സിഗ്നൽവയര്‍ മുറിച്ചുമാറ്റി 13 വണ്ടികള്‍ പെരുവഴിയിൽ; മേലുദ്യോഗസ്ഥനോടുള്ള പക, രണ്ട് ജീവനക്കാര്‍ക്കെതിരെ നടപടി

കണ്ണൂര്‍: മേലുദ്യോഗസ്ഥനോടുള്ള പകയേത്തുടര്‍ന്ന് സിഗ്നൽ വയറുകള്‍ മുറിച്ചുമാറ്റിയ ജീവനക്കാര്‍ക്കെതിരെ നടപടിയുമായി റെയിൽവേ. സംഭവത്തിൽ കുറ്റാരോപിതരായ രണ്ട് സാങ്കേതിക ജീവനക്കാരെ റെയിൽവേ പിരിച്ചുവിടുകയായിരുന്നു.

Also Read :
കോഴിക്കോട് ഫറോക്ക് സ്റ്റേഷനിലെ ജോലിക്കാരായ കക്കോടി സ്വദേശി പ്രവീൺരാജ് സുൽത്താൻ ബത്തേരി കോട്ടൂർ ജിനേഷ് എന്നിവര്‍ക്കെതിരേയാണ് നടപടിയെടുത്തിരിക്കുന്നത്.

2021 മാര്‍ച്ച് മാസം 24നാണ് കേസിനാസ്പദമായ സംഭവമുണ്ടായത്. ഫറോക്കിനും വെള്ളയിലിനുമിടയിൽ റെയിൽവേ പാളത്തിൽ അഞ്ചിടത്താണ് ഇവര്‍ സിഗ്നൽബോക്സിലെ വയറുകള്‍ മുറിച്ചുമാറ്റിയത്. ഇതോടെ പച്ച സിഗ്നലിന് പകരം മഞ്ഞ സിഗിനലാക്കി വയ്ക്കുകയായിരുന്നു.

സിഗിനൽ സംവിധാനം തകരാറിലായതോടെ രണ്ട് മണിക്കൂര്‍ നീണ്ട അറ്റകുറ്റപ്പണിക്ക് ശേഷമാണ് സംവിധാനം ശരിയാക്കിയത്. തുടര്‍ന്ന്, നടത്തിയ അന്വേഷണത്തിൽ സാധാരണക്കാര്‍ക്ക് ഇത് ചെയ്യാൻ പറ്റില്ലെന്നും വിദഗ്ദ്ധ പരിശീലനം ലഭിച്ചവര്‍ക്ക് മാത്രമാണ് ഇത് മുറിച്ച് മാറ്റാൻ കഴിയു എന്നും സിആര്‍പിഎഫ് കണ്ടെത്തി.

Also Read :
സിഗ്നൽ തകരാറിലായതിന് പിന്നാലെ കോഴിക്കോട്, ഫറോക്ക്, വെള്ളയിൽ പരിധിയിൽ ചരക്കുവണ്ടികള്‍ ഉൾപ്പെടെ 13 ട്രെയിനുകള്‍ വൈകിയിരുന്നു. സിആര്‍പിഎഫ് നടത്തിയ അന്വേഷണത്തിൽ സാക്ഷിമൊഴികളും സിസിടിവി ദൃശ്യങ്ങളുടേയും അടിസ്ഥാനത്തിൽ പ്രതികള്‍ ഈ വിഭാഗത്തിലെ ആള്‍ക്കാര്‍ തന്നെയെന്ന് മനസ്സിലാക്കുകയായിരന്നു.

കോഴിക്കോട് സീനിയർ സെക്‌ഷൻ എൻജിനീയറോടുള്ള (സിഗ്‌നൽ) വിരോധം തീർക്കാനാണ് ഇത്തരത്തിൽ ഒരു കൃത്യം നടത്തിയത് എന്ന് പ്രതികള്‍ അന്വേഷണ ഉദ്യോഗസ്ഥരോട് കുറ്റസമ്മതം നടത്തിയിരുന്നു.

Also Read:

അതേസമയം, യാത്രക്കാരെ അപായപ്പെടുത്താൻ ശ്രമിച്ചുവെന്നും മനപ്പൂർവം സിഗ്നൽ സംവിധാനം കേട് വരുത്തിയെന്നുമാണ് ഇവർക്കെതിരായ കേസുകള്‍.

സാധാരണഗതിയിൽ ഇത്തരത്തിൽ വയറുകൾ മുറിച്ചാൽ സിഗ്‌നൽ പ്രവർത്തിക്കുന്നില്ലെന്നാണ് കാണുക. എന്നാൽ, നിലവിലെ സിഗ്‌നൽ തെറ്റായി ക്രമീകരിച്ചുവെച്ചതിനാൽ സ്റ്റേഷൻ അധികൃതർക്ക് മനസ്സിലാകില്ല. പച്ച സിഗ്‌നൽ കൊടുത്താലും സിഗ്‌നൽ മഞ്ഞയിൽത്തന്നെ തുടരും. ജാഗ്രതാ സൂചന കാണിക്കുന്ന സിഗ്‌നലാണ് മഞ്ഞ സിഗ്‌നൽ.