റോഡുകൾ മികച്ചതായിരിക്കേണ്ടത് ജനങ്ങളുടെ അവകാശമാണെന്ന് കരുതാത്തത് എന്തുകൊണ്ടാണ്? കഴിഞ്ഞ വർഷം കോടതി ഇടപെട്ടതിനെത്തുടർന്ന് നന്നാക്കിയ റോഡുകൾ ഈ വർഷം പഴയപടിയായെന്ന് കോടതി നിരീക്ഷിച്ചു. ജസ്റ്റിസ് ദേവൻ രാമചന്ദ്രനാണ് കേസ് പരിഗണിച്ചത്.
റോഡുകൾ തകർന്നാൽ അടിയന്തരമായി നന്നാക്കാൻ സംവിധാനം ഇല്ലെന്ന് കൊച്ചി നഗരസഭ അറിയിച്ചു. അത്തരം ന്യായീകരണങ്ങൾ മാറ്റി നിർത്തി പുതിയ ആശയങ്ങൾ നടപ്പാക്കാൻ കോടതി നിർദ്ദേശിച്ചു.
അതേസമയം ദേശീയപാതാ നവീകരണത്തിന്റെ മറവിൽ വ്യവസായിയുടെ പുരയിടം സംരക്ഷിക്കാൻ അമ്പത് ലക്ഷത്തിന്റെ സംരക്ഷണ ഭിത്തി നിർമ്മിച്ച ഉദ്യോഗസ്ഥരെ പൊതുമരാമത്ത് മന്ത്രി സസ്പെന്റ് ചെയ്തു. രണ്ട് ഉദ്യോഗസ്ഥരെ സസ്പെന്റ് ചെയ്തതായി പിഎ മുഹമ്മദ് റിയാസ് അറിയിച്ചു.
ദേശീയപാത – 766, വയനാട് ജില്ലയിലെ ലക്കിടി റോഡ് നവീകരണത്തിനിടെ സ്വകാര്യവ്യക്തിക്ക് സഹായകരമാകും വിധം സംരക്ഷണഭിത്തി നിർമ്മിച്ചതായി ചീഫ് എഞ്ചിനിയർ റിപ്പോർട്ട് നൽകിയിട്ടുണ്ട്. പൊതുമരാമത്ത് വകുപ്പിന്റെ ചട്ടങ്ങൾക്ക് വിരുദ്ധമായി പ്രവർത്തിച്ച ദേശീയപാത വിഭാഗം കൊടുവള്ളി സബ്ഡിവിഷനിലെ അസിസ്റ്റൻറ് എൻജിനീയറേയും ഫസ്റ്റ് ഗ്രേഡ് ഓവർസിയറേയും സർവീസിൽ നിന്ന് സസ്പെൻഡ് ചെയ്യാൻ ഉത്തരവ് നൽകിയിട്ടുണ്ട്- മന്ത്രി പിഎ മുഹമ്മദ് റിയാസ് പറഞ്ഞു.
ഈ വിഷയത്തിൽ വിശദമായ പരിശോധന നടത്തി റിപ്പോർട്ട് സമർപ്പിക്കുവാൻ പൊതുമരാമത്ത് വിജിലൻസിന് നിർദ്ദേശം നൽകിയിട്ടുണ്ട്. വിഷയം ശ്രദ്ധയിൽ കൊണ്ടുവന്ന മാധ്യമ പ്രവർത്തകരെയും ജനങ്ങളെയും പ്രത്യേകം അഭിനന്ദിക്കുന്നു- മുഹമ്മദ് റിയാസ് ഫേസ്ബുക്ക് പോസ്റ്റിൽ വ്യക്തമാക്കി.
