പത്തനംതിട്ട: സിപി.എം. ലോക്കൽ കമ്മിറ്റി സെക്രട്ടറി പി.ബി. സന്ദീപ് കുമാറിനെ കൊലപ്പെടുത്തിയ കേസിൽ പ്രതിയുടേതെന്ന് കരുതുന്ന ശബ്ദരേഖ പോലീസ് ശാസ്ത്രീയ പരിശോധയ്ക്ക് അയക്കും. കേസിൽ പ്രതികളുടെ കുറ്റസമ്മതം, പങ്കാളിത്തം, ക്രിമിനൽ മാനസികാവസ്ഥ എന്നിവയ്ക്ക് ശബ്ദരേഖ നിർണായക തെളിവായേക്കും.
ശബ്ദത്തിന്റെ ഉടമ അഞ്ചാം പ്രതി വിഷ്ണുവാണെന്ന് പോലീസ് ഉറപ്പിക്കുന്നുണ്ടെങ്കിലും ശാസ്ത്രീയ പരിശോധന ഫലമാണ് ആവശ്യം. ഇതിനായി പ്രചരിച്ച ശബ്ദരേഖയ്ക്കൊപ്പം പ്രതിയുടെ റെക്കോർഡ് ചെയ്ത ശബ്ദവും പരിശോധയ്ക്ക് അയക്കും. ഇതിനായി പോലീസ് തിരുവനന്തപുരം ഫോറൻസിക് സയൻസ് ലാബിനെ വൈകാതെ സമീപിക്കും. കേസിന്റെ രാഷ്ട്രീയ പ്രധാന്യം കണക്കിലെടുക്കുമ്പോൾ ഫലം ലഭ്യമാകാൻ താമസമുണ്ടാകില്ലെന്നാണ് കരുതുന്നത്.
ഫലം അനുകൂലമെങ്കിൽ പരപ്രേരണയില്ലാതെയുള്ള തുറന്നുപറച്ചിലെന്ന തലത്തിൽ കോടതിയിൽ സമർപ്പിക്കാനുള്ള തെളിവായി ഇതുമാറും. സന്ദീപ് കുമാർ കൊല്ലപ്പെട്ടുവെന്ന് ബോധ്യപ്പെട്ടിട്ടും ഭയമോ ആശങ്കയോ ഇല്ലാതെയുള്ള സംസാരം എന്നതുകൊണ്ടുതന്നെ പ്രതിയുടെ ക്രിമിനൽ മാനസികാവസ്ഥ കൂടി ഇതിലൂടെ സ്ഥാപിച്ചെടുക്കാനാകും.
അതേസമയം പ്രതികൾക്ക് ഒളിത്താവളം ഒരുക്കാൻ സഹായിച്ച കരുവാറ്റ സ്വദേശി, പ്രതിയുടെ ശബ്ദരേഖയിൽ പരാമർശിക്കപ്പെടുന്ന മിഥുൻ എന്നിവർ കേസിൽ പ്രതികളാകാൻ സാധ്യതയുണ്ട്. എന്നാൽ അറിഞ്ഞുകൊണ്ട് കൊലപാതകികൾക്ക് അഭയമൊരുക്കിയെന്ന് വന്നാൽ മാത്രമേ കരുവാറ്റ സ്വദേശ പ്രതിപ്പട്ടികയിൽ എത്തു. അഞ്ചാം പ്രതിയുടെ ശബ്ദരേഖയിൽ പറയുന്ന മിഥുൻ ചങ്ങനാശ്ശേരി സ്വദേശിയാണ്. ഇരുവരുടെയും പങ്ക് സംബന്ധിച്ച വിവരങ്ങൾ പ്രതികളെ ചോദ്യംചെയ്യുന്നതിലൂടെ ലഭ്യമാകുമെന്നാണ് പ്രതീക്ഷ.
കൊലപാതകത്തിന് മുമ്പും ശേഷവും പ്രതികളുടെ ഫോണിലേക്ക് വന്നതും പോയതുമായവിളികളുടെ പിന്നാലെയാണ് പോലീസിലെ ഒരുസംഘം. ആറുമാസത്തെ ഫോൺവിളി വിശദാംശങ്ങൾ ശേഖരിക്കാനും ആലോചനയുണ്ട്.
പ്രതികളെ കസ്റ്റഡിയിൽ ആവശ്യപ്പെട്ടുള്ള അപേക്ഷ തിരുവല്ല മജിസ്ട്രേറ്റ് കോടതി തിങ്കളാഴ്ച പരിഗണിക്കും.
സംഭവം സീനായെന്ന് ഫോണിൽ പറഞ്ഞു
സംഭവത്തിനുശേഷം അഞ്ചാംപ്രതി വിഷ്ണു വീട്ടിലെത്തി ഫോണിൽ സുഹൃത്തുമായി നടത്തിയ സംഭാഷണമാണ് കഴിഞ്ഞ ദിവസം പുറത്തുവന്നിരുന്നത്. കൊലപാതകത്തെ സീൻ എന്ന തരത്തിലാണ് ഇതിൽ വിശേഷിപ്പിക്കുന്നത്.
മൻസൂർ ഒഴിച്ചുള്ള പ്രതികളുടെ പേരും സൂചിപ്പിക്കുന്നു. താനാണ് കഴുത്തിന് വെട്ടിയത്. മറ്റാരോടും വിവരം പറയേണ്ട. ഞങ്ങൾക്ക് പകരം മൂന്നുപേരെ ഉൾപ്പെടുത്തിക്കൊടുക്കാമെന്ന് മിഥുൻ ചേട്ടൻ പറഞ്ഞിട്ടുണ്ട്. ഞാനിപ്പോൾ വീട്ടിലുണ്ട്. ഞാനേതായാലും ഉൾപ്പെടില്ല. മറ്റാരോടും പറയരുതെന്നും സംഭാഷണത്തിലുണ്ട്.
കൊലയ്ക്ക് കാരണം ചോദിക്കുമ്പോൾ, അവനോട് നേരത്തേ ഒരുവിഷയം ഉണ്ടായിരുന്നു എന്നാണ് മറുപടി.
content highlights: Sandeep murder case, more likely to be accused
