വിവാഹ വാഗ്ദാനം നൽകി പീഡിപ്പിച്ചെന്ന പട്ടികജാതിക്കാരിയായ യുവതിയുടെ പരാതിയിൽ ചേർത്തല പാണാവള്ളി സ്വദേശി വൈശാഖ് വിജയകുമാർ (24) സമർപ്പിച്ച മുൻകൂർ ജാമ്യാപേക്ഷയിലാണ് കോടതി നിലപാട് വ്യക്തമാക്കിയത്. സെഷൻസ് കോടതി ജഡ്ജി ജി ഗിരീഷിനു മുമ്പാകെയാണ് മുൻകൂർ ജാമ്യാപേക്ഷ സമർപ്പിച്ചത്.
യുവതിയുടെ പരാതിയിൽ എറണാകുളം ഉദയംപേരൂർ പോലീസാണ് കേസ് രജിസ്റ്റർ ചെയ്തത്. കഴിഞ്ഞ വർഷം നവംബർ, ഡിസംബർ മാസങ്ങളിലാണ് കേസിനാസ്പദമായ സംഭവം നടന്നത്. നവംബർ 27 ന് ലോഡ്ജിൽ എത്തിച്ച് യുവതിയെ നിർബന്ധിത പീഡനത്തിന് ഇരയാക്കിയെന്നാണ് പരാതി. തന്റെ എതിർപ്പ് വകവെയ്ക്കാതെ യുവാവ് പീഡിപ്പിച്ചെന്നാണ് യുവതിയുടെ മൊഴി. ഡിസംബർ 24 ന് ലോഡ്ജിൽ എത്തിച്ചപ്പോൾ വീണ്ടും എതിർപ്പ് രേഖപ്പെടുത്തി.
എതിർപ്പ് പ്രകടിപ്പിച്ചപ്പോൾ പ്രതി ഒരു ചരട് യുവതിയുടെ കഴുത്തിൽ ചാർത്തിയ ശേഷം വിവാഹം കഴിച്ചതായി പ്രഖ്യാപിച്ചു. ഭാവിയിൽ വിവാഹം കഴിച്ച് ഒന്നിച്ചു ജീവിക്കാമെന്നായിരുന്നു ഉറപ്പ്. തുടർന്ന് ലൈംഗിക ബന്ധത്തിൽ ഏർപ്പെടുകയും ചെയ്തു. എന്നാൽ പിന്നീട് വിവാഹത്തിന് താൽപര്യമില്ലെന്ന് അറിയിച്ച് യുവാവ് പിൻവാങ്ങി. ഇതേത്തുടർന്നാണ് യുവതി പരാതിയുമായി പോലീസിനെ സമീപിച്ചത്. പോലീസ് അറസ്റ്റ് ചെയ്യുന്നത് ഒഴിവാക്കണമെന്ന് ആവശ്യപ്പെട്ടാണ് യുവാവ് കോടതിയെ സമീപിച്ചത്.
ചില സാമ്പത്തിക കാരണങ്ങളെത്തുടർന്ന് പിൻവാങ്ങുന്നുവെന്നാണ് യുവാവ് കോടതിയെ അറിയിച്ചത്. താൻ താലി ചാർത്തിയതിനാൽ കേസ് പീഡന പരിധിയിൽ വരില്ലെന്നായിരുന്നു വാദം. സാങ്കൽപികമായി വിവാഹം കഴിച്ചെന്ന വാദം അംഗീകരിക്കാൻ സാധിക്കില്ലെന്ന് കോടതി വ്യക്തമാക്കി. സംഭവത്തെ ലൈംഗിക പീഡനമായി മാത്രമേ കാണാൻ കഴിയൂ എന്നും ഐപിസി 375 പ്രകാരം ഇത് കുറ്റകരമാണെന്നും കോടതി വ്യക്തമാക്കി- മനോരമ ഓൺലൈൻ റിപ്പോർട്ട് ചെയ്തു.
