“ഒരു പുതിയ റോഡ് വരണമെങ്കിൽ ആ റോഡിന് എസ്റ്റിമേറ്റെടുക്കണം, ഭരണാനുമതി വേണം, സാങ്കേതിക അനുമതി വേണം, ടെൻഡർ വിളിക്കണം, ഹാന്റ്ഓവർ ചെയ്യണം ഇതൊക്കെ മഴക്കാലത്ത് ആവാം. ജൂൺ മുതൽ ഒക്ടോബർ വരെയുള്ള മാസങ്ങളിൽ ഇത്തരം പ്രവർത്തനങ്ങൾ നടത്തണം. ബാക്കി മാസങ്ങളിൽ റോഡിന്റെ പ്രവർത്തനങ്ങൾ നടത്തണം. ഇപ്പോൾ റോഡ് നിർമ്മാണത്തിനുള്ള മറ്റ് പ്രവർത്തനങ്ങളൊക്കെ പൂർത്തിയാക്കി വരുമ്പോഴേക്ക് മഴ ആരംഭിക്കുകയാണ്. അതുകൊണ്ട് പൊതുമരാമത്ത് വകുപ്പിന്റെ പ്രവർത്തികൾക്ക് ഒരു വർക്കിങ് കലണ്ടർ ആവശ്യമാണ്. വർക്കിങ് കലണ്ടർ ഉടൻ പുറത്തിറക്കും.” മന്ത്രി പറഞ്ഞു.
മന്ത്രിമുതൽ താഴെത്തട്ടിലുള്ള ഉദ്യോഗസ്ഥർ വരെ റോഡുകളിൽ പോകണം. റോഡുകളുടെ പ്രവർത്തി കാണണം. ഒരു അസിസ്റ്റന്റ് എക്സിക്യൂട്ടീവ് എഞ്ചിനീയറുടെ കീഴിൽ 500 കിലോമീറ്റർ ശരാശരി റോഡുണ്ട്. എല്ലാ മാസവും ആ റോഡുകളിൽ പോയി പരിശോധിക്കുകയും ഫോട്ടോ അടക്കം റിപ്പോർട്ട് നൽകുകയും വേണം- മന്ത്രി പറഞ്ഞു. ട്വന്റിഫോർ ന്യൂസിനോടായിരുന്നു മന്ത്രിയുടെ പ്രതികരണം.
വകുപ്പിൽ വരുത്തിയിരിക്കുന്ന മാറ്റങ്ങൾ ഉടൻ കാണാൻ സാധിക്കില്ലെന്നും ഒന്നോ രണ്ടോ വർഷത്തിനു ശേഷം മാത്രമേ മാറ്റം വ്യക്തമാകൂ എന്നും മന്ത്രി പറഞ്ഞു. ഡിഎൽപി റോഡുകളിൽ കരാറുകാരന്റെയും ഉദ്യോഗസ്ഥരുടേയും വിവരങ്ങൾ പ്രസിദ്ധപ്പെടുത്തുന്നതിന്റെ ഗുണം കാണാൻ പോകുന്നത് ഭാവിയിലാണ്. അതിന്റെ ഗുണം ഭാവിയിൽ ജനങ്ങൾ ചർച്ച ചെയ്യും. റസ്റ്റ് ഹൗസ് നവീകരിച്ചതിലൂടെ 28 ലക്ഷം രൂപയാണ് ഒരു മാസത്തെ ഓൺലൈൻ വഴി ലഭിച്ചത്. ഒരു ക‍ര്‍മ്മവുമായി മുന്നോട്ടു പോകുമ്പോൾ പല പ്രശ്നങ്ങളും വരും അതിന് പ്രാധാന്യം കൊടുക്കേണ്ടതില്ല. വിവാദങ്ങളിലേക്ക് പോകാൻ ഉദ്ദേശിക്കുന്നില്ലെന്നും മന്ത്രി വ്യക്തമാക്കി.
