കൊച്ചി: അതിവേഗ റെയിൽ വിഷയത്തിൽ മലക്കം മറിഞ്ഞ് ഇ ശ്രീധരൻ. സംസ്ഥാനത്തിന്റെ വികസനത്തിൽ കുതിച്ചുചാട്ടമുണ്ടാക്കാൻ അതിവേഗ റെയിൽ കോറിഡോറിന് കഴിയുമെന്നാണ് 2016 ൽ ശ്രീധരൻ പറഞ്ഞത്. പദ്ധതിക്ക് ഭരണാധികാരികൾ ശ്രദ്ധ കൊടുക്കണമെന്നും ഒപ്പം നിന്ന് മാർഗനിർദ്ദേശം നൽകാൻ ആഗ്രഹമുണ്ടെന്നും ശ്രീധരൻ വ്യക്തമാക്കിയിരുന്നു. എന്നാൽ ഒടുവിൽ നിലപാട് വ്യക്തമാക്കുമ്പോൾ കേരളത്തെ വിഭജിക്കുന്ന ചൈനാ മതിലാകുമെന്നാണ് ശ്രീധരൻ പറയുന്നത്.
അതിവേഗ റെയിൽ കോറിഡോറിനെക്കുറിച്ച് ശ്രീധരൻ അന്നു പറഞ്ഞത്-
- ഹൈസ്പീഡ് കോറിഡോർ കേരളത്തിന് അനിവാര്യമാണ്. തിരുവനന്തപുരം-കണ്ണൂർ അതിവേഗ റെയിൽ കോറിഡോർ എളുപ്പത്തിൽ നടപ്പാക്കാൻ സാധിക്കുമെന്നും ശ്രീധരൻ പറഞ്ഞു. അതിവേഗ റെയിൽ പൂർത്തിയാക്കിയാൽ പ്രതിവർഷം ആയിരത്തിലേറെ ജീവൻ രക്ഷിക്കാനാകും. സംസ്ഥാന സർക്കാർ 15000 കോടിയും കേന്ദ്രം 7500 കോടിയും ചെലവിട്ടാൽ പദ്ധതി നടപ്പാക്കാൻ സാധിക്കും.
- കേരളത്തിലെ റോഡ് അപകട നിരക്ക് 30 ശതമാനം കുറയ്ക്കാൻ അതിവേഗ റെയിൽ പദ്ധതിക്ക് സാധിക്കും. ആദ്യഘട്ടത്തിൽ തിരുവനന്തപുരം മുതൽ കണ്ണൂർ വരെ 430 കിലോമീറ്ററും പിന്നീട് കാസർഗോട്ടേക്ക് നീട്ടാവുന്ന വിധത്തിലുമുള്ള പാതയാണ് ഡിഎംആർസി നിർദ്ദേശിക്കുന്നത്. ഇതിൽ 190 കിലോമീറ്റർ തൂണുകൾക്ക് മുകളിലും 146 കിലോമീറ്റർ ഭൂമിക്ക് അടിയിലൂടെയുമാണ് ട്രെയിൻ സഞ്ചരിക്കുകയെന്നും ശ്രീധരൻ പറഞ്ഞു.
- പ്രതിദിനം കേരളത്തിൽ ഒരുലക്ഷം യാത്രക്കാർക്ക് പദ്ധതിയുടെ പ്രയോജനം ലഭിക്കും. പദ്ധതി കേരളത്തിന്റെ പുരോഗതിക്ക് വൻ കുതിച്ചുചാട്ടം ഉണ്ടാക്കുമെന്നും ശ്രീധരൻ അന്ന് പറഞ്ഞു.
സിൽവർലൈൻ പദ്ധതിയിൽ ശ്രീധരന്റെ നിലപാട്
- സംസ്ഥാന താൽപര്യങ്ങൾക്ക് വിരുദ്ധമാണ് സിൽവർലൈൻ പദ്ധതി. റെയിൽവേ ബോർഡിനെ മറികടന്ന് പദ്ധതി ചെലവ് മുഴുവൻ വഹിക്കാനുള്ള സംസ്ഥാന സർക്കാരിന്റെ നീക്കം വലിയ അബദ്ധമാണ്. സംസ്ഥാന താൽപര്യത്തിന് വിരുദ്ധമായതിനാലാണ് പദ്ധതിയെ എതിർക്കുന്നതെന്ന് ശ്രീധരൻ പറഞ്ഞു.
- മറ്റുള്ളവർ ട്രാക്കിലേക്ക് കടക്കുന്നത് തടയാൻ നിർമ്മിക്കുന്ന മതിൽ കേരളത്തെ രണ്ടായി വിഭജിക്കും. ഇപ്പോഴത്തെ അലൈൻമെന്റ് അനുസരിച്ച് നിർമ്മാണം നടന്നാൽ കേരളത്തെ വിഭജിക്കുന്ന ചൈനാമതിൽ രൂപപ്പെടുമെന്നും ശ്രീധരൻ പറഞ്ഞു.
- 140 കിലോമീറ്റർ പാത കടന്നുപോകുന്നത് നെൽ വയലുകളിലൂടെയാണ്. ഇത് അതിവേഗപാതയ്ക്ക് അനുയോജ്യമല്ല. നിലവിലെ പാതയിൽ നിന്നുമാറി ഭൂമിക്കടിയിലൂടെയോ തൂണിനു മുകളിലോ ആണ് അതിവേഗ പാത നിർമ്മിക്കേണ്ടത്. ലോകത്തെവിടെയും അതിവേഗ പാതകൾ തറനിരപ്പിൽ നിർമ്മിക്കാറില്ലെന്നും അദ്ദേഹം വ്യക്തമാക്കി.
- പദ്ധതിക്കായി 20000 കുടുംബങ്ങളെ ഒഴിപ്പിക്കേണ്ടിവരും. 2025 ൽ പദ്ധതി പൂർത്തിയാക്കുമെന്ന വാദം ഏജൻസിയുടെ അറിവില്ലായ്മയുടെ തെളിവാണ്. പദ്ധതിക്ക് 75000 കോടി ചെലവാകുമെന്നാണ് കണക്കെങ്കിലും ഒരുലക്ഷം കോടിയെങ്കിലും ചെലവ് വരും. സാമ്പത്തിക പ്രതിസന്ധിയിലായ സംസ്ഥാനം ഈ തുക എങ്ങനെ കണ്ടെത്തുമെന്ന് ശ്രീധരൻ ചോദിച്ചു.
