വിദ്യാർത്ഥി സ്വമേധയാ തന്റെ കാലിൽ വീഴുകയായിരുന്നുവെന്നാണ് ഡോ കെ രമ പറയുന്നത്. ആരോപണം തെറ്റാണെന്ന് രമ വ്യക്തമാക്കി. മാസ്ക് ഇടാതെ വന്നത് ചോദ്യം ചെയ്തപ്പോൾ വിദ്യാർത്ഥി അടിക്കാൻ ശ്രമിച്ചെന്നും ഇതു സംബന്ധിച്ച് കേസ് നൽകരുതെന്ന് ആവശ്യപ്പെട്ട് വിദ്യാർത്ഥി സ്വമേധയാ കാലിൽ വീഴുകയായിരുന്നുവെന്നും പ്രിൻസിപ്പാൾ പറയുന്നു. എംഎസ്എഫ് പ്രവർത്തകരുടെ ഭാഗത്തു നിന്നും നിരന്തരം ഭീഷണിയുള്ളതായാണ് രമ ആരോപിക്കുന്നത്.
വിഷയത്തിൽ എംഎസ്എഫ് സംസ്ഥാന പ്രസിഡന്റ് പികെ നവാസ് പ്രിൻസിപ്പാളിനെതിരെ രംഗത്തെത്തിയിട്ടുണ്ട്. അടിമ സമ്പ്രദായ മനോഭാവം പുലർത്തുന്ന അധ്യാപകർ കേരളത്തിന്റെ പൊതുവിദ്യാഭ്യാസ മേഖലയിൽ പ്രവർത്തിക്കുന്നത് നോക്കി നിൽക്കാനാവുന്നതല്ലെന്ന് നവാസ് പറഞ്ഞു.
“ഇത്തരം വരേണ്യ ചിന്താഗതി തലയിലേറ്റി നടക്കുന്ന അധ്യാപികക്ക് ഒരു നല്ല സമൂഹത്തെ വളർത്താൻ കഴിയില്ല. തികഞ്ഞ വിവേചനവും, വിദ്വേഷവുമാണ് പ്രിൻസിപ്പൽ തന്റെ വിദ്യാർത്ഥികളോട് പുലർത്തുന്നത്. ഈ അനീതിയോട് സന്ധി ചെയ്യാനാകില്ല. ഇതുമാത്രമല്ല തന്റെ കോളേജിൽ പഠിക്കുന്ന തട്ടവും, പർദ്ദയും ധരിച്ച പെൺകുട്ടികൾ കഞ്ചാവ് വില്പ്പന ചെയ്യുന്നു എന്നാണ് പറയുന്നത്. അപനിർമ്മിതി കൊണ്ട് അപരവത്കരണം നടക്കുന്ന കാലത്ത് തീയിൽ എണ്ണ ഒഴിക്കുന്ന വർഗ്ഗീയ വിദ്വേഷമാണ് പ്രിൻസിപ്പലിന്റെ നാവിൽ നിന്ന് വന്നിരിക്കുന്നത്.” നവാസ് ആരോപിച്ചു.
“ഏതെങ്കിലും വിദ്യാർഥികൾ നിയമവിരുദ്ധമായ എന്തെങ്കിലും പ്രവർത്തികൾ ചെയ്യുന്നുണ്ടങ്കിൽ രാജ്യത്തെ നിയമസംവിധാനങ്ങളെ സമീപിക്കേണ്ടതിന് പകരം ഒരു സമൂഹത്തെ അവഹേളിക്കുന്ന വർഗ്ഗീയതക്ക് കൂട്ടുനിൽക്കരുത്. മാരാർജി ഭവനിൽ നിന്നല്ല പ്രിൻസിപ്പൽ ശമ്പളം പറ്റുന്നത്. കേരളത്തിലെ ജനങ്ങളുടെ ജനാധിപത്യ സംവിധാനം സംഭരിച്ച നികുതി വരുമാനത്തിൽ നിന്നാണ്.” ഫേസ്ബുക്ക് പോസ്റ്റിൽ നവാസ് പറഞ്ഞു.
അടിയന്തരമായി പ്രിൻസിപ്പാളിനെ പുറത്താക്കണമെന്നും അന്വേഷണം നടത്തണമെന്നും എംഎസ്എഫ് ആവശ്യപ്പെട്ടു. വിദ്യാർത്ഥി സ്വമേധയാ കാലുപിടിച്ചതാണെന്ന് അവകാശപ്പെടുന്ന പ്രിൻസിപ്പാൾ കോളേജിലെ സിസിടിവി ദൃശ്യങ്ങൾ പുറത്തുവിടണമെന്നും എംഎസ്എഫ് സംസ്ഥാന പ്രസിഡന്റ് ആവശ്യപ്പെട്ടു.
