Also Read :
ഒരു സംസ്ഥാനം ജനങ്ങളോട് കാണിക്കേണ്ട സാമാന്യ മര്യാദ തമിഴ്നാട് കാണിക്കുമെന്ന് കരുതി. അതുണ്ടായില്ല. പല തവണ ജനങ്ങളുടെ ബുദ്ധിമുട്ടുകള്‍ അടക്കം അറിയിച്ച് കേരളം തമിഴ്നാട് സര്‍ക്കാരിനെ ബന്ധപ്പെട്ടിരുന്നെങ്കിലും തമിഴ്നാട് തൽസ്ഥിതി ആവര്‍ത്തിക്കുകയാണെന്ന് മന്ത്രി മാധ്യമത്തോട് പറഞ്ഞു. ഇനി ശക്തമായ നടപടിയുമായി മുന്നോട്ട് പോകാനാണ് സംസ്ഥാന സര്‍ക്കാരിന്റെ തീരുമാനം. ഇതിന്റെ ഭാഗമായി വിഷയം സുപ്രീം കോടതിയിൽ ഗൗരവമായി ഉന്നയിക്കുമെന്നും മന്ത്രി വ്യക്തമാക്കി.
തമിഴ്നാട് തോന്നുംപടി ഷട്ടറുകള്‍ ഉയര്‍ത്തുകയും താഴ്ത്തുകയും ചെയ്യുന്നത് പെരിയാറിന് തീരത്ത് താമസിക്കുന്ന ജനങ്ങള്‍ക്ക് ബുദ്ധിമുട്ടുണ്ടാക്കുന്നുവെന്നത് യാഥാര്‍ത്ഥ്യമാണന്നും മന്ത്രി പറഞ്ഞു. ജനങ്ങളുടെ സുരക്ഷയാണ് സംസ്ഥാന സര്‍ക്കാരിന് പ്രധാനം. തമിഴ്നാടിന്റെ നടപടിയിൽ ബുദ്ധിമുട്ടിലായ പെരിയാര്‍ തീരത്തെ ജനങ്ങള്‍ക്ക് എല്ലാ സഹായവും നൽകുമെന്നും ഉറപ്പുവരുത്തും.
Also Read :
ഇവര്‍ക്ക് മാറുന്നതിനുള്ള ദുരിതാശ്വാസ ക്യാമ്പുകള്‍ തയ്യാറാണെന്നും അറിയിച്ചിട്ടുണ്ട്. റവന്യൂ വകുപ്പിന്റെ ഉദ്യോഗസ്ഥർ പ്രദേശത്ത് ക്യാമ്പ് ചെയ്താണ് പ്രവർത്തനങ്ങൾ നടത്തുന്നതെന്നും മന്ത്രി വ്യക്തമാക്കി.
അതിനിടെ ഇന്ന് വീണ്ടും മുന്നറിയിപ്പ് ഒന്നുമില്ലാതെ മുല്ലപ്പെരിയാർ അണക്കെട്ടിൻ്റെ 9 ഷട്ടറുകൾ കൂടി തുറന്നു. ബുധനാഴ്ച രാവിലെ പുറത്തുവന്ന റിപ്പോർട്ട് പ്രകാരം ജലനിരപ്പ് 141.90 ആയതോടെയാണ് തമിഴ്നാട് കൂടുതൽ ഷട്ടറുകൾ തുറന്നത്. 60 സെൻ്റിമീറ്റർ വീതമാണ് ഷട്ടറുകൾ തുറന്നത്. സെക്കൻഡിൽ 7140 ഘടനയടി വെള്ളമാണ് പുറത്തേക്ക് ഒഴുകുന്നത്.
Also Read :
ചൊവ്വാഴ്ച രാവിലെയും ഇന്ന് പുലർച്ചെയുമായിട്ടാണ് മുല്ലപ്പെരിയാർ അണക്കെട്ടിലെ കൂടുതൽ ഷട്ടറുകൾ തുറന്നത്. മുന്നറിയിപ്പില്ലാതെ അർധരാത്രിയിൽ വെള്ളം തുറന്ന് വിടുന്ന തമിഴ്നാടിൻ്റെ നടപടിക്കെതിരെ കേരളം ഇന്ന് സുപ്രീം കോടതിയെ സമീപിക്കും. വിഷയത്തിൽ സുപ്രീം കോടതിയിൽ ബുധനാഴ്ച ഇടക്കാല ഹർജി നൽകുമെന്ന് മന്ത്രി റോഷി അഗസ്റ്റിൻ ഇന്നലെ വ്യക്തമാക്കിയിരുന്നു.
