അട്ടപ്പാടി ടിവി: വാര്‍ത്തകള്‍ ഇരുള ഭാഷയില്‍; വായിക്കുന്നത് ബിന്ദു

അട്ടപ്പാടി ഷോളയൂര്‍ കുലുക്കൂര്‍ ആദിവാസി ഊരിലെ ബിന്ദു സന്തോഷിന്‍റെ ജീവിതത്തില്‍ നവംബര്‍ രണ്ടിന് വലിയ പ്രാധാന്യമുണ്ട്. അന്നാണ് ജീവിതത്തില്‍ ആദ്യമായി ബിന്ദു ചാനലില്‍ വാര്‍ത്ത വായിക്കുന്നത്.

”എല്ലാര്‍ക്കു കുമ്മുട്, നമ്ത്തൂര് സേതിക്കെ വായി, നാന്‍ ബിന്ദു, മുകിയമാന സേതിക” എന്ന് ഇരുള ഭാഷയില്‍ അഭിസംബോധന ചെയ്താണ് ബിന്ദു വാര്‍ത്തകളിലേക്ക് കടക്കുന്നത്. അട്ടപ്പാടി കേന്ദ്രമായി പ്രവര്‍ത്തിക്കുന്ന
അവതാരകയായ ബിന്ദു ഇരുള ആദിവാസി വിഭാഗത്തില്‍ ഉള്‍പ്പെട്ടയാളാണ്. ചാനലിലെ രണ്ടു ഇരുള അവതാരകരില്‍ ഒരാളും.

വാര്‍ത്ത അവതരിപ്പിക്കാന്‍ തുടങ്ങിയ ശേഷം ആദിവാസി സമൂഹത്തിന്‍റെ പിന്തുണ ലഭിച്ചതായി ബിന്ദു സന്തോഷ് സമയം പ്ലസ്സിനോട് പറഞ്ഞു. ”വഴിയില്‍ കാണുന്നവര്‍ പോലും തിരിച്ചറിയാന്‍ തുടങ്ങിയിരിക്കുന്നു. സ്വന്തം ഭാഷയിലെ വാര്‍ത്തകള്‍ കാണാന്‍ ആദിവാസികളും താല്‍പര്യം പ്രകടിപ്പിക്കുന്നു. ഊരു മൂപ്പനായ രംഗസ്വാമി മൂപ്പനും വാര്‍ഡ് മെമ്പറും പ്രശംസിച്ചു.”– ബിന്ദു പറയുന്നു.

ഇരുള ഭാഷക്ക് പ്രാധാന്യം ലഭിക്കുന്നത് ആദിവാസികളെ ശാക്തീകരിക്കുമെന്നാണ് ബിന്ദുവിന്‍റെ അഭിപ്രായം. ആദിവാസികളുടെ താല്‍പര്യവും ആവശ്യങ്ങളും പുറംലോകം അറിയാന്‍ ഇത് സഹായിക്കും. ആദിവാസി ജീവിതത്തെ കുറിച്ച് അറിയാത്തവരുടെ നയതീരുമാനങ്ങളാണ് അട്ടപ്പാടിയിലെ ശിശുമരണങ്ങള്‍ക്ക് പോലും കാരണം. കൂടുതല്‍ കുട്ടികളെ മാധ്യമമേഖലയിലേക്ക് കൊണ്ടുവരണമെന്നാണ് വാര്‍ഡ് മെമ്പര്‍ പറഞ്ഞതത്രെ.

ബിന്ദുവിന്‍റെ ഭര്‍ത്താവായ എറണാകുളം സ്വദേശി പി.വി സന്തോഷ്‌കുമാറും 18 വര്‍ഷമായി അട്ടപ്പാടിയിലുണ്ട്. കോണ്‍ഗ്രസ് ഷോളയൂര്‍ മണ്ഡലം പ്രസിഡന്‍റായിരുന്ന സന്തോഷ് കുമാറും വീട്ടില്‍ ഇരുള ഭാഷയിലാണ് സംസാരിക്കുകയെന്ന് ബിന്ദു പറയുന്നു.

”സന്തോഷേട്ടനും രണ്ടു മക്കളും വീട്ടില്‍ ഇരുള ഭാഷയിലാണ് സംസാരിക്കുന്നത്.”–ബിന്ദുവിന്റെ വാക്കുകള്‍.

അട്ടപ്പാടിയിലെ ജനങ്ങളില്‍ 80 ശതമാനം പേര്‍ക്കും ഇരുള ഭാഷ കേട്ടാല്‍ മനസിലാവുമെന്നാണ് ദീര്‍ഘകാലത്തെ രാഷ്ട്രീയ പ്രവര്‍ത്തന അനുഭവം വെച്ച് പി.വി സന്തോഷ്‌കുമാര്‍ പറയുന്നത്. ”കിഴക്കന്‍ അട്ടപ്പാടിയിലെ ഇരുളഭാഷയില്‍ തമിഴിനും പടിഞ്ഞാറന്‍ അട്ടപ്പാടിയില്‍ മലയാളത്തിനും സ്വാധീനമുണ്ട്. ഇരുള ഭാഷയില്‍ വാര്‍ത്ത അവതരിപ്പിക്കുന്നത് പുതിയ തലമുറക്ക് സ്വന്തം ഭാഷയോടുള്ള താല്‍പര്യം വര്‍ധിപ്പിക്കും. ഇത് ഗുണം ചെയ്യുമെന്ന് ഉറപ്പാണ്.’ — സന്തോഷ് കുമാര്‍ പ്രതീക്ഷയിലാണ്.

മലയാളം മീഡിയത്തില്‍ എസ്.എസ്.എല്‍.സി പഠിച്ച ബിന്ദു ആദ്യകാലത്ത് എസ്.ടി പ്രമോട്ടറായി ജോലി ചെയ്തിട്ടുണ്ട്. പിന്നീട് തൊഴിലുറപ്പ് പദ്ധതിയുടെയും ഭാഗമായി. ചാനലില്‍ വാര്‍ത്താ അവതാരകയുടെ ഒഴിവുണ്ടെന്ന പരസ്യം കണ്ടാണ് അപേക്ഷ നല്‍കിയത്. ”ടിക്ടോക്കില്‍ ചില വീഡിയോകള്‍ ചെയ്തിട്ടുണ്ടെന്നതു മാത്രമായിരുന്നു ബലം. ആദ്യ ദിവസം ഓഫീസില്‍ ചെന്നപ്പോള്‍ വലിയ ക്യാമറയും സംവിധാനങ്ങളും കണ്ടപ്പോള്‍ കൈയ്യുംകാലും വിറച്ചു. ചാനല്‍ എം.ഡിയായ ബേസില്‍ പി.ദാസിന്‍റെ പിന്തുണയാണ് വാര്‍ത്ത വായിക്കാന്‍ ആത്മവിശ്വാസം നല്‍കിയത്. അങ്ങനെയാണ് നവംബര്‍ രണ്ട് സംഭവിച്ചത്. ഇപ്പോള്‍ എനിക്ക് നല്ല ആത്മവിശ്വാസമുണ്ട്”– ബിന്ദു വിശദീകരിച്ചു.

ഭാഷയില്ലാതെ ഞങ്ങളുണ്ടാവുമോ?

അഗളി സര്‍ക്കാര്‍ ഹയര്‍ സെക്കന്‍ഡറി സ്‌കൂളില്‍ നിന്ന് തമിഴ് മീഡിയത്തില്‍ എസ്.എസ്.എല്‍.സി പാസായ കാരയൂര്‍ സ്വദേശിയായ വെള്ളിങ്കിരി വാര്‍ത്ത വായിക്കാന്‍ ചില കാരണങ്ങളുണ്ട്.

”ഇരുളയാണ് എന്‍റെ മാതൃഭാഷ. ഭാഷ നിലനിന്നാല്‍ മാത്രമേ സമുദായം നിലനില്‍ക്കൂ. മലയാളം ഇല്ലാതായാല്‍ മലയാളികളുണ്ടാവുമോ?. ഈ തത്വം എല്ലാ സമൂഹങ്ങള്‍ക്കും ബാധകമാണ്. ശമ്പളം നല്‍കിയില്ലെങ്കിലും വാര്‍ത്ത വായിക്കാന്‍ തയ്യാറാണെന്നാണ് എം.ഡി ബേസില്‍.പി.ദാസിനെ അറിയിച്ചിരിക്കുന്നത്.”– വെള്ളിങ്കിരി പറയുന്നു.

അട്ടപ്പാടിയില്‍ 2010ലുണ്ടായ ചാനല്‍ പ്ലസില്‍ വെള്ളിങ്കിരി വാര്‍ത്ത വായിച്ചിരുന്നു. മൂന്നു ആദിവാസി സ്ത്രീകളും അന്ന് അവതാരകരായുണ്ടായിരുന്നു. പക്ഷേ, സാമ്പത്തിക പ്രതിസന്ധി മൂലം രണ്ടുവര്‍ഷം കഴിഞ്ഞ് ചാനല്‍ പൂട്ടിപ്പോയി. 2021ല്‍ അട്ടപ്പാടി ടെലിവിഷന്‍ നിലവില്‍ വന്നതോടെ വെള്ളിങ്കിരിയും തിരിച്ചെത്തി.

ഇരുളഭാഷയില്‍ വാര്‍ത്ത വരാന്‍ തുടങ്ങിയതോടെ പുതിയ തലമുറയ്ക്ക് ഭാഷയോട് താല്‍പര്യം വര്‍ധിച്ചെന്നും വെള്ളിങ്കിരി നിരീക്ഷിക്കുന്നു.

”വാര്‍ത്ത അവതരിപ്പിക്കാന്‍ പഠിപ്പിക്കണമെന്നാവശ്യപ്പെട്ട് നിരവധി പേര്‍ വരുന്നു. മറ്റു ജില്ലകളില്‍ പഠിക്കാന്‍ പോയ കുട്ടികള്‍ പോലും മടങ്ങിവരുമ്പോള്‍ ഭാഷയെക്കുറിച്ച് ചോദിക്കുന്നു. നാം സംസാരിക്കുന്നതിന് മുമ്പ് കോയമ്പത്തൂരില്‍ നിന്ന് ഒരു ഫോണ്‍ വിളി വന്നിരുന്നു. യൂട്യൂബില്‍ വാര്‍ത്ത കണ്ടുവെന്ന് പറഞ്ഞാണ് അവര്‍ വിളിച്ചത്. എല്ലാ സഹായവും അവര്‍ വാഗ്ദാനം ചെയ്തു. ഇരുള ഭാഷയിലെ വാര്‍ത്താ അവതരണം സമുദായത്തില്‍ വലിയ ചലനമാണ് സൃഷ്ടിച്ചിരിക്കുന്നത്.”–വെള്ളിങ്കിരി വിശദീകരിച്ചു.

ആദിവാസി ഭാഷകളെ പ്രോല്‍സാഹിപ്പിക്കും

ഇസ്രായേല്‍ ജീവിതമാണ് ഭാഷയുടെ പ്രാധാന്യം തന്നെ പഠിപ്പിച്ചതെന്നാണ് ചാനല്‍ എം.ഡിയായ ബേസില്‍.പി.ദാസ് പറയുന്നത്. ഇരുള ഭാഷയെ പ്രോല്‍സാഹിപ്പിക്കാന്‍ വേണ്ടിയാണ് വാര്‍ത്തകള്‍ ഇരുള ഭാഷയിലും കൊണ്ടുവരാന്‍ തീരുമാനിച്ചത്. ഇപ്പോള്‍ കേബിളിലൂടെയും യൂട്യൂബിലൂടെയും ചാനല്‍ അട്ടപ്പാടിയിലെയും തമിഴ്‌നാട്ടിലെയും ഊരുകളിലെത്തുന്നു.

”745 ചതുരശ്ര കിലോമീറ്റര്‍ വിസ്തൃതിയുള്ള അട്ടപ്പാടിയിലെ അഗളി, പുതൂര്‍, ഷോളയൂര്‍ പഞ്ചായത്തുകളിലെ വാര്‍ത്തകള്‍ ചാനല്‍ കവര്‍ ചെയ്യുന്നുണ്ട്. അട്ടപ്പാടിയിലെ പൊതുപ്രശ്‌നങ്ങള്‍ക്ക് പുറമെ ആദിവാസി വിഷയങ്ങള്‍ക്കും പ്രാധാന്യം നല്‍കാനാണ് ഉദ്ദേശിക്കുന്നത്. കൂടാതെ ആരോഗ്യപരിപാലനം സംബന്ധിച്ച ഡോക്ടര്‍മാരുടെ ഷോകളും ഉദ്ദേശിക്കുന്നുണ്ട്.”– ബേസില്‍.പി.ദാസ് വിശദീകരിച്ചു.

അട്ടപ്പാടിയിലെ മൊത്തം ജനസംഖ്യ 71,000 ആണ്. ഇതില്‍ 33,000-34,000 പേര്‍ ആദിവാസികളാണ്. ഇരുളവിഭാഗത്തില്‍ ഉള്‍പ്പെട്ട 27,000 പേര്‍ അട്ടപ്പാടിയിലുണ്ടെന്നാണ് കണക്ക്. കൂടാതെ, തമിഴ്‌നാട്ടില്‍ ഏകദേശം 50,000ത്തോളം പേരുമുണ്ട്. കന്യാകുമാരി, ശ്രീലങ്ക എന്നിവിടങ്ങളിലും ഇരുളര്‍ ജീവിക്കുന്നു.

കൊവിഡ് കാലത്ത് സ്‌കൂളുകള്‍ പൂട്ടിയപ്പോള്‍ അട്ടപ്പാടിയിലെ 196 ഊരുകളിലെ കുട്ടികള്‍ വിദ്യഭ്യാസ പ്രതിസന്ധി നേരിട്ടിരുന്നു. മൊബൈല്‍-ഇന്‍ര്‍നെറ്റ് കണക്ടിവിറ്റിയിലെ പ്രശ്‌നങ്ങളായിരുന്നു കാരണം. ഓണ്‍ലൈന്‍ ക്ലാസിനായി ആദിവാസി വിദ്യാര്‍ഥികള്‍ ഉയരമുള്ള മരങ്ങളില്‍ കയറുന്നതും മറ്റും ഒഴിവാക്കാനായാണ് ആദ്യം ചാനല്‍ തുടങ്ങിയതെന്ന് ബേസില്‍.പി.ദാസ് പറയുന്നു. കേരളസര്‍ക്കാരിന്‍റെ വനിതാരത്‌നം പുരസ്‌കാര ജേതാവായ ഉമാ പ്രേമന്‍റെ ശാന്തി മെഡിക്കല്‍ ഇന്‍ഫര്‍മേഷന്‍ സെന്‍ററാണ് ആവശ്യമായ സഹായങ്ങള്‍ നല്‍കിയത്. തമിഴ്, ഇരുള ഭാഷകളില്‍ ക്ലാസുകള്‍ ചാനലിലൂടെ വീടുകളിലെത്തി.

കൊവിഡ് നിയന്ത്രണങ്ങളില്‍ ഇളവ് നല്‍കി സ്‌കൂളുകള്‍ തുറന്നതോടെയാണ് വാര്‍ത്താ-വിനോദ ചാനലാക്കി അട്ടപ്പാടി ടെലിവിഷനെ മാറ്റിയത്. ”സ്വന്തം ഭാഷ മോശമാണെന്ന തോന്നല്‍ ആദിവാസികള്‍ക്കിടയിലുണ്ട്. പലരും വീടുകളില്‍ മലയാളമോ തമിഴോ ആണ് സംസാരിക്കുന്നത്. അറിയേണ്ട കാര്യങ്ങള്‍ സ്വന്തം ഭാഷയില്‍ അറിയാന്‍ കഴിയാത്തത് ആദിവാസികള്‍ നേരിടുന്ന ഒരു പ്രശ്‌നമാണ്. സര്‍ക്കാര്‍ പ്രഖ്യാപിക്കുന്ന ആനുകൂല്യങ്ങള്‍ പോലും അവര്‍ പലപ്പോഴും അറിയാതെ പോവുന്നു. അതാണ് ചാനല്‍ വിപുലീകരിക്കാനുള്ള ഒരു കാരണം.”–ബേസില്‍.പി.ദാസ് വിശദീകരിച്ചു.

ഇതൊരു സാമൂഹിക വിപ്ലവമാണ്

സാമൂഹിക വിപ്ലവമാണ് ചാനലിലൂടെ ലക്ഷ്യമിടുന്നതെന്ന് ഉമാ പ്രേമന്‍ പറഞ്ഞു. ആദിവാസി ഭാഷയ്ക്ക് പ്രാധാന്യം ലഭിക്കാന്‍ ചാനല്‍ സഹായിക്കും. വിദ്യഭ്യാസ സംബന്ധിയായ കാര്യങ്ങള്‍ക്കു പുറമെ അട്ടപ്പാടിയിലെ കാര്‍ഷിക മേഖലയെ സഹായിക്കാനും ചാനലിന് കഴിയും. അട്ടപ്പാടിയില്‍ എന്തൊക്കെ സംഭവിക്കുന്നു എന്ന് പുറം ലോകത്തിന് മനസിലാക്കാന്‍ കഴിയും. ആദിവാസി സംസ്‌കാരത്തെ പരിചയപ്പെടാന്‍ പുറംലോകത്തെ ചാനല്‍ സഹായിക്കും. ആദിവാസികള്‍ പറയാനുള്ളത് എല്ലാവര്‍ക്കും അറിയാനും കഴിയും. ചാനലിന് വേണ്ട ക്യാമറയും കംപ്യൂട്ടറുകളും കെട്ടിടവും വരെ ശാന്തി മെഡിക്കല്‍ ഇന്‍ഫര്‍മേഷന്‍ സെന്ററാണ് നല്‍കിയത്. ഞങ്ങള്‍ ഒരു സാമൂഹിക വിപ്ലവമാണ് ലക്ഷ്യമിടുന്നത് — ഉമ പ്രേമന്‍ പറഞ്ഞു.

ആദിവാസി ഭാഷാ ഗവേഷണം അനിവാര്യം

ഇരുള ഭാഷയിലുള്ള വാര്‍ത്താ അവതരണം പോസിറ്റീവായാണ് താന്‍ കാണുന്നതെന്ന് മണ്ണാര്‍ക്കാട് എം.എല്‍.എ അഡ്വ. എന്‍.ശംസുദ്ദീന്‍ സമയം പ്ലസിനോട് പറഞ്ഞു. ഇന്നത്തെ ശാസ്ത്ര-സാങ്കേതിക വിദ്യകളുടെ ഗുണഫലങ്ങള്‍ ആദിവാസികളിലേക്കും എത്തേണ്ടതുണ്ട്. ആദിവാസി ഗോത്രവര്‍ഗ ഭാഷകളെ കുറിച്ച് പഠിക്കാനും അവയെ പരിപോഷിപ്പിക്കാനുമായി പ്രത്യേക ഗവേഷണ സ്ഥാപനം വേണമെന്ന് നിയമസഭയില്‍ നേരത്തെ തന്നെ ആവശ്യപ്പെട്ടിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

ചാനല്‍ ആദിവാസികള്‍ക്ക് ആത്മവിശ്വാസം നല്‍കും

ഇരുള ഭാഷയിലുള്ള വാര്‍ത്താ അവതരണം ആദിവാസികള്‍ക്ക് ആത്മവിശ്വാസം നല്‍കുമെന്നാണ് കോഴിക്കോട്ടെ ഹെല്‍ത്ത് കെയര്‍ റിസര്‍ച്ച് ഫൗണ്ടേഷനിലെ ചീഫ് റിസര്‍ച്ച് ഓഫീസറായ ഡോ. എ.ഡി മണികണ്ഠന്‍ പറയുന്നത്. ഇരുളസമുദായത്തിന് ആയിരക്കണക്കിന് വര്‍ഷങ്ങളുടെ പഴക്കമുണ്ട്. ഇരുള ഭാഷയില്‍ തമിഴ് കലരാന്‍ തുടങ്ങിയിട്ട് 1200 വര്‍ഷും മലയാളം കലരാന്‍ തുടങ്ങിയിട്ട് 70 വര്‍ഷവും ആയി. തമിഴ്‌നാട്ടിലെ ഇരുളസമുദായങ്ങളെയും കേന്ദ്രീകരിച്ചു വേണം ചാനല്‍ പ്രവര്‍ത്തിക്കാന്‍. ഭാഷയെ ഏകീകരിക്കേണ്ട ആവശ്യവുമുണ്ട്. ചാനലിന് പുറമെ യൂട്യൂബിലെ പ്രവര്‍ത്തനങ്ങളും ശക്തമാക്കണം. ആദിവാസികളുടെ വാമൊഴികളും കഥകളും സംസ്‌കാരവുമെല്ലാം പുറം ലോകത്ത് എത്താന്‍ ഇത് സഹായിക്കും.

ഇരുള ഭാഷ അന്യം നിന്ന് പോകുന്നു എന്ന അഭിപ്രായം എനിക്കില്ല. പക്ഷെ, ഭാഷയെ ശക്തിപ്പെടുത്തണം. ആദിവാസി ഭാഷ ഇന്‍സ്റ്റിറ്റ്യൂട്ട് സ്ഥാപിക്കുന്നത് ഇക്കാര്യത്തില്‍ ഗുണം ചെയ്യും. അതുപോലെ ആദിവാസി ഭാഷ ഫെസ്റ്റിവല്‍ തുടങ്ങിയവ പ്രോത്സാഹിപ്പിക്കപ്പെടണം. ദ്രാവിഡ ലിറ്ററേച്ചര്‍ ഫെസ്റ്റ് എന്നിവയെ കൂടുതല്‍ പ്രോത്സാഹിപ്പിക്കുകയും വേണം. — അദ്ദേഹം പറഞ്ഞു.

****