സമവായ നിർദേശങ്ങളുമായി എത്തിയത് ജോജുവിൻ്റെ സുഹൃത്തുക്കളാണ്. എന്നാൽ ജോജു ഇതുവരെ നേരിട്ട് വന്നിട്ടില്ല. കോണ്‍ഗ്രസ് അതിനു ശേഷം പ്രസ്താവന പിന്‍വലിക്കുന്നത് ആലോചിക്കാം. ജോജു നടത്തിയ തെറി അഭിഷേകം ചാനലുകളിലൂടെ പുറത്തുവന്നിട്ടുണ്ട്. പച്ചക്കള്ളവും ആഭാസവുമാണ് ജോജു പറഞ്ഞത്. ജനങ്ങളോടുള്ള വെല്ലുവിളിയാണ് ജോജുവിൻ്റെ ഭാഗത്ത് നിന്നുമുണ്ടായ നടപടി.
ജോജുവിൻ്റെ പരാതിയിൽ നേതാക്കൾക്കെതിരെ സ്വീകരിച്ച കേസുകളിലെ തുടർനടപടികൾ പാർട്ടി നേതൃത്വവുമായി ആലോചിച്ച് തീരുമാനിക്കും. പ്രതിപക്ഷ ധർമമാണ് കോൺഗ്രസ് നിറവേറ്റിയത്. മഹിളാ കോൺഗ്രസ് നേതാക്കളുടെ പരാതിയിൽ കേസെടുത്തില്ലെങ്കിൽ പ്രക്ഷോഭം സംഘടിപ്പിക്കും. പരാതിയിൽ കോൺഗ്രസ് ഉറച്ച് നിൽക്കുകയാണെന്നും ഡിസിസി പ്രസിഡൻ്റ് മുഹമ്മദ് ഷിയാസ് പറഞ്ഞു.
കോൺഗ്രസ് നേതാക്കളുമായി തൽക്കാലം ഒത്തുതീർപ്പിനില്ലെന്ന് ജോജു വ്യക്തമാക്കിയതായി മാതൃഭൂമി റിപ്പോർട്ട് ചെയ്തു. പ്രതിപക്ഷ നേതാവ് വി ഡി സതീശനും കെപിസിസി പ്രസിഡൻ്റ് കെ സുധാകരനും വിഷയത്തിൽ ഖേദ പ്രകടനം നടത്തിയതായി ജോജുവിൻ്റെ അഭിഭാഷകൻ രഞ്ജിത്ത് മാരാര്‍ പറഞ്ഞു. കോൺഗ്രസ് നേതാക്കൾ ഫോണിൽ വിളിച്ച് ഖേദം പ്രകടിപ്പിച്ചുവെന്ന് അദ്ദേഹം പറഞ്ഞു. പരസ്യമായി പ്രസ്താവന നൽകാനും അവർ തയ്യാറാണ്. സംഭവത്തിൽ പരസ്യമായ ഖേദപ്രകടനം ഉണ്ടാകണമെന്നും രഞ്ജിത്ത് മാരാര്‍ വ്യക്തമാക്കി.
മഹിളാ കോൺഗ്രസ് പ്രവർത്തകരെ അസഭ്യം പറഞ്ഞുവെന്ന ആരോപണത്തിൽ ജോജുവിനെതിരെ പോലീസ് കേസെടുത്തിട്ടില്ല. കൂടുതൽ പരിശോധനകൾക്ക് ശേഷം മാത്രമേ കേസെടുക്കണോ എന്ന കാര്യത്തിൽ തീരുമാനം ഉണ്ടാകൂ എന്ന് പോലീസ് തിങ്കളാഴ്ച പറഞ്ഞിരുന്നു.
കോൺഗ്രസ് നേതാക്കൾ നടത്തിയ ഗുരുതര ആരോപണങ്ങൾ പരസ്യമായി പിൻവലിക്കണമെന്ന നിലപാടിലാണ് ജോജു. സ്ത്രീകൾക്കെതിരെ അസഭ്യം പറഞ്ഞു എന്നതുൾപ്പെടെയുള്ള ഗുരുതരമായ പരാതികളാണ് കോൺഗ്രസ് ജോജുവിനെതിരെ ഉയർത്തിയിരിക്കുന്നത്. പ്രസ്താവനകൾ പിൻവലിക്കാൻ തയ്യാറായില്ലെങ്കിൽ നിയമനടപടികളുമായി മുന്നോട്ട് പോകാനാണ് ജോജുവിൻ്റെ തീരുമാനം.
ഇന്ധന വില വര്‍ധനവിനെതിരെ കൊച്ചി ദേശീയപാത ബൈപ്പാസിൽ കോൺഗ്രസ് നടത്തിയ പ്രതിഷേധത്തിലായിരുന്നു നാടകീയ സംഭവങ്ങള്‍ അരങ്ങേറിയത്. സമരത്തിൻ്റെ ഭാഗമായി കോൺഗ്രസ് പ്രവര്‍ത്തകര്‍ വൈറ്റില മുതൽ പാലാരിവട്ടം വരെയുള്ള ഭാഗം തിങ്കളാഴ്ച രാവിലെ തടയുകയായിരുന്നു. ഇതോടെ ഇവിടെ രൂക്ഷമായ ഗതാഗതക്കുരുക്കാണ് അനുഭവപ്പെട്ടത്. എന്നാൽ ഗതാഗതക്കുരുക്കിൽപ്പെട്ടു കിടന്നിരുന്ന ജോജു ജോര്‍ജ് സമരക്കാര്‍ക്കു നേര്‍ക്ക് എതിര്‍പ്പുാമായി എത്തുകയായിരുന്നു. വഴിതടയൽ സമരത്തിനെതിരെ ജോജു ജോര്‍ജ് നടത്തിയ രോഷപ്രകടനത്തിനു പിന്നാലെ സമരക്കാരും നടനും തമ്മിൽ വാക്കേറ്റമുണ്ടായി. ഇതിനിടയിലായിരുന്നു പ്രവര്‍ത്തകര്‍ ജോജു ജോര്‍ജ് സ‍ഞ്ചരിച്ചിരുന്ന ലാൻഡ് റോവര്‍ ഡിഫൻഡര്‍ എസ്‍യുവിയുടെ പിൻവശത്തെ ഗ്ലാസ് തകര്‍ത്തത്.
