വീട്ടമ്മയെ നായ്ക്കൾ ആക്രമിച്ച കേസിൽ റോഷനെതിരെ പോലീസ് കേസെടുത്തിരുന്നു. നായ്ക്കളുടെ കടിയേറ്റ വീട്ടമ്മ ചികിത്സയിലാണ്. താമരശേരി അമ്പായത്തോട്ടിലായിരുന്നു സംഭവം. വെഴുപ്പൂ‍ര്‍ എസ്റ്റേറ്റ് ഉടമ ജോളി തോമസിന്റെ ചെറുമകൻ റോഷന്റെ വള‍ര്‍ത്തു നായയാണ് ദേശീയ പാതയിൽ വെച്ച് ഫൗസിയയെ ആക്രമിച്ചത്.
സ്ഥലത്ത് ഓടിക്കൂടിയ നാട്ടുകാരാണ് ഫൗസിയയെ നായ്ക്കളിൽ നിന്നും രക്ഷിച്ച് ആശുപത്രിയിൽ എത്തിച്ചത്. ആളുകൾ ഒച്ചവെച്ചിട്ടും നായ്ക്കൾ ആക്രമണത്തിൽ നിന്നും പിന്തിരിഞ്ഞിരുന്നില്ല. മദ്രസയിൽ പോയ കുട്ടികളെ കൂട്ടാൻ എത്തിയതായിരുന്നു യുവതി. ഫൗസിയയെ റോഡിൽ വീഴ്ത്തിയ ശേഷം നായ്ക്കൾ ഫൗസിയയുടെ ശരീരത്തിലാകെ കടിക്കുകയായിരുന്നു.
ഏതാനും ദിവസം മുമ്പ് അനാഥനായ പ്രഭാകരൻ എന്നയാളെ നായ്ക്കൾ ആക്രമിച്ചിരുന്നു. മെഡിക്കൽ കോളേജിലാണ് പ്രഭാകരൻ ചികിത്സ തേടിയത്. മുമ്പും നായ്ക്കൾ പലരേയും ആക്രമിച്ചിട്ടുണ്ടെന്നാണ് നാട്ടുകാ‍ര്‍ പറയുന്നത്. എന്നാൽ ഉടമ അശ്രദ്ധമായി നായ്ക്കളെ തുറന്നുവിടുകയായിരുന്നുവെന്ന് നാട്ടുകാ‍ര്‍ പരാതിപ്പെടുന്നു. നായയുടെ ഉടമയ്ക്കെതിരെ പ്രതിഷേധം ശക്തമായതിനെത്തുട‍ര്‍ന്ന് പോലീസ് സ്ഥലത്തെത്തിയിരുന്നു- ഏഷ്യാനെറ്റ് റിപ്പോ‍ര്‍ട്ട് ചെയ്തു.
