്ള കഞ്ചാവിന് പുറമേ, ബ്രൗണിയുടെ പാചകക്കുറിപ്പിൽ 1300-ലധികം മുട്ടകളും ഏകദേശം 30 കിലോഗ്രാം മാവും ഉൾപ്പെടുന്നു. മുഴുവൻ ബ്രൗണിയും അഞ്ച് പേരടങ്ങുന്ന ഒരു സംഘം 24 മണിക്കൂറിലാണ് നിർമിച്ചത്.
മെഡിക്കൽ ആവശ്യങ്ങൾക്കാണെങ്കിലും ഈ ബ്രൗണി ഒരു വ്യക്തിക്ക് കഴിക്കാവുന്നതിനേക്കാൾ വളരെയധികമുണ്ട്. അതിനാൽ കഷണങ്ങളായി വിൽക്കുകയും മസാച്യുസെറ്റ്സിലെ മെഡിക്കൽ രോഗികൾക്ക് നൽകുകയും ചെയ്യും എന്ന് മാരിമെഡ്. ബ്രൗണിക്ക് പുറമെ ചോക്ലേറ്റ് ചിപ്സ്, സ്നിക്കർഡൂഡിൽ എന്നിവയും കമ്പനി വാഗ്ദാനം ചെയ്യുന്നുണ്ട്. കഞ്ചാവ് ബ്രൗണിയുടെ വില ഇതുവരെ കമ്പനി ഔദ്യോഗികമായി പ്രഖ്യാപിച്ചിട്ടില്ല.
മാരിമെഡ് നിർമ്മിച്ച ബ്രൗണി ഇതുവരെ ലോകം കണ്ടിട്ടുള്ളതിൽ വച്ച് ഏറ്റവും വലിയ ബ്രൗണി ആണെങ്കിലും, ഗിന്നസ് വേൾഡ് റെക്കോർഡിൽ രജിസ്റ്റർ ചെയ്യാൻ സാധിച്ചിട്ടില്ല. ഗിന്നസ് വേൾഡ് റെക്കോർഡ് കഞ്ചാവുമായി ബന്ധപ്പെട്ട റെക്കോർഡുകൾ സ്വീകരിക്കുന്നില്ലെന്നും അതിനാൽ മാരിമെഡിന്റെ കഞ്ചാവ് കെയ്ക്കിന് റെക്കോർഡ് നേടാനായില്ല എന്നും മിയാമി ഹെറാൾഡ് റിപ്പോർട്ട് ചെയ്തു.
