കുഞ്ഞിന് വേണ്ടി അനുപമയുടെ സമരം: നാള്‍വഴികള്‍

അമ്മ അറിയാതെ മൂന്ന് ദിവസം മാത്രം പ്രായമുള്ള കുഞ്ഞിനെ ദത്ത് നല്‍കിയ സംഭവം തിരുവനന്തപുരത്താണ് നടന്നത്. നൊന്തു പ്രസവിച്ച തന്‍റെ കുഞ്ഞിനെ വിട്ടുകിട്ടണമെന്നാവശ്യപ്പെട്ട് അനുപമ എസ് ചന്ദ്രന്‍ ശിശുക്ഷേമ സമിതിക്ക് പുറത്ത് ഉപവാസ സമരം തുടരുകയാണ്.

കുഞ്ഞിനെ തിരികെ കിട്ടാന്‍ തെരുവിലിറങ്ങുകയല്ലാതെ മറ്റൊരു മാര്‍ഗ്ഗവുമില്ലെന്നാണ് അനുപമ പറയുന്നത്. സി.പി.എം ഭാരവാഹികൂടെയായ അനുപമയുടെ പിതാവും അദ്ദേഹത്തെ ദത്ത് നൽകാൻ സഹായിച്ച ഏജൻസികളുടെ പങ്കും സി.പി.എമ്മിനെ തന്നെ സംഭവത്തില്‍ പ്രതിക്കൂട്ടിലാക്കി.

പാര്‍ട്ടിയും സര്‍ക്കാരും തന്‍റെ കൂടെയുണ്ടെന്ന് പറയുന്നുണ്ടെങ്കിലും ആരും സഹായിക്കുന്നില്ലെന്നും ശിശുക്ഷേമ സമിതിയിലെ ഉദ്യോഗസ്ഥര്‍ പ്രശ്‌നം കൂടുതല്‍ സങ്കീര്‍ണ്ണമാക്കാന്‍ ശ്രമിക്കുകയാണെന്നുമാണ് സമരം നടത്തുന്നതിനിടെ അനുപമ പറയുന്നത്.

ശിശുക്ഷേമസമിതിക്ക് മുന്നില്‍ സമരപ്പന്തല്‍ തീര്‍ത്ത് പ്രതിഷേധിക്കാനുള്ള ശ്രമം പോലീസ് തടഞ്ഞതിനെ തുടര്‍ന്ന് മഴയത്തും അവര്‍ സമരം തുടരുന്നു.

എങ്ങനെയാണ് ഈ വിവാദത്തിന്‍റെ നാള്‍വഴികള്‍ പരിശോധിക്കാം
തന്‍റെ സമ്മതമില്ലാതെ വീട്ടുകാര്‍ കുഞ്ഞിനെ മാറ്റിയെന്നാരോപിച്ച് 2020 ലാണ് എസ്.എഫ്.ഐ നേതാവായ അനുപമയും ഡി.വൈ.എഫ്.ഐ മേഖലാ പ്രസിഡന്‍റായ അജിത്തും പേരൂര്‍ക്കട പോലീസിലും മുഖ്യമന്ത്രിക്കും സി.പി.എമ്മിലെ നേതാക്കള്‍ക്കും പരാതി നല്‍കിയത്. എന്നാല്‍ ഒരു വര്‍ഷക്കാലം പോലീസ്‌ സ്റ്റേഷൻ കയറിയിറങ്ങിയിട്ടും കേസെടുത്തിരുന്നില്ല. പിന്നീട് കഴിഞ്ഞ ഒക്ടോബര്‍ 18നാണ് കേസെടുത്ത് പോലീസ് അന്വേഷണത്തിന് തുടക്കം കുറിച്ചത്.

അനുപമയുടെ പിതാവും സി.പി.എം ലോക്കല്‍ കമ്മിറ്റിയംഗവുമായ പി.എസ് ജയചന്ദ്രനും ബ്രാഞ്ച് കമ്മിറ്റിയംഗമായ മാതാവ് സ്മിതാ ജയിംസും ഉള്‍പ്പെടെ ആറ് പേര്‍ക്കെതിരെയാണ് പോലീസ് കേസെടുത്തിരിക്കുന്നത്. ഗര്‍ഭിണി ആയിരിക്കുമ്പോള്‍ അനുപമ വിവാഹിതയായിരുന്നില്ല. മാത്രമല്ല കുട്ടിയുടെ അച്ഛനായ അജിത്തിന് മറ്റൊരു കുടുംബം ഉണ്ടായിരുന്നതും അനുപമയുടെ കുടുംബത്തിന്‍റെ ജാതിവെറിയും പ്രശനങ്ങളായി.

അനുപമയ്ക്ക് കുട്ടിയുണ്ടായ ശേഷമാണ് അജിത്ത് ആദ്യഭാര്യയില്‍ നിന്നു വിവാഹമോചനം നേടി അനുപമയെ വിവാഹം ചെയ്തത്. ഇതെല്ലാമാണ് കുഞ്ഞിനെ മാറ്റാനുള്ള കാരണമെന്നാണ് പരാതിയില്‍ അനുപമ പറഞ്ഞിരുന്നത്.

2020 ഒക്ടോബര്‍ 22 നാണ് കുഞ്ഞിനെ മാതാപിതാക്കള്‍ തട്ടിയെടുക്കുന്നത് — അനുപമ മാധ്യമങ്ങളോട് പറഞ്ഞു.

“മൂത്ത സഹോദരിയുടെ വിവാഹം കഴിയുന്നത് വരെ കുട്ടിയെ മാറ്റി നിര്‍ത്തുകയാണെന്നാണ് അവര്‍ പറഞ്ഞിരുന്നത്. സഹോദരിയുടെ വിവാഹാവശ്യത്തിന് പണം കണ്ടെത്താനായി സ്ഥലം വില്‍ക്കമെന്നും അതിനായി ഒപ്പിട്ടു തരണമെന്നും വീട്ടുകാര്‍ ആവശ്യപ്പെട്ടിരുന്നു. ഒരു അഭിഭാഷകന്‍റെ സാന്നിധ്യത്തില്‍ മുദ്രപ്പത്രത്തില്‍ ഒപ്പുവയ്പിച്ചു. എന്നാല്‍ എന്താണ് അതില്‍ എഴുതിയത് എന്ന് വായിക്കാന്‍ അനുവദിക്കാതെ എന്‍റെ കയ്യില്‍ നിന്നും മുദ്രപ്പത്രം വാങ്ങി. പിന്നീടാണ് കുഞ്ഞിനെ ശിശുക്ഷേമ സമിതിക്കു കൈമാറാനുള്ള സമ്മതപത്രമായിരുന്നു അതെന്ന് മനസിലായത്. ശിശുക്ഷേമ സമിതിക്കു കൈമാറിയ കുഞ്ഞിനെ ദത്തു നല്‍കല്‍ സമിതി ഓഗസ്റ്റ് 7 ന് ആന്ധ്രയിലെ ദമ്പതികള്‍ക്കു കൈമാറി. താല്‍ക്കാലികമായാണ് കൈമാറ്റം നടന്നതെങ്കിലും സ്ഥിര അവകാശത്തിനായുള്ള നടപടികള്‍ കോടതിയില്‍ പുരോഗമിക്കുകയാണ്.” അനുപമ പറയുന്നു.

ഡി.ജി.പിയോട് റിപ്പോര്‍ട്ട് തേടി വനിതാകമ്മീഷന്‍
കുഞ്ഞിനെ കടത്താന്‍ മാതാപിതാക്കളെ സഹായിച്ചത് ശിശുക്ഷേമസമിതിയും സി.ഡബ്ല്യു.സിയുമാണെന്ന ഗുരുതര ആരോപണവുമായി ഒക്ടോബര്‍ 21 ന് അനുപമയും അജിത്തും രംഗത്ത് വന്നു. ശിശുക്ഷേമസമിതി ജനറല്‍ സെക്രട്ടറിയും ഡി.വൈ.എഫ്.ഐ നേതാവുമായ ഷിജുഖാനാണ് ഈ പ്രവര്‍ത്തിക്ക് പിന്നില്‍ എന്നും യുവതി കുറ്റപ്പെടുത്തി. നിയമങ്ങള്‍ പാലിക്കാതെയാണ് ഷിജുഖാന്‍റെ നേതൃത്വത്തില്‍ ശിശുക്ഷേമസമിതി കുഞ്ഞിനെ സ്വീകരിച്ചതെന്നും പരസ്പര വിരുദ്ധമായാണ് ഷിജുഖാന്‍ സംസാരിക്കുന്നതെന്നും അനുപമ അഭിപ്രായപ്പെട്ടു. കുഞ്ഞിനെ തട്ടിക്കൊണ്ടു പോയെന്ന് ചൂണ്ടിക്കാട്ടി കഴിഞ്ഞ ഏപ്രില്‍ മാസത്തില്‍ ചൈല്‍ഡ് വെല്‍ഫയര്‍ കമ്മിറ്റിക്ക് പരാതി നല്‍കിയിരുന്നെങ്കിലും നടപടിയുണ്ടായില്ലെന്നും അനുപമ പറഞ്ഞു. എന്നാല്‍ ഷിജുഖാന്‍ വിഷയത്തില്‍ പ്രതികരിച്ചിരുന്നില്ല.

കേസ് കോടതിയുടെ മുന്നിലേക്ക് എത്തിക്കാനുള്ള അനുപമയുടെ ശ്രമം തുടങ്ങിയത് ഈ സമയത്തായിരുന്നു. പേരൂര്‍ക്കട പോലീസിന്റെ നേതൃത്വത്തിലുള്ള അന്വേഷണം അട്ടിമറിക്കാന്‍ സാധ്യതയുണ്ടെന്ന് പറഞ്ഞാണ് അന്വേഷണ മേല്‍നോട്ടമാവശ്യപ്പെട്ട് കോടതിയെ സമീപിക്കാന്‍ കുഞ്ഞിന്റെ അമ്മ തീരുമാനിച്ചത്.

ഒക്ടോബര്‍ 21 ന് തന്നെയാണ് അനുപമയുടെ പരാതിയെ തുടര്‍ന്ന് വനിതാകമ്മിഷന്‍ കേസെടുത്തത്. സംഭവത്തില്‍ ഡി.ജി.പി ഉടന്‍ റിപ്പോര്‍ട്ട് നല്‍കണമെന്ന് വനിതാകമ്മിഷന്‍ അധ്യക്ഷ പി.സതീദേവി ആവശ്യപ്പെട്ടു.

ഒക്ടോബര്‍ 22
സി.പി.എമ്മിനെതിരെ ഗുരുതര ആരോപണങ്ങളാണ് ഒക്ടോബര്‍ 22ന് കുഞ്ഞിന്റെ അമ്മ ഉന്നയിച്ചിരുന്നത്. മുഖ്യമന്ത്രിയടക്കം പാര്‍ട്ടിയിലെ ഉന്നതരെ പരാതിയുമായി സമീപിച്ചെങ്കിലും നടപടി ഉണ്ടായില്ലെന്നാണ് യുവതി പറഞ്ഞത്. മാത്രമല്ല നീതി നടപ്പിലാക്കുമെന്ന് പറഞ്ഞെങ്കിലും സി.പി.എം ജില്ലാ സെക്രട്ടറി ആനാവൂര്‍ നാഗപ്പന്‍ വളരെ പരുഷമായാണ് പെരുമാറിയതെന്നും അനുപമ കുറ്റപ്പെടുത്തി.

അന്നേദിവസം തന്നെയാണ് സംഭവത്തില്‍ വകുപ്പ് തല അന്വേഷണം തുടങ്ങിയെന്ന് വനിത ശിശുക്ഷേമമന്ത്രി വീണാ ജോര്‍ജ് അറിയിച്ചത്. കുഞ്ഞിനെ അമ്മയ്ക്ക് വിട്ടുകിട്ടുന്നതിനുള്ള നടപടികള്‍ സ്വീകരിക്കുമെന്നായിരുന്നു മന്ത്രി പറഞ്ഞത്. ഇതിന് പിന്നാലെ ശിശുക്ഷേമ സമിതിയില്‍ കുട്ടിയെ എത്തിച്ചത് മുതലുള്ള എല്ലാ കാര്യങ്ങളും അന്വേഷിക്കാന്‍ വനിതാ ശിശുക്ഷേമ വകുപ്പ് സെക്രട്ടറിയെ ചുമതലപ്പെടുത്തി.

ഇതിനിടെ പോലീസിന്റെ ചോദ്യങ്ങള്‍ക്ക് കുഴപ്പിക്കുന്ന മറുപടിയാണ് ശിശുക്ഷേമസമിതി നല്‍കിയത്. 2020 ഒക്ടോബര്‍ 19നും 25നും ഇടയില്‍ രണ്ട് ആണ്‍കുട്ടികളെ ലഭിച്ചൂവെന്ന് മാത്രമാണ് സമിതി പോലീസിന് നല്‍കിയ മറുപടി. മറ്റ് വിശദാംശങ്ങള്‍ നല്‍കാന്‍ കഴിയില്ലെന്നും അങ്ങനെ നല്‍കുന്നത് നിയമ ലംഘനമാണെന്നും സമിതി ചൂണ്ടിക്കാട്ടി. കുട്ടിയെ കുറിച്ചുള്ള കൂടുതല്‍ വിവരങ്ങള്‍ അറിയണമെങ്കില്‍ സെന്‍ട്രല്‍ അഡോപ്ഷന്‍ റിസോഴ്‌സ് അതോറിറ്റിയുമായി ബന്ധപ്പെടാന്‍ ആവശ്യപ്പെടുകയും ചെയ്തു.

ഒക്ടോബര്‍ 23: നിരാഹര സമരം
നീതി ലഭിക്കണമെന്ന് ആവശ്യപ്പെട്ട് അനുപമ സെക്രട്ടേറിയറ്റ് പടിക്കല്‍ നിരാഹാര സമരം നടത്തി. പാര്‍ട്ടിയും പോലീസും കൈയ്യൊഴിഞ്ഞെന്നാണ് സമരത്തിനിടെ യുവതി പറഞ്ഞത്.

അതിനിടെ അനുപമയ്‌ക്കെതിരെ അജിത്തിന്‍റെ ആദ്യ ഭാര്യ നാസിയ രംഗത്ത് വന്നു. ശിശുക്ഷേമ സമിതിക്ക് കുഞ്ഞിനെ കൈമാറിയത് അനുപമയുടെ അറിവോടെയാണെന്നാണ് നാസിയ ആരോപിച്ചത്. താന്‍ വിവാഹമോചനം തരില്ലെന്ന് പറയാന്‍ അനുപമയുടെ വീട്ടില്‍ എത്തിയിരുന്നു. കുട്ടിയെ കൈമാറാനുള്ള സമ്മതപത്രം അനുപമയാണ് വീട്ടുകാര്‍ക്ക് നല്‍കിയതെന്നും താനും അത് വായിച്ചിരുന്നു എന്നും നാസിയ മാധ്യമങ്ങളോട് പറഞ്ഞു.

എന്നാല്‍, നാസിയയുടെ ആരോപണങ്ങളില്‍ കഴമ്പില്ലെന്നും തന്‍റെ പിതാവിന്‍റെ പിന്‍ബലത്തിലാണ് അവര്‍ തനിക്കെതിരെ കുറ്റങ്ങള്‍ ചുമത്തുന്നതെന്നും അനുപമ പറഞ്ഞു. അജിത്തിന് വിവാഹമോചനം നല്‍കിയില്ലെങ്കില്‍ തന്‍റെ പിതാവ് നാസിയക്ക് ജോലിവാഗ്ദാനം ചെയ്തിരുന്നെന്നും അനുപമ പറഞ്ഞു.

ഒക്ടോബര്‍ 24: ഷിജുഖാന്‍ പ്രതികരിക്കുന്നു
കുഞ്ഞിനെ ദത്തുനല്‍കിയത് നിയമപ്രകാരമാണെന്നാണ് വനിത ശിശുവികസന ഡയറക്ടര്‍ക്ക് നല്‍കിയ മൊഴിയില്‍ ഷിജുഖാന്‍ പറഞ്ഞത്. നിയമപ്രശ്‌നങ്ങള്‍ ഉണ്ടാകുമെന്നതിനാലാണ് പുറത്തു പറയാനികില്ലെന്ന് പറഞ്ഞതെന്നും അദ്ദേഹം വ്യക്തമാക്കി. മന്ത്രി വീണ ജോര്‍ജ് നിര്‍ദേശിച്ച അന്വേഷണത്തിന്റെ ഭാഗമായാണ് ഷിജുഖാനെ വിളിച്ചുവരുത്തിയത്.

അതേസമയം, അജിത്തിന്റെ ആദ്യ വിവാഹത്തില്‍ കുട്ടികളുണ്ടെന്ന വാദം തെറ്റാണെന്ന് അനുപമയും അജിത്തും ചൂണ്ടിക്കാട്ടി.

ഒക്ടോബര്‍ 25: ദത്ത് നടപടിക്ക് സ്റ്റേ
ആന്ധ്രയിലെ ദമ്പതികള്‍ക്ക് കുഞ്ഞിനെ നിയമപരമായി നല്‍കുന്ന ദത്തെടുക്കല്‍ നടപടി തിരുവന്തപുരം കുടുംബ കോടതി താല്‍ക്കാലികമായി സ്റ്റേ ചെയ്തു. ദത്ത് നടപടികള്‍ താല്‍ക്കാലികമായി നിര്‍ത്തിവെക്കണമെന്ന് ആവശ്യപ്പെട്ട് സര്‍ക്കാരും ശിശുക്ഷേമ സമിതിയും കോടതിയില്‍ ഹര്‍ജി സമര്‍പ്പിച്ചിരുന്നു. ഇത് പരിഗണിച്ചാണ് കോടതിയുടെ നടപടി.

കുഞ്ഞിനെ രക്ഷിതാക്കള്‍ ഉപേക്ഷിച്ചതാണോ അതോ മനപൂര്‍വ്വം വിട്ടു നല്‍കിയതാണോ എന്ന തര്‍ക്കം നിലനില്‍ക്കുന്നുണ്ടെന്നും ഇക്കാര്യത്തില്‍ സര്‍ക്കാര്‍ അന്വേഷണം പ്രഖ്യാപിച്ചിട്ടുണ്ടെന്നും സര്‍ക്കാര്‍ അഭിഭാഷകന്‍ കോടതിയെ അറിയിച്ചിരുന്നു. തുടര്‍ന്ന് ഇക്കാര്യങ്ങളില്‍ വ്യക്തത വേണമെന്ന് കോടതി നിരീക്ഷിക്കുകയും ചെയ്തു. ഡി.എന്‍.എ പരിശോധന നടത്തേണ്ടി വരുമെന്നും കോടതി വാക്കാല്‍ പറഞ്ഞിരുന്നു.

അതേസമയം, കോടതി വിധിയില്‍ സന്തോഷമുണ്ടെന്ന് അറിയിച്ച അനുപമയും അജിത്തും ദത്തെടുത്ത മാതാപിതാക്കളെ ഓര്‍ത്ത് സങ്കടമുണ്ടെന്ന് അറിയിച്ചു. മാത്രമല്ല നിയമലംഘനം നടത്തിയവര്‍ക്കെതിരെ നടപടി സ്വീകരിക്കണമെന്നും ആവര്‍ത്തിച്ചു.

ഒക്ടോബര്‍ 26: ദത്ത് വിവാദം സഭയില്‍
ദത്തെടുക്കല്‍ വിവാദം നിയമസഭയില്‍ ചര്‍ച്ചാ വിഷയമായതോടെ ഭരണപക്ഷവും പ്രതിപക്ഷവും വാക്കുതര്‍ക്കമായി. ആര്‍.എം.പി നേതാവ് കെ.കെ രമയാണ് അടിയന്തര പ്രമേയ നോട്ടീസ് നല്‍കിയത്. പാല്‍ മണം മാറാത്ത കുഞ്ഞിനെ മാറ്റിയ ഹീനമായ കുറ്റകൃത്യത്തിന് സര്‍ക്കാരും ശിശുക്ഷേമ സമിതിയും കൂട്ടുനിന്നുവെന്നാണ് രമ സഭയില്‍ പറഞ്ഞത്.

എന്നാല്‍ ദത്ത് നല്‍കിയത് നിയമപരമായിട്ടാണെന്നും വളര്‍ത്താന്‍ തയാറാണെങ്കില്‍ കുഞ്ഞ് അമ്മയ്‌ക്കൊപ്പം തന്നെ വേണമെന്നാണ് സര്‍ക്കാര്‍ നിലപാടെന്നും മന്ത്രി വീണാ ജോര്‍ജ് നിയമസഭയില്‍ പറഞ്ഞു. പക്ഷേ അനുപമയുടെ പിതാവ് കുഞ്ഞിനെ അമ്മത്തൊട്ടിലില്‍ ഉപേക്ഷിച്ചെന്ന ആരോപണത്തിന് കൃത്യമായ മറുപടി മന്ത്രി പറഞ്ഞില്ല.

അതേസമയം ദുരഭിമാനം കൊണ്ട് ചെയ്ത കുറ്റകൃത്യത്തിന് പുരോഗമന ഇടതുപക്ഷം കുട്ടുനില്‍ക്കുകയാണോ എന്നായിരുന്നു പ്രതിപക്ഷം ചോദിച്ചത്. അതിനിടെ കുറ്റക്കാരെ സര്‍ക്കാര്‍ സംരക്ഷിക്കുകയാണെന്ന് ആരോപിച്ച് നിയമസഭാ മന്ദിരത്തിന് മുന്നില്‍ യൂത്ത് കോണ്‍ഗ്രസ് പ്രവര്‍ത്തകര്‍ അപ്രതീക്ഷിത പ്രതിഷേധം നടത്തി.

ഒക്ടോബര്‍ 27
ഒക്ടോബര്‍ 27 ന് അനുപമയുടെയും അജിത്തിന്റെയും മൊഴി ശിശുവികസന ഡയറക്ടര്‍ ടി.വി അനുപമ രേഖപ്പെടുത്തി. കുഞ്ഞിനെ കുറിച്ചും ദത്തെടുക്കല്‍ വിവാദങ്ങളെ കുറിച്ചും ഏകദേശം അഞ്ചര മണിക്കൂറോളം ചോദിച്ചറിഞ്ഞിരുന്നു. ശിശുക്ഷേമസമിതിക്കും സി.ഡബ്ല്യു.സിയ്ക്കും എതിരായ തെളിവുകള്‍ ഹാജരാക്കിയെന്നും അന്വേഷണത്തില്‍ പ്രതീക്ഷയുണ്ടെന്നും മൊഴി നല്‍കിയതിന് പിന്നാലെ കുഞ്ഞിന്റെ അമ്മയായ അനുപമ പറഞ്ഞു.

നവംബര്‍ 1
ദത്ത് നല്‍കിയ കുഞ്ഞിനെ ഹാജറാക്കാന്‍ തിരുവനന്തപുരം പൊലീസ് കമ്മിഷണര്‍ക്ക് നിര്‍ദേശം നല്‍കണമെന്ന് ആവശ്യപ്പെട്ട് ഹൈക്കോടതിയില്‍ അനുപമ ഹേബിയസ് കോര്‍പ്പസ് ഹര്‍ജി നല്‍കി.

അതേസമയം, ആവശ്യമെങ്കില്‍ ഡി.എന്‍.എ ടെസ്റ്റ് നടത്താമെന്ന് കുടുംബക്കോടതി വീണ്ടും ആവര്‍ത്തിച്ചു. കേസില്‍ സര്‍ക്കിരിന്റെ സമയോചിതമായ ഇടപെട്ടതിനെ കോടതി പ്രശംസിച്ചു. എന്നാല്‍, ദത്തു ലൈസന്‍സ് പുതുക്കാത്ത ശിശുക്ഷേമ സമിതിയുടെ നടപടിയെ കോടതി രൂക്ഷമായി വിമര്‍ശിച്ചു.

നവംബര്‍ 2
നിലവിലെ സാഹചര്യത്തില്‍ കുഞ്ഞ് നിയമ വിരുദ്ധ കസ്റ്റഡിയിലെന്ന് പറയാനാകില്ലെന്ന് ചൂണ്ടിക്കാട്ടി അനുപമ നല്‍കിയ ഹേബിയസ് കോര്‍പ്പസ് ഹര്‍ജി ഹൈക്കോടതി തള്ളി. മാത്രമല്ല, കുടുംബകോടതി ഈ വിഷയത്തില്‍ നടപടികള്‍ സ്വീകരിക്കുന്നുണ്ടെന്നും ഹൈക്കോടതി ഇടപെടേണ്ട കാര്യം ഇപ്പോള്‍ ഇല്ലെന്നും കോടതി തുറന്നടിച്ചു.

അതേസമയം, കേസില്‍ കുറ്റാരോപിതരായ അനുപമയുടെ അമ്മയും സഹോദരിയും ഉള്‍പ്പടെ 5 പേര്‍ക്ക് ഉപാധികളോടെ മുന്‍കൂര്‍ ജാമ്യം അനുവദിച്ചു.

നവംബര്‍ 15
പ്രതിപ്പട്ടികയില്‍ ഉള്ള അനുപമയുടെ പിതാവ് പി.എസ് ജയചന്ദ്രന്‍ തിരുവനന്തപുരം അഡി.സെഷന്‍സ് കോടതിയില്‍ മുന്‍കൂര്‍ ജാമ്യാപേക്ഷ നല്‍കുകയും ജാമ്യാപേക്ഷ കോടതി സ്വീകരിക്കുകയും ചെയ്തു. നവംബര്‍ 18ന് മുന്‍കൂര്‍ ജാമ്യാപേക്ഷ പരിഗണിക്കും. കേസിലെ ഒന്നാം പ്രതിയാണ് അനുപമയുടെ പിതാവ് പി.എസ്.ജയചന്ദ്രന്‍.

നവംബര്‍ 18
ആന്ധ്രയിലുള്ള ദമ്പതികള്‍ക്ക് കൈമാറിയ കുഞ്ഞിനെ കേരളത്തിലെത്തിക്കാന്‍ ചൈല്‍ഡ് വെല്‍ഫെയര്‍ കമ്മിറ്റി ശിശുക്ഷേമ സമിതിയോട് ഉത്തരവിട്ടു. അഞ്ച് ദിവസത്തെ സമയമാണ് ശിശുക്ഷേമ സമിതിക്ക് നല്‍കിയിരിക്കുന്നത്. കേരളത്തിലെത്തിക്കുന്ന കുഞ്ഞിന്‍റെ ഡി.എന്‍.എ പരിശോധന നടത്താനും ഉത്തരവിട്ടിട്ടുണ്ട്. ഫലം വരുന്നതുവരെ കുഞ്ഞ് സര്‍ക്കാരിന്റെ സംരക്ഷണത്തിലായിരിക്കും കഴിയുക. ചൈല്‍ഡ് വെല്‍ഫെയര്‍ കമ്മിറ്റിയുടെ ഉത്തരവില്‍ സന്തോഷമുണ്ടെന്നും കുറ്റക്കാര്‍ക്കെതിരെ നടപടിയെടുക്കുന്നത് വരെ സമരം തുടരുമെന്നും അനുപമ മാധ്യമങ്ങളെ അറിയിച്ചു.