Also Read:
പ്രധാനമായും വയറിളക്കം, വയറുവേദന, ഛര്‍ദ്ദി, പനി, തലവേദന, ശരീരവേദന എന്നിവയാണ് നോറോ വൈറസ് രോഗബാധയുടെ ലക്ഷണങ്ങള്‍. ഛര്‍ദ്ദി, വയറിളക്കം എന്നിവ മൂര്‍ച്ഛിച്ചാല്‍ നിര്‍ജലീകരണം സംഭവിക്കുകയും രോഗം ഗുരുതരാവസ്ഥയിലേക്ക് മാറുകയും ചെയ്യും. ആരോഗ്യം ഉള്ളവരില്‍ നോറോ വൈറസ് കാര്യമായി ബാധിക്കില്ല. എന്നാല്‍, ചെറിയ കുട്ടികള്‍, പ്രായമായവര്‍, മറ്റ് അനുബന്ധ രോഗമുള്ളവര്‍ എന്നിവരെ ബാധിച്ചാല്‍ രോഗം ഗുരുതരമാകാന്‍ സാധ്യതയുണ്ട്.
മലിനമായ ജലത്തിലൂടെയും ഭക്ഷണത്തിലൂടെയുമാണ് രോഗം പ്രധാനമായും പകരുന്നത്. രോഗബാധയുള്ള വ്യക്തികളുമായി നേരിട്ടുള്ള സമ്പര്‍ക്കത്തിലൂടെ രോഗം പകരും. ഗ്യാസ്‌ട്രോഇന്റസ്‌റ്റൈനല്‍ രോഗമാണ് നോറോവൈറസ് മൂലം സംഭവിക്കുന്നത്. വയറിന്റെയും കുടലിന്റെയും അതിരുകളില്‍ വീക്കം സംഭവിക്കുകയും കടുത്ത വയറുവേദനയും ഛര്‍ദ്ദിയും അനുഭവപ്പെടുകയും ചെയ്യും.
രോഗബാധിതനായ വ്യക്തിയില്‍ നിന്ന് പുറത്തെത്തുന്ന സ്രവങ്ങളിലൂടെ വൈറസ് പ്രതലങ്ങളില്‍ തങ്ങി നില്‍ക്കുകയും അവയില്‍ സ്പര്‍ശിക്കുന്നവരുടെ കൈകളിലേക്ക് പടരുകയും ചെയ്യും. കൈകള്‍ കഴുകാതെ മൂക്കിലും വായിലും തൊടുന്നതോടെ വൈറസ് ശരീരത്തില്‍ വ്യാപിക്കും. നവംബര്‍ മുതല്‍ ഏപ്രില്‍ വരെയുള്ള മാസങ്ങളിലാണ് നോറോ വൈറസ് കുടുതലായും പടരുന്നത്.
രണ്ടു ദിവസത്തിനുള്ളില്‍ തിരിച്ചറിയാം:
വൈറസ് ബാധിച്ച് രണ്ടു ദിവസത്തിനുള്ളില്‍ രോഗ ലക്ഷണങ്ങള്‍ കണ്ടു തുടങ്ങും. ഈ സാഹചര്യത്തില്‍ മറ്റുള്ളവരുമായി ഇടപഴകാന്‍ ശ്രമിയ്ക്കരുത്. ഡോക്ടറുമായി സംസാരിച്ച് ആവശ്യമായ മുന്‍കരുതലുകള്‍ സ്വീകരിയ്ക്കുക. ലക്ഷണങ്ങള്‍ അനുഭവപ്പെടുന്നതിന് അനുസരിച്ച് ചികിത്സ ലഭിക്കും. രോഗം കണ്ടെത്തിക്കഴിഞ്ഞാല്‍ ധാരാളം വെള്ളം കുടിയ്ക്കാനും പഴങ്ങള്‍ കഴിയ്ക്കാനും ശ്രദ്ധിക്കണം. ആരോഗ്യകരമായ ഭക്ഷണരീതി മാത്രം ഈ കാലയളവില്‍ പിന്തുടരുക.
Also Read:
പ്രതിരോധിയ്ക്കാം ഇങ്ങനെ:
> ടോയിലെറ്റ് ഉപയോഗിച്ചതിന് ശേഷം കൈകള്‍ 20 സെക്കന്റു നേരം കഴുകി വൃത്തിയാക്കുക.
> ആഹാരം കഴിയ്ക്കുന്നതിന് തൊട്ട് മുന്‍പ് കയ്യും മുഖവും കഴുകുക
> നന്നായി തിളപ്പിച്ചതോ ക്ലോറിനേറ്റ് ചെയ്തതോ ആയ വെള്ളം മാത്രം കുടിയ്ക്കാന്‍ ഉപയോഗിക്കുക
> കിണര്‍, വാട്ടര്‍ ടാങ്ക് എന്നിവ ക്ലോറിനേറ്റ് ചെയ്ത് വൃത്തിയാക്കി വെയ്ക്കുക
> പച്ചക്കറികള്‍, പഴങ്ങള്‍ എന്നിവ നന്നായി കഴുകി മാത്രം ഉപയോഗിക്കാന്‍ ശ്രദ്ധിയ്ക്കുക
> തുറന്നുവെച്ചതോ പഴകിയതോ ആയ ആഹാര സാധനങ്ങള്‍ ഉപയോഗിക്കരുത്
