സംഭവദിവസം അൻസി കബീറിനും സുഹൃത്തുക്കൾക്കും ഭക്ഷണം വിളമ്പിയത് താനാണെന്ന് സോബിൻ പറഞ്ഞു. “അൻസിയും അൻജനയും കൊച്ചിയിൽ എത്തുമ്പോഴെല്ലാം ഹോട്ടലിൽ എത്താറുണ്ട്. രാത്രി 7.30 ഓടെയാണ് അൻസിയും സുഹൃത്തുക്കളും ഹോട്ടലിൽ എത്തിയത്. അൻസിയും അൻജനയും മദ്യപിച്ചിരുന്നില്ല. എന്നാൽ ഒപ്പമുണ്ടായിരുന്ന രണ്ട് പേർ മദ്യം കഴിച്ചു. മദ്യവും ഫ്രഞ്ച് ഫ്രൈസുമാണ് ഇവർ ഓർഡർ ചെയ്തത്. ഭക്ഷണം കഴിച്ച ശേഷം ഇവർ നൃത്തം ചെയ്യുകയും ചെയ്തു. 11.30 ഓടെയാണ് അവർ പാർട്ടി കഴിഞ്ഞ് മടങ്ങിയത്. 1550 രൂപയുടെ ബിൽ ഗൂഗിൾപേ വഴി അടച്ചത് അൻസിയാണ്” – എന്നും സോബിൻ വ്യക്തമാക്കി.
11.30 ഓടെ പാർട്ടി കഴിഞ്ഞ് പുറത്തിറങ്ങിയ അൻസിയും അൻജനയും 12.15 ഓടെ ഹോട്ടലിന് മുന്നിൽ നിൽക്കുന്നത് കണ്ടിരുന്നുവെന്നും ഇയാൾ കൂട്ടിച്ചേർത്തു. “അൻസിയും അൻജനയും ഇവരുമായി സംസാരിച്ച് നിൽക്കുകയായിരുന്നു. സന്തോഷത്തോടെയാണ് അൻസിയെ കാണാൻ കഴിഞ്ഞത്. എന്നാൽ ഇവരുടെ വാഹനത്തിൻ്റെ ഡ്രൈവർ മദ്യപിച്ചിരുന്നു. രാവിലെവരെ ഹോട്ടലിൽ വിശ്രമിക്കാൻ ഷൈജുവും റോയിയും ആവശ്യപ്പെട്ടെങ്കിലും ഹോട്ടലിൽ നിന്ന് മടങ്ങാനായിരുന്നു ഇവരുടെ തീരുമാനം. മദ്യലഹരിയിലായിരുന്ന ഡ്രൈവർക്ക് വാഹനം നിയന്ത്രിക്കാൻ കഴിയുന്ന അവസ്ഥയിലായിരുന്നില്ല. പിന്നീട് ഷൈജു അവരെ പിന്തുടർന്ന് പോവുകയായിരുന്നു. ഒരുമണിക്കൂറിന് ശേഷം ഹോട്ടലിലെ മറ്റൊരു ജീവനക്കാരനെ റോയി ഫോണ്‍ ചെയ്തപ്പോഴാണ് അപകടവിവരം അറിയുന്നത്. ഷൈജുവാണ് റോയി വയലാട്ടിനെ അപകടവിവരം അറിയിച്ചതെന്നും അദ്ദേഹം വ്യക്തമാക്കി.
അപകടം നടന്ന സ്ഥലത്തേക്ക് പോകണമെന്നും ആവശ്യമായ സഹായം ചെയ്തു നൽകണമെന്നും ആവശ്യപ്പെട്ടാണ് റോയി ആവശ്യപ്പെട്ടത്. സഹപ്രവർത്തകർ സ്ഥലത്ത് എത്തിയെങ്കിലും അപ്പോഴേക്കും അൻസിയേയും അൻ ജനയെയും ആശുപത്രിയിലേക്ക് മാറ്റിയിരുന്നു. ആശുപത്രിയിൽ എത്തിയപ്പോഴാണ് ഇരുവരും മരിച്ചുവെന്ന് അറിയാൻ കഴിഞ്ഞത്. അപകടവുമായി ബന്ധപ്പെട്ട് മാധ്യമങ്ങളിലൂടെ പുറത്തുവരുന്ന വാർത്തകളിൽ പലതും യാഥാർഥ്യമല്ലെന്നും സോബിൻ വ്യക്തമാക്കി.
പാർട്ടിയിൽ വിഐപികളാരും പങ്കെടുത്തിരുന്നില്ല. എല്ലാവരും റോയി വയലാട്ടിൻ്റെ അടുത്ത സുഹൃത്തുക്കളായിരുന്നു. ഒക്ടോബർ 31ന് നടന്ന പരിപാടിയിൽ 30തോളം പേരാണ് പങ്കെടുത്തത്. 12 മേശകളിൽ താൻ ഭക്ഷണം വിളമ്പിയിരുന്നു. ഇതിലൊന്ന് അന്‍സിയും സുഹൃത്തുക്കളും ഉണ്ടായിരുന്നു. ഹോട്ടലിൽ എത്തുന്നവരുമായി അടുത്തബന്ധം പുലർത്തുന്ന വ്യക്തിയാണ് റോയിയെന്നും സോബിൻ പറഞ്ഞു.
അപകടദിവസം നമ്പർ 18 ഹോട്ടലിൽ ഒരു ഐപിഎസ് ഉദ്യോഗസ്ഥനെത്തിയെന്നാണ് മാതൃഭൂമി ന്യൂസ് റിപ്പോർട്ട് ചെയ്തിരുന്നു. ഇദ്ദേഹത്തിനെതിരെ നടപടിക്ക് സാധ്യതയുണ്ടെന്ന് റിപ്പോർട്ടിലുണ്ട്. തിരുവനന്തപുരത്ത് ജോലി ചെയ്യുന്ന ഐപിഎസ് ഉദ്യോഗസ്ഥൻ ഒക്ടോബർ 31ന് കൊച്ചിയിൽ എത്തിയിരുന്നെന്നാണ് റിപ്പോർട്ട്. ഇദ്ദേഹം ഇടയ്ക്കിടെ കൊച്ചിയിലെത്തുന്നത് എന്തിനാണെന്നും സംഭവ ദിവസം ഹോട്ടലിൽ എത്തിയത് എന്തിനാണെന്നും വിശദീകരിക്കേണ്ടി വന്നേക്കും.
