തിരുവനന്തപുരം: മുല്ലപ്പെരിയാറിലെ ബേബി ഡാം പരിസരത്ത് മരം മുറിക്കാൻ തമിഴ്നാടിന് അനുമതിയുണ്ടെന്ന് വ്യക്തമാക്കി കേരളം. മൂല പാട്ടക്കരാറിലെ അഞ്ചാം ക്ലോസ് പ്രകാരംഅറ്റകുറ്റപ്പണിക്കായി മരം മുറിക്കാൻ തമിഴ്നാടിന് അനുമതിയുണ്ടെന്നാണ് കേരളം വ്യക്തമാക്കുന്നത്. മരംമുറി ഉത്തരവിന്റെ നടപടിക്രമങ്ങളിലാണ് മൂലകരാർ ഉദ്ധരിച്ചിരിക്കുന്നത്. മൂലകരാറിലെ ഈ പരാമർശം ഉൾപ്പെടുത്തിയാണ് വൈൽഡ് ലൈഫ് വാർഡൻ ബേബി ഡാം പരിസരത്തെ മരങ്ങൾ മുറിക്കാനുള്ള അനുമതി നൽകി ഉത്തരവിറക്കിയത്.
ഈ മാസം അഞ്ചാം തീയതിയാണ് പെരിയാർ ടൈഗർ റിസർവിൽ ഉൾപ്പെടുന്ന മുല്ലപ്പെരിയാർ ബേബി ഡാം പരിസരത്തെ 15 മരങ്ങൾ മുറിക്കാൻ തമിഴ്നാടിന് അനുമതി നൽകിക്കൊണ്ട് കേരളം ഉത്തരവിറക്കിയത്. സർക്കാരിന് വേണ്ടി വൈൽഡ് ലൈഫ് വാർഡൻ ബെന്നിച്ചൻ തോമസാണ് ഈ ഉത്തരവിറക്കിയത്. ഉത്തരവ് തയ്യാറാക്കിയതിന്റെ നടപടിക്രമങ്ങളിലാണ് കരാർ സംബന്ധിച്ച കാര്യം വ്യക്തമാക്കുന്നത്.
മുല്ലപ്പെരിയാർ സംബന്ധിച്ച് തമിഴ്നാടും തിരുവിതാംകൂറും തമ്മിൽ 1886-ൽ ഒപ്പുവെച്ച മൂലകരാറിലാണ് ഡാമിന്റെ അറ്റകുറ്റപ്പണിക്കായി ഈ പ്രദേശത്തെ മരങ്ങൾ മുറിക്കാൻ തമിഴ്നാടിന് അനുമതിയുണ്ടെന്ന് വ്യക്തമാക്കുന്നത്. എന്നാൽ, ഇത്തരത്തിൽ മുറിക്കുന്ന മരങ്ങളും അതിന്റെ അവശിഷ്ടങ്ങളും പെരിയാർ ടൈഗർ റിസേർവിന്റെ ഭാഗമായതിനാൽഅവിടെ തന്നെ നിക്ഷേപിക്കണമെന്ന് കരാറിൽ പ്രത്യേകം എടുത്തുപറയുന്നുണ്ട്.
1970-ൽ പാട്ടക്കരാർ ഭേദഗതി ചെയ്തിരുന്നു. അപ്പോൾ ഇന്ത്യാ രാജ്യം നിലവിൽവന്നിരുന്നതിനാൽ രാജ്യത്തെ നിയമങ്ങളും ഇതിന് ബാധകമാണ്. തമിഴ്നാടിന് മരങ്ങൾ മുറിക്കാനും അറ്റകുറ്റപ്പണി നടത്താനും അനുമതിയുണ്ടെന്ന കാര്യം കേരളത്തിന് നേരത്തെ തന്നെ വ്യക്തമായി അറിയാമായിരുന്നുവെന്നതാണ് നടപടിക്രമങ്ങൾ സംബന്ധിച്ച ഉത്തരവ് പുറത്തുവരുമ്പോൾ വ്യക്തമാകുന്നത്.
1970-ൽ കരാർ പുതുക്കിയതിനാൽ മൂലകരാറിൽ പറയുന്ന കാര്യങ്ങൾ ഇപ്പോഴും നിലനിൽക്കുന്നുവെന്നാണ് മുല്ലപ്പെരിയാർ സംബന്ധിച്ച കേസുകൾ സുപ്രീം കോടതിയിൽ വരുമ്പോൾ തമിഴ്നാട് വാദിക്കാറുള്ളത്. കരാർ ഒപ്പിട്ടത് ഇന്ത്യയിലെ നിയമങ്ങൾ വരുന്നതിന് മുൻപാണെന്ന കേരളത്തിന്റെ വാദത്തെ തമിഴ്നാട് എതിർക്കുന്നതും 1970-ലെ ഭേദഗതി ചൂണ്ടിക്കാണിച്ചാണ്. മരംമുറി സംബന്ധിച്ച് കേരള സർക്കാരിന് ഒന്നും അറിയില്ലെന്ന വിവാദം ചൂടുപിടിക്കുമ്പോഴാണ് ഉത്തരവിന് പിന്നാമ്പുറത്ത് നടന്ന കാര്യങ്ങൾ ഇപ്പോൾ പുറത്തുവരുന്നത്.
Content Highlights: tamilnadu had the permission to cut down trees in mullaperiyar says kerala
