ബസ് ചാർജ് കൂട്ടാമെന്ന ധാരണയെത്തുടർന്നായിരുന്നു ഇന്ന് ആരംഭിക്കാനിരുന്ന പണിമുടക്ക് ബസ് ഉടമകൾ പിൻവലിച്ചത്. 12 രൂപയായി ഉയർത്തണമെന്നാണ് ബസ് ഉടമകളുടെ പ്രധാന ആവശ്യം. എന്നാൽ എത്ര രൂപയാണ് വർധിപ്പിക്കുക എന്നതിൽ ഇതുവരെയും തീരുമാനമായിട്ടില്ല. വിദ്യാർഥികളുടെ കൺസൻഷൻ മിനിമം ആറ് രൂപയാക്കണമെന്നും ആവശ്യമുണ്ട്.
Also Read :
ഇന്ധനവില വർധനയുടെ പശ്ചാത്തലം ചൂണ്ടിക്കാട്ടിയാണ് ബസുടമകൾ നിരക്ക് വർധന ആവശ്യപ്പെട്ടത്. കഴിഞ്ഞ വര്ഷം ജൂലൈയില് മിനിമം ചാര്ജ്ജ് എട്ടില് നിലനിര്ത്തി ഒരു കിലോമീറ്ററിന് 70 പൈസയില് നിന്ന് 90 ആക്കി ഉയർത്തിയിരുന്നു. എട്ട് രൂപയ്ക്ക് സഞ്ചരിക്കാവുന്ന ദൂരം 5 കിലോമീറ്ററില് നിന്നും രണ്ടരയും ആക്കിയിരുന്നു. എന്നാൽ ഇന്ധന വിലയിൽ വൻ വർധനവ് ഉണ്ടായതോടെയാണ് വീണ്ടും നിരക്ക് വർധനവ് എന്ന ആവശ്യം ബസുടമകൾ ഉന്നയിച്ചത്.
സ്വകാര്യ ബസ് ഉടമകളുമായി ഗതാഗത മന്ത്രി ആന്റണി രാജു നടത്തിയ ചർച്ചയിലാണ് സമരം പിൻവലിക്കാനുള്ള തീരുമാനം കഴിഞ്ഞദിവസം ഉണ്ടായത്. ചർച്ചയിൽ നിരക്ക് വർധനയടക്കമുള്ള കാര്യങ്ങളിൽ മന്ത്രി അനുകൂല നിലപാട് സ്വീകരിച്ചുവെന്നായിരുന്നു റിപ്പോർട്ട്.
Also Read :
ഡീസൽ സബ്സിഡി നൽകുക, കിലോമീറ്റർ നിരക്ക് നിലവിലെ 90 പൈസ എന്നതിൽ നിന്നും ഒരു രൂപയാക്കി ഉയർത്തുക, കൊവിഡ്-19 കാലം കഴിയുന്നതുവരെ ബസുടമകളുടെ വാഹന നികുതി പൂർണമായി ഒഴിവാക്കുക എന്നിവയാണ് ബസുടമകൾ ഉയർത്തുന്ന മറ്റ് ആവശ്യങ്ങൾ.
