‘മയിലിനെ ആരെങ്കിലും കറി വെയ്ക്കുമോ? മനുഷ്യന്‍ ആരെങ്കിലും ചെയ്യുമോ? ഇത്ര ഭംഗിയുള്ള ഒരു പക്ഷിയാണിത്. നമ്മള്‍ ഒരിക്കലും ചെയ്യില്ല. ഈ പരിപാടി നമ്മള്‍ ഇവിടെ അവസാനിപ്പിക്കുന്നു. പകരം കോഴിക്കറി വയ്ക്കുന്നു’, ഫിറോസ് വീഡിയോയില്‍ പറയുന്നു.
താന്‍ ഒരിക്കലും മയിലിനെ കറി വെയ്ക്കാന്‍ തീരുമാനിച്ചിട്ടില്ലെന്നും താന്‍ പറഞ്ഞതില്‍ ആര്‍ക്കെങ്കിലും വിഷമം തോന്നിയെങ്കില്‍ ക്ഷമിക്കണമെന്നും ഫിറോസ് വീഡിയോയിലൂടെ പറഞ്ഞു. വാങ്ങിയ മയിലിനെ ഒരു പാലസിന് സമ്മാനിക്കുകയാണെന്നും ഫിറോസ് പറഞ്ഞു. ‘ഒരിക്കലും ഞാന്‍ മയിലിനെ കറി വെയ്ക്കില്ല. കാരണം, ഇത് ദേശീയമൃഗമാണ്. കഴിക്കാനുള്ള സാധനമല്ല. ഇത്രയും ക്യൂട്ടായ പക്ഷിയെ ആര്‍ക്കാണ് ഭക്ഷിക്കാന്‍ സാധിക്കുക. അത്രയും മോശക്കാരല്ല ഞങ്ങള്‍. ആരും മയിലിനെ കൊല്ലാന്‍ പാടില്ല. മോശമാണ്. ഇതിനെ ആരും ഉപദ്രവിക്കില്ല. തൊടാന്‍ സാധിച്ചത് തന്നെ ഭാഗ്യമാണ്. 20,000 രൂപ കൊടുത്താണ് ഈ മയിലിനെ വാങ്ങിയത്. ഇത് ഒരു പാലസിന് ഗിഫ്റ്റ് കൊടുക്കാനാണ് തീരുമാനം’, ഫിറോസ് വീഡിയോയിലൂടെ പങ്കുവെച്ചു.
മയിലിനെ കറിവെയ്ക്കാനായി ദുബായിലേക്ക് പോകുന്നതിന്റെയും ദുബായിലെത്തി മയിലിന് വില പറഞ്ഞ് വാങ്ങാന്‍ തീരുമാനിക്കുന്നതിന്റെയും വീഡിയോ ഫിറോസ് സോഷ്യല്‍ മീഡിയയില്‍ വിവാദം സൃഷ്ടിച്ചിരുന്നു. ഇദ്ദേഹത്തിനെതിരെ അനുകൂലിച്ചും പ്രതികൂലിച്ചും നിരവധി പേരാണ് രംഗത്തെത്തിയത്. പിന്നാലെ ഫിറോസ് മയിലിന് പകരം കോഴിക്കറി വെയ്ക്കുന്ന വീഡിയോ പങ്കുവെച്ചു. ഇന്ത്യയില്‍ ദേശീയ പക്ഷിയായ മയിലിനെ കൊല്ലുന്നത് കുറ്റകരമാണ്.
പാലക്കാട് എലപ്പുള്ളിക്കടുത്ത ചുട്ടിപ്പാറ സ്വദേശിയാണ് യൂട്യൂബറായ ഫിറോസ്. ഗ്രാമീണ തനിമയില്‍ പാചകം ചെയ്ത് പ്രേക്ഷകര്‍ക്ക് മുമ്പില്‍ വിളമ്പുന്ന വീഡിയോകളുമായാണ് അദ്ദേഹം സോഷ്യല്‍ മീഡിയയില്‍ വരാറുള്ളത്.
