പുതിയ കാലത്ത് പല ഗുണ നിലവാരത്തിൽ, പല രീതിയിൽ തയ്യാറാക്കി പാക്ക് ചെയ്ത കശുവണ്ടി പരിപ്പുകൾ വിപണിയിൽ ലഭ്യമാണ്. ചുട്ടെടുത്തതും, റോസ്റ്റ് ചെയ്തതും ഫ്രഷ്‌ ആയതുമെല്ലാം. പക്ഷെ വില, അത് കശുവണ്ടി കറയേക്കാൾ പൊള്ളും. എങ്കിലും കശുവണ്ടിയോടുള്ള കൊതി കാരണം വില കൂടുതലാണെങ്കിലും ഒഴിച്ചുനിർത്താൻ കഴിയാറില്ല. നമുക്ക് മാത്രമല്ല, ലോകത്തെല്ലായിടത്തും പ്രിയമുള്ളതാണ് കശുവണ്ടി. എങ്ങനെയാണ് ഇത് നമ്മുടെ നാട്ടിലെത്തിയത്? ഈ കാഷ്യൂ ദിനത്തിൽ കശുവണ്ടിപ്പരിപ്പിനെക്കുറിച്ച് ചില വിശേഷങ്ങൾ അറിയാം.
പോർച്ചുഗീസുകാരുടെ കൂടെയെത്തി:
വടക്ക് കിഴക്കൻ ബ്രസിൽ ആണ് കശുമാവിൻറെ സ്വന്തം നാട്. പോർച്ചുഗീസുകാരുടെ അധിനിവേശ സമയത്താണ് ആദ്യമായി കശുവണ്ടി ഇന്ത്യയിൽ എത്തുന്നത്. പോർച്ചുഗീസുകാർ ഗോവ കയ്യടക്കിയിരുന്ന 1560 – 65 കാലഘട്ടത്തിലാണ് ഇത്. പിന്നീട് തെക്കുകിഴക്കൻ ഏഷ്യയിലേയ്ക്കും പിന്നീട് അഫ്രിക്കയിലേയ്ക്കും ഇത് സഞ്ചരിച്ചു. രാജ്യങ്ങൾ തമ്മിൽ കയറ്റുമതി, ഇറക്കുമതി സജീവമായതോടെ ലോകത്തിന് മുഴുവൻ പ്രിയപ്പെട്ടതായി മാറി.
ചില വിശേഷങ്ങൾ:
> പോർച്ചുഗീസ് ഭാഷയിൽ കശുമാവിന് ‘കാജു’ (caju) എന്നാണ് പറയുന്നത്. പരിപ്പ് എന്നതിന് ടുപിയൻ വാക്കായ ‘അകാജു’ (acaju) വിൽ നിന്നാണ് പോർച്ചുഗീസ് ഈ വാക്ക് സ്വീകരിച്ചത്. കാജു എന്ന വാക്കിൽ നിന്നാണ് ഇംഗ്ലീഷിൽ കാഷ്യു രൂപപ്പെട്ടത്.
> ധാരാളം പോഷക ഗുണങ്ങൾ അടങ്ങിയതാണ് കശുവണ്ടി. ധാരാളം പ്രോട്ടീൻ, മിനറലുകളായ കോപ്പർ, കാത്സ്യം, മഗ്നീഷ്യം, അയേൺ, ഫോസ്ഫറസ്, പൊട്ടാസ്യം, സിങ്ക് എന്നിവയുടെ കലവറ എന്ന് വിളിക്കാം.
> വിറ്റാമിൻ C, വിറ്റാമിൻ B1, വിറ്റാമിൻ B2, വിറ്റാമിൻ B3, വിറ്റാമിൻ B6, ഫോളേറ്റ്, വിറ്റാമിൻ E, വിറ്റാമിൻ K എന്നിവ കശുവണ്ടിയിൽ ധാരാളമുണ്ട്. കൂടാതെ ഒമേഗ 9 ഫാറ്റി ആസിഡ് ആയ ഒലെയിക് ആസിഡ് വളരെയധികം അടങ്ങിയിട്ടുണ്ട്.
> പാശ്ചാത്യ രാജ്യങ്ങളിൽ കശുവണ്ടിപ്പരിപ്പ് മിക്കപ്പോഴും സ്നാക് ആയി കഴിക്കാറുണ്ട്.
> തെക്ക് കിഴക്കൻ ഏഷ്യയിൽ ലഭിക്കുന്ന മിക്ക വിഭവങ്ങളിലും അണ്ടിപ്പരിപ്പ് ചേർക്കാറുണ്ട്. കശുവണ്ടിയിൽ നിന്നെടുക്കുന്ന എണ്ണയും ഇത്തരത്തിൽ ഉയോഗിക്കുന്നുണ്ട്.
> കശുവണ്ടിയുടെ പുറംതോട് മറ്റ് പല ആവശ്യങ്ങൾക്കുമായി ഉപയോഗിക്കുന്നുണ്ട്. പെയിന്റ്, ല്യൂബ്രികന്റ്സ് എന്നിവ തയ്യാറാക്കാൻ ഇത് ഉപയോഗിക്കുന്ന രീതി രണ്ടാംലോക മഹായുദ്ധ കാലം മുതൽ ആരംഭിച്ചിരുന്നു.
> ലോകത്ത് ഉദ്പാദിപ്പിയ്ക്കുന്ന കശുവണ്ടിയുടെ 90 ശതമാനവും ഉപയോഗിക്കുന്നത് അമേരിക്കയാണ്.
> ഗോവയിൽ കശുമാങ്ങ ജ്യൂസിൽ നിന്ന് പ്രത്യേകമായി തയ്യാറാക്കുന്ന മദ്യമാണ് ഫെന്നി. 40 മുതൽ 42 ശതമാനം വരെ ആൽക്കഹോൾ അടങ്ങിയതാണ് ഇത്.
> കിഡ്നി സ്റ്റോൺ അല്ലെങ്കിൽ ഗാൾബ്ലാഡർ പ്രശ്നങ്ങൾ അനുഭവിക്കുന്നവർ കശുവണ്ടി കഴിയ്ക്കുന്നത് പരമാവധി കുറയ്ക്കണം, ഇല്ലെങ്കിൽ ഇത് വിപരീത ഫലമുണ്ടാക്കും.
> മറ്റ് നട്സ്കളുമായി താരതമ്യം ചെയ്യുമ്പോൾ 23 ശതമാനം കൂടുതൽ സ്റ്റാർച്ച് കശുവണ്ടിയിൽ അടങ്ങിയിട്ടുണ്ട്.
> ഗുണങ്ങളും രുചിയും ധാരാളമുണ്ടെങ്കിലും ചില ആളുകൾക്ക് കശുവണ്ടി കഴിയ്ക്കുന്നത് വലിയ തോതിൽ അലർജിയ്ക്ക് കാരണമാകും.
> കശുവണ്ടിപരിപ്പിനും അതിൻറെ പുറംതോടിനും ഇടയ്ക്ക് കാണപ്പെടുന്ന അനകാർഡിക് ആസിഡ് ശരീരത്തിൽ വീണാൽ പൊള്ളൽഏൽക്കും.
> പണ്ടുകാലങ്ങളിൽ കശുമാവിൻറെ ഇലകൾ, ചെറിയ തണ്ട് എന്നിവ തിളപ്പിച്ച് കഴിയ്ക്കുന്നത് അതിസാരത്തിന് പരിഹാരമായി ഉപയോഗിച്ചിരുന്നു.
