അതേസമയം, പൈപ്പിട്ട ഉടൻ റോഡുകള് പഴയ പടിയാക്കുന്നതിൽ സാങ്കേതികമായി ചില പ്രശ്നങ്ങളുണ്ടെന്നും ഇക്കാര്യത്തിൽ പൊതുമരാമത്ത് വകുപ്പ് മന്ത്രിയുമായി അടുത്തയാഴ്ച ചര്‍ച്ച നടത്തുമെന്നും മന്ത്രി റോഷി അഗസ്റ്റിൻ പറഞ്ഞു. റോഡുകള് തകര്‍ന്നു കിടക്കുന്നതു സംബന്ധിച്ച ഹൈക്കോടതി വിമര്‍ശനത്തിനു പിന്നാലെയായിരുന്നു മന്ത്രിമാര്‍ പരസ്പരം പഴിചാരി രംഗത്തെത്തിയത്.
Also Read:
പൊതുമരാമത്ത് വകുപ്പ് മന്ത്രി പിഎ മുഹമ്മദ് റിയാസിൻ്റെ പ്രസ്താവന ഇങ്ങനെയായിരുന്നു. “കുത്തിപ്പൊളിച്ച റോഡുകള് പഴയപടിയാക്കാൻ കുത്തിപ്പൊളിച്ചവര്‍ക്ക് ഉത്തരവാദിത്തമുണ്ട്. ജല അതോരിറ്റി റോഡുകള് കുത്തിപ്പൊളിക്കുകയാണെങ്കിൽ അത് പഴയ നിലയിലാക്കണമെന്ന് 2017ലെ സര്‍ക്കാര്‍ ഉത്തരവ് ചൂണ്ടിക്കാട്ടുന്നുണ്ട്. കുടിവെള്ളത്തിൻ്റെ ആവശ്യത്തിനായി റോഡുകള് കുത്തിപ്പൊളിക്കുകയാണെങ്കിൽ ജല അതോരിറ്റി അത് പഴയ നിലയിലാക്കണം.” മന്ത്രി പറഞ്ഞു. ഇക്കാര്യത്തിൽ കര്‍ശന നിലപാട് സ്വീകരിക്കാൻ പൊതുമരാമത്ത് വകുപ്പ് തീരുമാനിച്ചെന്നും മന്ത്രി പറഞ്ഞു. കഴിയില്ലെങ്കിൽ രാജി വെച്ചു പോകണമെന്നാണ് കോടതി എഞ്ചിനീയര്‍മാരോടു പറഞ്ഞത്. റോഡുകള് നിശ്ചിത കാലത്തിനുള്ളിൽ അറ്റകുറ്റപ്പണി നടത്തേണ്ടത് കരാറുകാരാണെന്നും എന്നാൽ ഇത് നടന്നെന്ന് ഉറപ്പാക്കേണ്ടത് ഉദ്യോഗസ്ഥരാണെന്നും മന്ത്രി പറഞ്ഞു. എന്നാൽ പലര്‍ക്കും ഈ കാലാവധി എത്രയാണെന്ന് അറിയില്ലെന്നും മന്ത്രി വ്യക്തമാക്കി.
Also Read:
പൊതുമരാമത്ത് വകുപ്പ് മന്ത്രിയുടെ പ്രതികരണത്തിനു പിന്നാലെയായിരുന്നു ജലവിഭവ വകുപ്പ് മന്ത്രി റോഷി അഗസ്റ്റിൻ പ്രതികരണവുമായി എത്തിയത്. റോഡുകള് ജലവിതരണ ജോലികള്‍ക്കായി പെട്ടെന്ന് കുഴിച്ച ശേഷം മൂടുന്നതിൽ സാങ്കേതിക പ്രസ്നമുണ്ടെന്നും പൈപ്പിട്ട ശേഷം ടെസ്റ്റ് നടത്താതെ മൂടാൻ കഴിയില്ലെന്നും മന്ത്രി പറഞ്ഞു. പൈപ്പിട്ട ശേഷം ഉടനെ മൂടിയാൽ പിന്നീട് പരിശോധന നടത്തുമ്പോള്‍ പ്രശ്നങ്ങള്‍ കണ്ടാൽ വീണ്ടും പൊളിക്കേണ്ടതായി വരുമെന്നും മന്ത്രി ചൂണ്ടിക്കാട്ടി. ഇക്കാര്യങ്ങള്‍ അടുത്തയാഴ്ച മന്ത്രി മുഹമ്മദ് റിയാസുമായി ചര്‍ച്ച ചെയ്യുമെന്നും മന്ത്രി പറഞ്ഞു.
കൊച്ചി നഗരപ്രദേശങ്ങളിലെ റോഡുകള് ടാര്‍ ചെയ്ത് ആറു മാസത്തിനുള്ളിൽ തകര്‍ന്നതായി അമിക്കസ് ക്യൂരി നല്‍കിയ റിപ്പോര്‍ട്ട് പരിഗണിക്കുമ്പോഴായിരുന്നു എഞ്ചിനീയര്‍മാര്‍ക്കെതിരെ കോടതിയുടെ വിമര്‍ശനം. ഒരു മഴക്കാലം അതിജീവിക്കാൻ കഴിയുന്നതു പോലെ റോഡ് ടാര്‍ ചെയ്യാൻ കഴിയാത്ത എഞ്ചിനീയര്‍മാര്‍ രാജിവെച്ചു പോകരണമെന്നായിരുന്നു കോടതി പറഞ്ഞത്.
