എൽഡിഎഫ് സർക്കാർ അധികാരത്തിൽ വരാതിരിക്കാൻ വലതുപക്ഷ ശക്തികൾ ഒന്നിച്ചു ശ്രമിച്ചു. കെ റെയിൽ പദ്ധതി തകർക്കാൻ യുഡിഎഫും ബിജെപിയും ശ്രമിക്കുകയാണെന്നും കോടിയേരി ആരോപിച്ചു.
മുസ്ലിം ലീഗിനെ നയിക്കുന്നത് ജമാഅത്തെ ഇസ്ലാമിയുടെ ആശയങ്ങളാണ്. പള്ളികളിൽ പ്രതിഷേധിക്കാൻ ആഹ്വാനം ചെയ്തത് ജമാഅത്തെ ഇസ്ലാമിയുടെ ആശയം പേറുന്നതുകൊണ്ടാണ്. കേരളത്തിൽ മതനിരപേക്ഷതയുടെ അടിത്തറ തകർക്കാനാണ് വലതുപക്ഷ ശക്തികൾ ശ്രമിക്കുന്നത്. വർഗീയ ചേരിതിരിവ് ഉണ്ടാക്കാൻ അനുവദിക്കരുത്. മതന്യൂനപക്ഷങ്ങളെ ആർഎസ്എസ് വെല്ലുവിളിക്കുകയാണ്. ഹലാൽ എന്ന വാക്കിനെ തെറ്റായി ചിത്രീകരിച്ച് മതചിഹ്നം ആക്കാൻ ശ്രമിക്കുകയാണ്. ചില മുസ്ലിം സംഘടനകൾ ഇതിനു ബദലായി പ്രവ‍ര്‍ത്തിക്കുന്നുണ്ടെന്നും കോടിയേരി പറഞ്ഞു.
സന്ദീപ് കുമാറിന്റെ കൊലപാതകം ആസൂത്രിതമാണ്. കൊലക്കു പകരം കൊല സിപിഎം നയമല്ല. കൊലപാതകികളെ സമൂഹത്തിൽ ഒറ്റപ്പെടുത്തണം. ഈ നയമാണ് പാർട്ടിയെ വീണ്ടും അധികാരത്തിൽ എത്തിച്ചതെന്നും കോടിയേരി പറഞ്ഞു.
അതേസമയം ആർഎസ്എസ് അക്രമരാഷ്ട്രീയം ഉപേക്ഷിക്കണമെന്ന് കോടിയേരി ബാലകൃഷ്ണൻ ഞായറാഴ്ച ആവശ്യപ്പെട്ടിരുന്നു. സമാധാനത്തിന്റെ പാതയാണ് സിപിഎം പിന്തുടരുന്നത്. അക്രമികള്‍ക്കെതിരേ ജനങ്ങളെ അണിനിരത്തും. അക്രമികളെ പൊതുജനം ഒറ്റപ്പെടുത്തണം. പ്രവര്‍ത്തകരെ കൊന്നുതള്ളി സിപിഎമ്മിനെ ഇല്ലാതാക്കാമെന്ന് ആര്‍എസ്എസും ബിജെപിയും കരുതേണ്ട. ആക്രമ പാതയില്‍ നിന്ന് ആര്‍എസ്എസ് പിന്തിരിയണം. സമാധാനപാതയിലാണ് സിപിഎം. സമാധാന നിലപാട് ഞങ്ങളുടെ ദൗര്‍ബല്യമായി കാണേണ്ടതില്ലെന്നും തിരുവല്ലയിൽ ബിജെപി പ്രവർത്തകർ കുത്തി കൊലപ്പെടുത്തിയ സന്ദീപ് കുമാറിന്റെ വീട് സന്ദർശിച്ച ശേഷം കോടിയേരി പറഞ്ഞു.
