വകുപ്പ് മന്ത്രിയും അധ്യാപികയുമായ ഡോ. ആര്‍ ബിന്ദു ഉത്തരവിൻ്റെ പകര്‍പ്പ് ഔദ്യോഗിക ഫേസ്ബുക്ക് പോസ്റ്റിൽ പങ്കുവെച്ചിട്ടുണ്ട്. സംസ്ഥാനത്തെ ചില ഉന്നതവിദ്യാഭ്യാസ സ്ഥാപനങ്ങള്‍ അധ്യാപകരുടെ വസ്ത്രധാരണത്തിൽ ചില നിര്‍ബന്ധങ്ങളും നിബന്ധനകളും അടിച്ചേൽപ്പിക്കുന്നുണ്ടെന്നും ഇതു സംബന്ധിച്ച് ലഭിച്ച നിരവധി പരാതികളുടെ അടിസ്ഥാനത്തിലാണ് ഉത്തരവ് പുറത്തിറക്കുന്നതെന്നും ഉത്തരവിൽ വ്യക്തമാക്കിയിട്ടുണ്ട്.
“ഇക്കാര്യത്തിൽ സർക്കാരിൻ്റെ നിലപാട് പല ആവർത്തി വ്യക്തമാക്കിയിട്ടുള്ളതാണ്. കേരളത്തിലെ വിദ്യാഭ്യാസ സ്ഥാപനങ്ങളിൽ ഒക്കെത്തന്നെ അധ്യാപകർക്ക് ഇഷ്ടമുള്ള, അവർക്ക് സൗകര്യപ്രദമായ വസ്ത്രം ധരിക്കാനുള്ള എല്ലാ അവകാശവുമുണ്ട്. സാരി അടിച്ചേൽപ്പിക്കുന്ന രീതി കേരളത്തിൻ്റെ പുരോഗമന ചിന്താഗതിക്ക് ഉതകുന്നതല്ല.” മന്ത്രി ഫേസ്ബുക്ക് പോസ്റ്റിൽ കുറിച്ചു.
Also Read:
അധ്യാപികമാര്‍ സാരി ധരിച്ച് എത്തണമെന്ന ഒരു നിയമവും നിലവിലില്ലെന്നും എന്നാൽ പല തവണ ആവര്‍ത്തിച്ചിട്ടും ചില സ്ഥാപനമേധാവികളും മാനേജ്മെൻ്റുകളും സാരി അടിച്ചേൽപ്പിക്കുകയാണെന്നും ഉത്തരവിൽ പറയുന്നു. ഉന്നതവിദ്യാഭ്യാസ വകുപ്പ് ജോയിൻ്റ് സെക്രട്ടറിയാണ് ഉത്തരവ് പുറത്തിറക്കിയത്.
Also Read:
വസ്ത്രധാരണരീതി ഒരാളുടെ വ്യക്തിപരമായ കാര്യമാണെന്നും ഇതിൽ അകാരണമായി ആര്‍ക്കും ഇടപെടാൻ അവകാശമില്ലെന്നും മന്ത്രി വ്യക്തമാക്കി. 2014 മെയിൽ തന്നെ ഇത് വ്യക്തമാക്കി ഉത്തരവ് പുറപ്പെടുവിച്ചിരുന്നുവെന്നും എന്നാൽ ചില സ്ഥാപനങ്ങളിൽ തെറ്റായ കീഴ്‍‍വഴക്കം തുടരുന്ന സാഹചര്യത്തിലാണ് വീണ്ടും ഉത്തരവിറക്കുന്നതെന്നും മന്ത്രി പറഞ്ഞു. കഴിഞ്ഞ ദിവസം കൊടുങ്ങല്ലൂരിലെ ഒരു കോളേജിൽ നിന്ന് യുവ അധ്യാപിക ഇതു സംബന്ധിച്ച് തനിക്ക് പരാതി നല്‍കിയിരുന്നുവെന്നും മന്ത്രി ചൂണ്ടിക്കാട്ടി. സ്ഥാപനത്തിൽ ജോലി ചെയ്യണമെങ്കിൽ എല്ലാ ദിവസവും സാരി ധരിച്ചു വരണമെന്നായിരുന്നു നിബന്ധന. എന്നാൽ സാരി അടിച്ചേൽപ്പിക്കുന്ന രീതി പരിഷ്കൃത സമൂഹത്തിന് യോജിച്ചതല്ലെന്നും ഇക്കാര്യത്തിൽ സര്‍ക്കാര്‍ നിലപാട് വ്യക്തമാണെന്നും മന്ത്രി പറഞ്ഞു.
Also Read:
താൻ കേരള വർമ കോളേജിൽ പഠിപ്പിച്ചിരുന്ന സമയത്ത് നിരന്തരം ചുരിദാർ ധരിച്ച് പോകുമായിരുന്നുവെന്ന് ആര്‍ ബിന്ദു പറഞ്ഞു. “ഒരു അധ്യാപികയ്ക്ക് നൂറായിരം കർത്തവ്യങ്ങൾ വഹിക്കേണ്ടതായുണ്ട്. പക്ഷേ അസ്ഥാനത്തുള്ള കാലഹരണപ്പെട്ട ആശയങ്ങളെ മുറുക്കിപ്പിടിച്ച് ജീവിക്കേണ്ട ഒരു സാഹചര്യം ഒരിക്കലും ഈ പട്ടികയിൽ വരില്ല.” മന്ത്രി വ്യക്തമാക്കി.
