ആരോഗ്യ പ്രശ്നങ്ങളെ തുടർന്ന് 2020 നവംബർ 13നാണ് കോടിയേരി സംസ്ഥാന സെക്രട്ടറി സ്ഥാനത്ത് നിന്നും താൽക്കാലികമായി മാറി നിന്നത്. സംസ്ഥാന സെക്രട്ടറി സ്ഥാനത്ത് നിന്നും മാറി നിൽക്കാനുള്ള കോടിയേരിയുടെ സന്നദ്ധത സംസ്ഥാന സെക്രട്ടേറിയറ്റ് അംഗീകരിക്കുകയായിരുന്നു. അവധി വേണമെന്ന അദ്ദേഹത്തിൻ്റെ ആവശ്യം പാർട്ടി അംഗീകരിക്കുകയായിരുന്നു. എൽഡിഎഫ് കൺവീനർ എ വിജയരാഘവനാണ് പകരം ചുമതല നൽകിയത്.
ആരോഗ്യ പ്രശ്നങ്ങൾക്കൊപ്പം സിപിഎം സംസ്ഥാന സെക്രട്ടറി സ്ഥാനത്ത് നിന്നും കോടിയേരി മാറി നിന്നത്. മകൻ ബിനീഷ് കോടിയേരിയുമായി ബന്ധപ്പെട്ട ആരോപണങ്ങളും കാരണമായി. ഇടതുപക്ഷത്തിന് തുടർഭരണം ലഭിക്കുകയും തെരഞ്ഞെടുപ്പിൽ
സിപിഎം മികച്ച നേട്ടമുണ്ടാക്കുകയും ചെയ്ത സാഹചര്യത്തിലണ് സിപിഎം സംസ്ഥാന സെക്രട്ടറി സ്ഥാനത്തേക്ക് കോടിയേരി മടങ്ങിയെത്താനുള്ള കളമൊരുങ്ങുന്നത്.
ഇത്തവണത്തെ സിപിഎം സംസ്ഥാന സമ്മേളനം ഫെബ്രുവരിയിൽ എറണാകുളത്ത് നടക്കും. അടുത്ത വർഷം നടക്കുന്ന സിപിഎം പാർട്ടി കോൺഗ്രസിനോട് മുന്നോടിയായിട്ടാണ് സംസ്ഥാന സമ്മേളനം നടക്കുക. ഈ സാഹചര്യത്തിലാണ് കോടിയേരി ബാലകൃഷ്ണനെ സംസ്ഥാന സെക്രട്ടറി സ്ഥാനത്തേക്ക് മടക്കിക്കൊണ്ടു വരുന്നത്.
സിപിഎം സംസ്ഥാന സെക്രട്ടറിയായി തിരിച്ചെത്തുന്ന കാര്യത്തിൽ പാർട്ടി തീരുമാനിക്കുമെന്ന് കോടിയേരി ബാലകൃഷ്ണൻ കഴിഞ്ഞ ദിവസം വ്യക്തമാക്കിയിരുന്നു. സെക്രട്ടറി സ്ഥാനത്തേക്ക് തിരിച്ചെത്തുമോ എന്നത് ധൃതി പിടിച്ച് തീരുമാനിക്കേണ്ട ഒരു കാര്യമല്ല. പാർട്ടിയാണ് ഇക്കാര്യങ്ങൾ തീരുമാനിക്കുന്നതെന്നും അദ്ദേഹം വ്യക്തമാക്കിയിരുന്നു.
