കഴിഞ്ഞദിവസത്തെ സമരത്തിൽ ഉയർത്തിയ അതേ ആവശ്യം തന്നെയാണ് ടി ഡി എഫ് മുന്നോട്ട് വെയ്ക്കുന്നത്. ശമ്പള പരിഷ്കരണം, ശമ്പളവും പെൻഷനും മുടങ്ങാതെ നൽകുക എന്നിവയാണ് പ്രധാന ആവശ്യങ്ങൾ. സംയുക്ത തൊഴിലാളി യൂണിയൻ നേരത്തെ ഇതേ ആവശ്യം ഉയർത്തി സമരം നടത്തിയിരുന്നെങ്കിലും സർക്കാരിന്‍റെ ഭാഗത്ത് നിന്ന് ഒരുറപ്പും ലഭിച്ചിട്ടില്ലെന്ന് ടി ഡി എഫ് ആരോപിക്കുന്നു.
Also Read :
നേരത്തെ നടത്തിയത് സൂചനാ പണിമുടക്കായിരുന്നു ഉറപ്പുകൾ പാലിക്കപ്പെടാത്തതിനാലാണ് വീണ്ടും സമരമെന്നും ടി ഡി എഫ് പറയുന്നു. കഴിഞ്ഞ മാസത്തെ ശമ്പളം ഇതുവരെ ലഭിച്ചിട്ടില്ലെന്നും ഈ മാസം 15 മുതൽ ചീഫ് ഓഫീസിന് മുന്നിൽ അനിശ്ചിതകാല സമരം ആരംഭിക്കുമെന്നും നേതാക്കൾ കൂട്ടിച്ചേർത്തു.
അതേസമയം ശബരിമല മണ്ഡല- മകരവിളക്ക് തീര്‍ഥാടന കാലത്ത് തീര്‍ഥാടകര്‍ക്ക് ആവശ്യമായ ബസ് സര്‍വീസുകള്‍ ഉറപ്പാക്കാന്‍ നടപടി സ്വീകരിച്ചിട്ടുണ്ടെന്ന് ഗതാഗത മന്ത്രി ആന്‍റണി രാജു അറിയിച്ചു. ശബരിമല തീര്‍ഥാടനവുമായി ബന്ധപ്പെട്ട് വിവിധ വകുപ്പുകളുടെ അവലോകന യോഗം പമ്പയില്‍ ചേർന്നതായും അദ്ദേഹം വ്യക്തമാക്കി.
പമ്പയിലേക്ക് 231 കെ എസ് ആര്‍ ടി സി ബസുകളാണ് പൂള്‍ ചെയ്തിരിക്കുന്നത്. ഇതില്‍ നിലയ്ക്കല്‍ – പമ്പ ചെയിന്‍ സര്‍വീസിന് മാത്രം 120 ബസുകള്‍ ഉണ്ടാകും. 80 നോണ്‍ എ സി ബസുകളും 40 എ സി വോള്‍വോ ബസുകളും ഉള്‍പ്പെടുന്നതാണ് ചെയിന്‍ സര്‍വീസ്. ഓരോ പത്ത് മിനിട്ടിലും ചെയിന്‍ സര്‍വീസ് ഉണ്ടാകും. പഴയ നിരക്ക് തന്നെയാകും ഇത്തവണയും ഈടാക്കുന്നത്. എ സിക്ക് 80 രൂപയും നോണ്‍ എ സി ബസിന് 50 രൂപയുമായിരിക്കും നിരക്ക്. 450 ജീവനക്കാർ സജ്ജരാണ്. 15 മുതല്‍തന്നെ ബസുകള്‍ പൂര്‍ണതോതില്‍ സര്‍വീസ് നടത്തുന്നതിനുള്ള പ്രവര്‍ത്തനമാണ് നടക്കുന്നത്. എത്ര ബസ് ആവശ്യമായി വന്നാലും ലഭ്യമാക്കുന്നതിന് നടപടി സ്വീകരിച്ചിട്ടുണ്ട്.
പത്തനംതിട്ട, ചെങ്ങന്നൂര്‍, കോട്ടയം, എറണാകുളം, കൊട്ടാരക്കര, തിരുവനന്തപുരം, കുമളി, എരുമേലി എന്നീ സ്‌പെഷല്‍ സെന്‍ററുകളില്‍ കൂടുതല്‍ ബസുകള്‍ പൂള്‍ ചെയ്തിട്ടുണ്ട്. ശബരിമലയിലേക്ക് മറ്റ് ഡിപ്പോകളില്‍ നിന്ന് കൂടുതല്‍ ബസുകള്‍ ആവശ്യപ്പെട്ടാല്‍ സ്‌പെഷല്‍ സെന്‍ററുകളില്‍ നിന്ന് ആവശ്യമായ ബസുകള്‍ ലഭ്യമാക്കുന്നതിനുള്ള സംവിധാനം ഒരുക്കിയിട്ടുണ്ട്.
Also Read :
കൊവിഡ് കാലത്തിന് മുന്‍പത്തെ പോലെ തീര്‍ഥാടകരുടെ വരവ് കണക്കിലെടുത്തുള്ള ക്രമീകരണങ്ങളാണ് ഇത്തവണ കെ എസ് ആര്‍ ടി സി ഒരുക്കുന്നത്. സുരക്ഷിത തീര്‍ഥാടനം ഉറപ്പാക്കാന്‍ ഗതാഗത വകുപ്പിന്‍റെ നേതൃത്വത്തില്‍ സെയ്ഫ് സോണ്‍ പദ്ധതി ആരംഭിച്ചിട്ടുണ്ട്. കെ എസ് ആര്‍ ടി സി സര്‍വീസുമായി ബന്ധപ്പെട്ട് തീര്‍ഥാടകര്‍ക്കായി വിവിധ ഭാഷകളിലുള്ള ബോര്‍ഡുകള്ളും സജ്ജമാക്കുമെന്നും ഗതാഗത മന്ത്രി അറിയിച്ചു.
