കെഎസ്ആർടിസി പണിമുടക്ക്; വരുമാന നഷ്ടം 9.4 കോടി രൂപയെന്ന് റിപ്പോർട്ട്

തിരുവനന്തപുരം: രണ്ട് ദിവസത്തെ പണിമുടക്ക് കൊണ്ട് കെ എസ് ആർ ടി സിയ്ക്ക് വരുമാന നഷ്ടം 9.4 കോടി രൂപയെന്ന് റിപ്പോർട്ട്. ശമ്പള പരിഷ്കരണം ആവശ്യപ്പെട്ട് തൊഴിലാളി സംഘടനകൾ നടത്തിയ പണിമുടക്കിലാണ് 9.4 കോടി നഷ്ടം സംഭവിച്ചതെന്ന് 24ന്യൂസാണ് റിപ്പോർട്ട് ചെയ്തത്. അതിനിടെ ചൊവ്വാഴ്ച മുതൽ സ്വകാര്യ ബസുകൾ പ്രഖ്യാപിച്ച അനിശ്ചിതകാല പണിമുടക്കും ആരംഭിക്കും.

ജീവനക്കാർ പണിമുടക്കിയെങ്കിലും ശമ്പള പരിഷ്കരണ ചർച്ച തുടരുമെന്നാണ് കെ എസ് ആർ ടി സി മാനേജമെന്‍റ് നിലപാട്. ഡയസ്നോണിന്‍റെ കാര്യത്തിൽ തുടർ നടപടി സർക്കാർ തീരുമാനിക്കുന്നത് പോലെയായിരിക്കും. പണിമുടക്കിയ തൊഴിലാളികൾക്കു സർക്കാർ തീരുമാനത്തിനു വിധേയമായി ഡയസ്നോൺ ബാധകമാകുമെന്നാണ് എംഡിയുടെ സർക്കുലർ.

Also Read :
സമരം അനാവശ്യമാണെന്നും ഈ രീതി അംഗീകരിക്കാനാകില്ലെന്നും ഗതാഗത മന്ത്രി ആന്‍റണി രാജുവും നേരത്തെ വ്യക്തമാക്കിയിരുന്നു. ഡയസ്നോൺ നടപ്പിലാക്കാനുള്ള തീരുമാനവുമായി സർക്കാർ മുന്നോട്ട് പോവുകയാണെങ്കിൽ പണിമുടക്കിയവർക്ക് ശമ്പളം നഷ്ടമാകും.

10 വർഷമായി കെ എസ് ആർ ടി സിയിൽ ശമ്പള പരിഷ്കരണം നടപ്പിലാക്കിയിട്ടില്ലെന്ന് ചൂണ്ടിക്കാട്ടിയാണ് തൊഴിലാളി യൂണിയനുകൾ പണിമുടക്ക് നടത്തിയത്. 48 മണിക്കൂർ പണിമുടക്കിന് ശേഷം ഇന്ന് വീണ്ടും കെ എസ് ആർ ടി സി സർവീസുകൾ പുനരാരംഭിച്ചിട്ടുണ്ട്.

Also Read :
അതേസമയം സംസ്ഥാനത്ത് ചൊവ്വാഴ്ച മുതലാണ് സ്വകാര്യ ബസുടമകൾ പ്രഖ്യാപിച്ച അനിശ്ചിതകാല പണിമുടക്ക് ആരംഭിക്കുന്നത്. കൊവിഡ് കാലത്തെ പ്രതിസന്ധിയും ഇന്ധന വില വർധനയും മറികടക്കാൻ ടിക്കറ്റ് വില വർധിപ്പിക്കണമെന്നാണ് ആവശ്യം. വിദ്യാർഥികളുൾപ്പെടെയുള്ളവരുടെ ടിക്കറ്റ് നിരക്ക് വർധിപ്പിക്കണമെന്നാണ് ആവശ്യം.