ദേശീയ സുരക്ഷയെ സംബന്ധിക്കുന്ന റിപ്പോർട്ടുകൾ കോൺഗ്രസിന്റേത് അടക്കമുള്ള പഞ്ചാബിലെ പ്രതിനിധികൾ പ്രധാനമന്ത്രിക്ക് നൽകിയിരുന്നു. ഇതിന്റെ പശ്ചാത്തലത്തിലായിരിക്കാം തീരുമാനം കൈക്കൊണ്ടത്. കാർഷിക നിയമങ്ങൾ കർഷകർക്കുവേണ്ടിയുള്ളതായിരുന്നു- സുരേഷ് ഗോപി പറഞ്ഞു.
ഗുരുനാനാക്ക് ജയന്തിയോടനുബന്ധിച്ച് രാജ്യത്തെ അഭിസംബോധന ചെയ്യുമ്പോഴായിരുന്നു വിവാദ കാർഷിക നിയമങ്ങൾ പിൻവലിക്കുകയാണെന്ന് പ്രധാനമന്ത്രി നരേന്ദ്ര മോദി പ്രഖ്യാപിച്ചത്. കർഷകരുടെ നന്മയ്ക്കു വേണ്ടിയാണ് നിയമങ്ങൾ കൊണ്ടുവന്നതെന്നും എന്നാൽ അതിന്റെ ഗുണവശങ്ങൾ ചില കർഷകർക്ക് മനസിലായില്ലെന്നും പ്രധാനമന്ത്രി പറഞ്ഞു.
കാർഷിക നിയമങ്ങൾ പിൻവലിക്കുകയാണെന്ന് പ്രഖ്യാപിച്ച പ്രധാനമന്ത്രി സമരം അവസാനിപ്പിക്കണമെന്ന് കർഷകരോട് അഭ്യർത്ഥിച്ചു. ഒരു കർഷകനും ബുദ്ധിമുട്ട് ഉണ്ടാകാതിരിക്കാനാണ് തീരുമാനമെന്ന് അദ്ദേഹം വ്യക്തമാക്കി. നീണ്ട ഒരു വർഷത്തെ സമരത്തിനൊടുവിലാണ് വിവാദ നിയമങ്ങൾ പിൻവലിക്കുകയാണെന്ന് പ്രധാനമന്ത്രി വ്യക്തമാക്കിയത്.
ഒരു വർഷത്തെ സമരകാലത്തിനിടെ നിരവധി തവണ കർഷക നേതാക്കളുമായി മന്ത്രിമാർ അടങ്ങുന്ന സർക്കാരിന്റെ പ്രതിനിധികൾ ചർച്ച നടത്തിയെങ്കിലും കാർഷിക നിയമങ്ങൾ പിൻവലിക്കില്ലെന്നായിരുന്നു സർക്കാരിന്റെ നിലപാട്. പഞ്ചാബിൽ അടക്കം നിയമസഭാ തെരഞ്ഞെടുപ്പ് നടക്കാനിരിക്കെയാണ് വിവാദ നിയമം പിൻവലിക്കാൻ സർക്കാർ തീരുമാനിച്ചിരിക്കുന്നത്.
