കൊച്ചി: ജോജു ജോർജ് അഭിനയിക്കുന്ന സിനിമയുടെ സെറ്റിലേക്ക് യൂത്ത് കോൺഗ്രസ് മാർച്ച്. കീടം സിനിമയുടെ ഷൂട്ടിംഗ് നടക്കുന്ന പുത്തൻകുരിശ് പിഡബ്ല്യുഡി റസ്റ്റ് ഹൗസിലേക്കാണ് കുന്നത്തുനാട് നിയോജക മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ മാർച്ച് നടത്തിയത്.
പ്രതിഷേധവുമായി എത്തിയവരെ റസ്റ്റ് ഹൗസ് ഗേറ്റിനു മുന്നിൽ പൊലീസ് തടഞ്ഞു. പ്രവർത്തകർ ജോജു ജോർജിനെതിരെ മുദ്രാവാക്യം വിളിക്കുകയും പ്രതിഷേധിക്കുകയും ചെയ്തു. യൂത്ത് കോൺഗ്രസ് നിയോജക മണ്ഡലം പ്രസിഡന്റ് പി എച്ച് അനൂപിന്റെ നേതൃത്വത്തിൽ നടന്ന യോഗം യുഡിഎഫ് ചെയർമാൻ സി.പി. ജോയ് ഉദ്ഘാടനം ചെയ്തു.
രാഹുൽ റെജി നായർ സംവിധാനം ചെയ്ത് ശ്രീനിവാസൻ നായകനാകുന്ന ചിത്രമാണ് കീടം. ഇന്ധന വിലവർധനയ്ക്കെതിരേ കൊച്ചിയിൽ കോൺഗ്രസ് സമരത്തിനെതിരെ ജോജു രംഗത്തെത്തിയതിൽ പ്രതിഷേധിച്ചായിരുന്നു മാർച്ച്.
കഴിഞ്ഞ ദിവസം പൃഥ്വിരാജ് ചിത്രം കടുവയുടെ സെറ്റിലേക്കും കോൺഗ്രസ് മാർച്ച് നടത്തിയിരുന്നു. സിനിമാ സെറ്റുകളിലേക്കുള്ള മാർച്ച് അവസാനിപ്പിക്കണമെന്ന് ആവശ്യപ്പെട്ട് ഫെഫ്ക പ്രതിപക്ഷനേതാവ് വി.ഡി.സതീശന് കത്തയച്ചിട്ടുണ്ട്.
Content Highlights:Youth Congress march to Joju georges cinema set
