കണ്ണൂരിൽ ഡസൺ കണക്കിന് കോൺഗ്രസ് പ്രവർത്തകർ കൊല്ലപ്പെട്ടിട്ടുണ്ട്. അവരുടെ കുടുംബത്തെ സംരക്ഷിക്കാനുള്ള ചുമതല കെ സുധാകരനുണ്ട്. എന്നാൽ ഏത് രക്തസാക്ഷി കുടുംബത്തെയാണ് സുധാകരൻ സഹായിച്ചിട്ടുള്ളതെന്ന് ദിവാകരൻ ചോദിച്ചു.
1992ലെ സംഘടനാ തെരഞ്ഞെടുപ്പിൽ എ-ഐ ഗ്രൂപ്പുകളിൽ പെടാതെ ഞങ്ങൾ ഉൾപ്പെട്ട (സുധാകരനും ദിവാകരനും ഉൾപ്പെട്ട) മൂന്നാം ഗ്രൂപ്പ് ഭരണം പിടിച്ചത് തികച്ചും ജനാധിപത്യ വിരുദ്ധമായ മാ‍ര്‍ഗത്തിലൂടെയാണ്. 22 വോട്ട് കെ സുധാകരന് കുറവായിരുന്നു. അന്ന് ജനാധിപത്യ വിരുദ്ധമായ അക്രമ രാഷ്ട്രീയത്തിലൂടെയാണ് കെ സുധാകരൻ കണ്ണൂരിലെ ഡിസിസി പ്രസിഡന്റ് ആകുന്നത്. ഞാൻ സംഘടനാ ചുമതലയുള്ള സെക്രട്ടറി ആയതും. അതിനു ശേഷമാണ് കണ്ണൂരിൽ ക്രൂരമായ അക്രമ രാഷ്ട്രീയം അരങ്ങേറിയത്. ഡസൺ കണക്കിനു പ്രവർത്തകരെ നഷ്ടപ്പെട്ടുവെന്ന് ദിവാകരൻ പറഞ്ഞു. പേരുകൾ എണ്ണി പറഞ്ഞുകൊണ്ടായിരുന്നു ദിവാകരന്റെ പ്രതികരണം. അന്ധമായ കമ്മ്യൂണിസ്റ്റ് വിരോധം വെച്ചുകൊണ്ട് കണ്ണൂരിലെ പ്രവർത്തകരെ ഇനിയും ബലിയാടാക്കരുതെന്ന് ദിവാകരൻ പറഞ്ഞു.
സംഘടനാ തെരഞ്ഞെടുപ്പ് പ്രഖ്യാപിച്ച സാഹചര്യത്തിൽ കെ സുധാകരൻ കെപിസിസിയുടെ പ്രസിഡന്റ് സ്ഥാനത്ത് ഉണ്ടാകാൻ പാടില്ലെന്ന് ദിവാകരൻ പറഞ്ഞു. ജനാധിപത്യപരമായ തെരഞ്ഞെടുപ്പാണ് നടത്തുന്നതെങ്കിൽ ബൂത്ത് തലം മുതൽ എല്ലാ കോൺഗ്രസ് പ്രവ‍ര്‍ത്തകര്‍ക്കും മെമ്പ‍ര്‍ഷിപ്പ് നൽകണം. അതിനു ശേഷമുള്ള തെരഞ്ഞെടുപ്പാണ് വേണ്ടതെന്ന് അദ്ദേഹം വ്യക്തമാക്കി.
ഇന്ത്യൻ നാഷ്ണൽ കോൺഗ്രസിന്റെ ഭരണഘടനയിൽ എവിടെയാണ് കേഡ‍ര്‍ പാര്‍ട്ടി? എവിടെയാണ് സെമി കേഡ‍ര്‍? കോൺഗ്രസിൽ ആളുകൾ വരികയും പോകുകയും ചെയ്യും. വിശാലമായ ജനാധിപത്യ പാര്‍ട്ടിയാണ്- ദിവാകരൻ പറഞ്ഞു.
ഇത് സത്യത്തിനും ധർമ്മത്തിനു വേണ്ടിയുള്ള ഒരു യുദ്ധത്തിന്റെ ആരംഭമാണ്. കെ സുധാകരൻ ഇപ്പോൾ പറഞ്ഞത് പണ്ടും കോൺഗ്രസിൽ ഗ്രൂപ്പ് ഉണ്ടായിരുന്നു എന്നാണ്. അത് സൂചിപ്പിക്കുന്നത് ഇപ്പോഴും ഗ്രൂപ്പ് ഉണ്ട് എന്നുതന്നെയാണ്. അന്നും ഇന്നും കോൺഗ്രസിൽ ഗ്രൂപ്പ് ഉണ്ടായിരുന്നു എന്നു പറയാൻ കെ സുധാകരന് എന്താണ് അര്‍ഹത.
ഇന്ദിരാ ഗാന്ധിയുടെ ചിതാഭസ്മം പയ്യാമ്പലത്ത് നിമഞ്ജനം ചെയ്തപ്പോൾ അതിൽ പങ്കെടുത്ത ആളാണ് ഞാൻ. ചിതാഭസ്മം പയ്യാമ്പലത്ത് ഒഴുക്കിയാൽ കടൽ അശുദ്ധമാകുമെന്നാണ് സുധാകരൻ പറഞ്ഞത്. ഇന്ദിരാഗാന്ധി മരിച്ചതിനു ശേഷം 1987ലാണ് സുധാകരൻ കോൺഗ്രസിലെത്തുന്നത്. കോടിയേരി ബാലകൃഷ്ണനെതിരെ മത്സരിക്കുമ്പോൾ സുധാകരന്റെ മയിൽ ചിഹ്നം മാറ്റി കൈ ചിഹ്നം നൽകാൻ അന്ന് തെരഞ്ഞെടുപ്പ് കമ്മീഷനായിരുന്ന ആ‍ര്‍ രാമചന്ദ്രൻ നായരെ കണ്ടത് ഞാനാണ്. അങ്ങനെയാണ് സുധാകരന്റെ വരവ്.
” 1969ൽ നിര്‍മ്മലഗിരി കോളേജിൽ പഠിക്കുന്ന സമയത്ത് ഞാൻ കെഎസ്യുവിന്റെ സംസ്ഥാന കമ്മിറ്റി അംഗമായിരുന്നു. കെഎസ്യു, യൂത്ത് കോൺഗ്രസ്, കോൺഗ്രസ് പ്രസ്ഥാനത്തിൽ വളര്‍ന്ന ആളാണ്. അന്ന് കെ സുധാകരൻ എവിടെയായിരുന്നു. 1984ൽ ഇന്ദിരാ ഗാന്ധി ക്രൂരമായി കൊല്ലപ്പെട്ടപ്പോൾ ഞാൻ കണ്ണൂ‍ര്‍ ജയിലിലെ ഒമ്പതാം ബ്ലോക്കിലെ അഞ്ചാം സെല്ലിൽ തടവിൽ കഴിഞ്ഞ ആളാണ്. ഞാൻ ഒരിക്കലും കോൺഗ്രസിൽ നിന്നു പുറത്തു പോകുകയോ ഇന്ദിരാ ഗാന്ധിയെ തള്ളിപ്പറയുകയോ ചെയ്യാത്ത പ്രവര്‍ത്തകനാണ്. എന്റെ രാഷ്ട്രീയ ജീവിതത്തിൽ ഞാൻ കിടക്കാത്ത ജയിലുകളില്ല. കണ്ണൂ‍ര്‍, തലശേരി, മാനന്തവാടി ജയിലുകളിൽ കിടന്നിട്ടുണ്ട്. ആറ് തവണയോളം വെട്ടേറ്റ് ആശുപത്രികളിൽ കിടന്നിട്ടുണ്ട്. 1973 മുതൽ 1986 വരെ തലശേരിയിലും കണ്ണൂരിലും മാനന്തവാടിയിലും കേസിനുപോയി ജയിലിൽ കിടന്ന ആളാണ് ഞാൻ. അപ്പോഴൊക്കെ കെ സുധാകരൻ എവിടെയായിരുന്നു. 1969ൽ ഇന്ത്യൻ നാഷ്ണൽ കോൺഗ്രസ് പിളര്‍ന്ന് ഇന്ദിരാ കോൺഗ്രസ് ഉണ്ടാക്കിയപ്പോൾ വയലാ‍ര്‍ രവി എന്റെ നേതാവായിരുന്നു. അന്നു മുതൽ അധികാരമൊന്നും നോക്കാതെ കോൺഗ്രസിൽ പ്രവര്‍ത്തിച്ച ആളാണ് ഞാൻ. ഇന്നെനിക്ക് കോൺഗ്രസിൽ ഒരു സ്ഥാനവുമില്ല.” ദിവാകരൻ പറഞ്ഞു.
തിങ്കളാഴ്ചയാണ് മമ്പറം ദിവാകരനെ അച്ചടക്ക ലംഘനത്തിന്റെ പേരിൽ കോൺഗ്രസിൽ നിന്നും പുറത്താക്കിയത്. കെപിസിസി ജനറൽ സെക്രട്ടറി ടിയു രാധാകൃഷ്ണനാണ് ഇക്കാര്യം അറിയിച്ചത്. ഇന്ദിരാഗാന്ധി സഹകരണ ആശുപത്രി തെരഞ്ഞെടുപ്പിൽ പാർട്ടി പാനലിനെതിരെ മത്സരിക്കുന്നതിനെത്തുടർന്നാണ് നടപടി. കണ്ണൂർ ഡിസിസി അംഗീകരിച്ച പാനലിനെതിരെ ബദൽ പാനൽ രൂപീകരിച്ച് മത്സരിക്കുകയാണ് നിലവിലെ പ്രസിഡന്റുകൂടിയായ മമ്പറം ദിവാകരൻ. ഇതേത്തുടർന്നാണ് ദിവാകരനെ കോൺഗ്രസിൽ നിന്നു പുറത്താക്കുന്നതെന്ന് ടിയു രാധാകൃഷ്ണൻ പറഞ്ഞു.
