വാക്സിനെടുക്കാൻ തയ്യാറാകാത്ത അധ്യാപകർക്കെതിരെ രൂക്ഷ വിമർശനമാണ് വിദ്യാഭ്യാസ മന്ത്രി നടത്തിയത്. 47 ലക്ഷത്തോളം വരുന്ന കുട്ടികളുടെ ആരോഗ്യത്തിന്‍റെ പ്രശ്നമാണിത്. കൊവിഡ് വകഭേദങ്ങൾ പലരൂപത്തിൽ വന്നുകൊണ്ടിരിക്കുന്ന സാഹചര്യത്തിൽ കർശന മുന്നൊരുക്കങ്ങൾ സ്വീകരിച്ചാൽ മാത്രമേ പ്രതിരോധിക്കാനാകൂവെന്നും മന്ത്രി പറഞ്ഞു.
Also Read :
കുട്ടികളുടെ ആരോഗ്യം സംരക്ഷിക്കുന്നതിനായി സർക്കാർ എന്തുവേണമെങ്കിലും ചെയ്യും. സ്‌കൂള്‍ തുറന്ന സാഹചര്യത്തില്‍ കുട്ടികളുടെയും സമൂഹത്തിന്‍റെയും സുരക്ഷ മാനിച്ച് വാക്‌സിനെടുക്കാന്‍ അധ്യാപകരോട് ആവശ്യപ്പെട്ടിട്ടുണ്ട്. സ്‌കൂള്‍ തുറക്കുന്നതിന് മുന്‍പ് തന്നെ എല്ലാ അധ്യാപകരും വാക്‌സിന്‍ എടുക്കണമെന്ന് സര്‍ക്കാര്‍ നിര്‍ദേശം നല്‍കിയിരുന്നു. എന്നാല്‍ സ്‌കൂള്‍ തുറന്ന് ഒരു മാസമായിട്ടും അയ്യായിരത്തോളം അധ്യാപകര്‍ വാക്‌സിനെടുക്കാന്‍ തയ്യാറായിട്ടില്ല.
Also Read :
സ്കൂളുകളുടെ പ്രവർത്തന സമയം വൈകീട്ട് വരെ ആക്കുന്നതിനുള്ള നടപടികൾ സ്വീകരിക്കാനിരിക്കെയാണ് ഇത്രയധികം അധ്യാപകർ വാക്സിനെടുത്തിട്ടില്ലെന്ന് മന്ത്രി പറയുന്നത്. അധ്യാപകർ എത്രയും പെട്ടെന്ന് വാക്സിനെടുക്കണമെന്നും അല്ലാത്തപക്ഷം ആരോഗ്യ വകുപ്പിനെയും കൊവിഡ് ഉന്നതതല സമിതിയെയും അറിയിക്കുമെന്നാണ് മന്ത്രി പറയുന്നത്. അധ്യാപകര്‍ വാക്‌സിനെടുക്കാതിരിക്കുന്നത് മാര്‍ഗരേഖയ്ക്ക് വിരുദ്ധമാണെന്നും ബയോബബിള്‍ സംവിധാനത്തെ അത് ബാധിക്കുമെന്നും മന്ത്രി വ്യക്തമാക്കി.
