മോൺസൻ്റെ പുരാവസ്തു തട്ടിപ്പിൽ ഐ ജി ഇടനിലക്കാരൻ ആയി പ്രവർത്തിച്ചുവെന്നാണ് കണ്ടെത്തൽ. പുരാവ്സ്തു ഇടപാടിന് ആന്ധ്രാ സ്വദേശിനിയെ മോൺസന് പരിചയപ്പെടുത്തിയത് ഐ ജി ലക്ഷമണയാണ്. മോൺസൻ്റെ കൈവശമുള്ള മത്സ്യങ്ങളുടെ സ്റ്റഫ്, മുതലയുടെ തലയോട് എന്നിവ ഇടനിലക്കാരി മുഖേനെ വിൽപ്പന നടത്താൻ പദ്ധതിയിട്ടിരുന്നുവെന്നും കണ്ടെത്തിയിരുന്നു.
കഴിഞ്ഞ ഓഗസ്റ്റ് അഞ്ചിന് തിരുവനന്തപുരം പോലീസ് ക്ലബിൽ വെച്ച് ലക്ഷമണയുടെ നേതൃത്വത്തിലാണ് മോൺസൻ ഇടനിലക്കാരിയുമായി കൂടിക്കാഴ്ച നടത്തിയത്. പോലീസ് ക്ലബിൽ ഐജി ആവശ്യപ്പെട്ടത് പ്രകാരം മോൺസൻ്റെ വീട്ടിൽ നിന്ന് പുരാവസ്തുക്കൾ എത്തിച്ചു. ഐജിയുടെ നിർദേശത്തെ തുടർന്ന് പോലീസ് ഉദ്യോഗസ്ഥനാണ് ഇവ കൊണ്ടുപോയത്. ഔദ്യോഗിക വാഹനത്തിൽ തിരുവനന്തപുരത്ത് നിന്നും ലക്ഷമണ മോൺസൻ്റെ വസതിയിൽ എത്തിയതായും കണ്ടെത്തിയിരുന്നു.
മോൺസൻ മാവുങ്കലിനെ സഹായിച്ചുവെന്ന് വ്യക്തമാക്കുന്ന റിപ്പോർട്ടാണ് ക്രൈംബ്രാഞ്ച് സമർപ്പിച്ചത്. ഈ റിപ്പോർട്ട് മുഖ്യമന്ത്രി പിണറായി വിജയന് ക്രൈം ബ്രാഞ്ച് കൈമാറിയിരുന്നു. മോൺസൻ മാവുങ്കലിനെ കൂടാതെ സാമ്പത്തിക തട്ടിപ്പ് നടത്തിയ മറ്റ് ചിലരെയും ഐജി സഹായിച്ചുവെന്നാണ് റിപ്പോർട്ടിൽ പറയുന്നത്. കഴിഞ്ഞ മാസം ഡിജിപി അനിൽ കാന്തും ഐജി ലക്ഷമണയ്ക്ക് എതിരെ ഹൈക്കോടതിയിൽ റിപ്പോർട്ട് നൽകിയിരുന്നു.
മോണ്‍സണെതിരായ കേസുകള്‍ അട്ടിമറിക്കാന്‍ ഇടപെട്ടു എന്നതാണ് ഗൗരവമായ ആരോപണം. മോൺസനെതിരെ ചേർത്തല പോലീസ് രജിസ്റ്റർ ചെയ്ത കേസ് ക്രൈംബ്രാഞ്ചിന് കൈമാറിയത് വീണ്ടും ലോക്കൽ പോലീസിന് തന്നെ കൈമാറുന്നതിനായി ലക്ഷമണ ഇടപെട്ടതിൻ്റെ രേഖകൾ പുറത്തുവന്നിരുന്നു. രജിസ്റ്റർ ചെയ്യപ്പെട്ട കേസുകളിൽ ലക്ഷമണിൻ്റെ സഹായം ലഭിച്ചെന്ന് അവകാശപ്പെടുന്ന വീഡിയോ, ഓഡിയോ ദൃശ്യങ്ങൾ പുറത്തുവന്നിരുന്നു.
