കോഴിക്കോട്: വഖഫ് നിയമന വിവാദത്തിൽ പ്രതിഷേധവുമായി മുന്നോട്ട് പോകുമെന്ന് മുസ്ലീം ലീഗ്. പ്രതിഷേധ പരിപാടികളുടെ ആദ്യ ഘട്ടം ഈ മാസം ഒമ്പതാം തീയതി കോഴിക്കോട്കടപ്പുറത്ത് മഹാറാലിയോടുകൂടി ആരംഭിക്കുമെന്ന് പി.എം.എ.സലാം മാധ്യമങ്ങളോട് പറഞ്ഞു. നേരത്തെ നൽകിയ ഉറപ്പ് മുഖ്യമന്ത്രി പാലിച്ചില്ലെന്നും ലീഗ് ആരോപിച്ചു. നിയമസഭയിൽ പാസാക്കിയ നിയമം നിയമസഭയിൽ തന്നെ റദ്ദാക്കണമെന്ന് പി.എം.എ.സലാം ആവശ്യപ്പെട്ടു. വഖഫിലെ തീരുമാനം സർക്കാരിന്റെ മുസ്ലീം വിരുദ്ധ സമീപനങ്ങളുടെ ഉദാഹരണമാണെന്നും ലീഗ് നേതൃത്വം ആരോപിച്ചു.
ഇന്ന് രാവിലെ സമസ്തയുടെ നേതാക്കൾ മുഖ്യമന്ത്രിയുമായി നടത്തിയ ചർച്ചയിലാണ് വഖഫിലേക്കുള്ള പിഎസ്സി നിയമനം ഉടൻ നടപ്പാക്കില്ലെന്ന് മുഖ്യമന്ത്രി ഉറപ്പ് നൽകിയത്. വിശദമായ ചർച്ച നടത്തുകയും തീരുമാനം ഉണ്ടാകുന്നതുവരെ നിലവിലുള്ള സ്ഥിതി തുടരുകയും ചെയ്യും. പിഎസ്സിക്ക് നിയമനം വിടുന്നതിലൂടെ മുസ്ലിം വിഭാഗത്തിൽ പെടാത്തവർക്കും വഖഫ് ബോർഡിൽ ജോലി കിട്ടും എന്ന പ്രചാരണം വസ്തുതാവിരുദ്ധമാണെന്നും മുഖ്യമന്ത്രി പറഞ്ഞു. അത്തരം ആശങ്കകൾ അടിസ്ഥാനരഹിതമാണ്. ഇക്കാര്യം സമസ്ത നേതൃത്വത്തോട് വിശദീകരിച്ചിട്ടുള്ളതായും മുഖ്യമന്ത്രി അറിയിച്ചു.
സർക്കാർ നിലപാട് മയപ്പെടുത്തിയത് സമസ്തയുടെ വിജയമായി വിലയിരുത്തുമ്പോൾ ലീഗിന് കനത്ത തിരിച്ചടിയാണ്. രാഷ്ട്രീയ വിഷയങ്ങളിലുൾപ്പടെ സമസ്ത ഇ.കെ വിഭാഗം ആശ്രയിച്ചിരുന്നത് മുസ്ലീം ലീഗിനെയും പി.കെ.കുഞ്ഞാലിക്കുട്ടിയെയുമായിരുന്നെങ്കിൽ മുഖ്യമന്ത്രി പിണറായി വിജയൻ സമസ്ത നേതൃത്വത്തെ വിവിധ വിഷയങ്ങളിൽ നേരിട്ട് വിളിച്ച് അഭിപ്രായങ്ങൾ തേടുന്നതും ചർച്ചകൾ നടത്തുന്നതും തുടരുകയാണ്.
Content highlights:muslim league will proceed with the protest against government in waqf controversy
