പ്രാര്‍ഥനയ്ക്കിടെ ഉറങ്ങിപ്പോയി, അനാഥാലയത്തില്‍ വയോധികയ്ക്ക് ചൂരല്‍ കൊണ്ട് അടി; കേസ്

കൊല്ലം: പ്രാര്‍ഥനയ്ക്കിടെ ഉറങ്ങിപ്പോയതിന് വയോധികയെ ചൂരല്‍ കൊണ്ട് അടിച്ച അനാഥാലയ നടത്തിപ്പുകാരനെതിരെ പോലീസ് കേസെടുത്തു. കൊല്ലം ജില്ലയിലെ അഞ്ചല്‍ അര്‍പ്പിത സ്‌നേഹാലയം നടത്തിപ്പുകാരനായ അഡ്വ. സജീവനെതിരെയാണ് പോലീസ് കേസെടുത്തത്. ഇയാള്‍ അനാഥാലയത്തിലെ അന്തേവാസികളെ ചൂരല്‍ കൊണ്ട് അടിക്കുന്ന ദൃശ്യങ്ങള്‍ കഴിഞ്ഞ ദിവസം പുറത്തുവന്നിരുന്നു.

Also Read:

കഴിഞ്ഞ ഓഗസ്റ്റ് മാസമാണ് കേസിനാസ്പദമായ സംഭവം. സ്ഥാപനത്തിലെ മുന്‍ ജീവനക്കാരനായ ജസ്റ്റിന്‍ സലീമാണ് വീഡിയോ ദൃശ്യങ്ങള്‍ പുറത്തുവിട്ടത്. ഈ ദൃശ്യങ്ങള്‍ ഉള്‍പ്പെടെ ഡിജിപി ഉള്‍പ്പെടെയുള്ളവര്‍ക്കും പരാതി നല്‍കിയിരുന്നു. തുടര്‍ന്നാണ് പോലീസ് കേസെടുത്തത്.

പ്രാര്‍ഥനയ്ക്കിടെ ഉറങ്ങിപ്പോയെന്ന് പറഞ്ഞാണ് സജീവന്‍ ചൂരല്‍ വടി ഉപയോഗിച്ച് വയോധികയെ അടിച്ചത്. മറ്റ് അന്തേവാസികളോട് കയര്‍ത്ത് സംസാരിക്കുന്നതായും വീഡിയോയില്‍ വ്യക്തമാണ്. 20 ലധികം അന്തേവാസികള്‍ സ്‌നേഹാലയത്തില്‍ ഉണ്ട്. മര്‍ദനമേറ്റ സ്ത്രീയുടെ മൊഴിയെടുത്തെന്ന് പോലീസ് പറഞ്ഞു.

Also Read:

എന്നാല്‍, താന്‍ വയോധികയെ മര്‍ദിച്ചിട്ടില്ലെന്നാണ് സജീവന്റെ പ്രതികരണം. താന്‍ അടിച്ചത് കസേരയിലാണെന്നും ജസ്റ്റിന്‍ സലീമിനെ സ്ഥാപനത്തില്‍ നിന്ന് പുറത്താക്കിയതാണ് പരാതി നല്‍കാന്‍ കാരണമെന്നും സജീവന്‍ പറഞ്ഞു. വീഡിയോ വ്യാപകമായി പ്രചരിച്ചതോടെ ദൃശ്യങ്ങള്‍ എഡിറ്റ് ചെയ്ത് പ്രചരിപ്പിച്ചതാണെന്ന വാദവും സ്ഥാപനത്തിന്റെ അധികൃതര്‍ പറയുന്നു.