എൽഡിഎഫ് അനുകൂല യൂണിയനായ എംപ്ലോയീസ് അസോസിയേഷനും ബിഎംഎസ് എംപ്ലോയീസ് സംഘും പണിമുടക്കിൽ പങ്കെടുക്കുന്നുണ്ട്. കൂടാതെ കോൺഗ്രസ് അനുകൂല യൂണിയനായ ടിഡിഎഫും വരും സമരത്തിന് നോട്ടീസ് നല്‍കിയിട്ടുണ്ട്. 5, 6 തീയതികളിലാണ് പണിമുടക്ക്. കെഎസ്ആര്‍ടിഇഎ, ബിഎംഎസ് എന്നീ യൂണിയനുകല്‍ വെള്ളിയാഴ്ചയും സമരത്തിന് ആഹ്വാനം നല്‍കി. അഞ്ചാം തീയതി വിവിധ യൂണിയനുകളെല്ലാം സമരത്തിന് ആഹ്വാനം ചെയ്ത സാഹചര്യത്തിലാണ് സംസ്ഥാനത്ത് കെഎസ്ആര്‍ടിസി ബസ് സര്‍വീസുകള്‍ ഏതാണ്ട് പൂര്‍ണമായും മുടങ്ങുന്നത്. പണിമുടക്കിൻ്റെ സാഹചര്യത്തിൽ കേരള സർവകലാശാല അടക്കമുള്ള സ്ഥാപനങ്ങൾ പരീക്ഷകൾ മാറ്റി വെച്ചിട്ടുണ്ട്.
കഴിഞ്ഞ ഒൻപത് വര്‍ഷമായി കെഎസ്ആര്‍ടിസിയിൽ ശമ്പളപരിഷ്കരണം നടപ്പാക്കിയിട്ടില്ലെന്നാണ് ജീവനക്കാര്‍ ചൂണ്ടിക്കാണിക്കുന്നത്. എന്നാൽ ശമ്പളം വര്‍ധിപ്പിച്ചാൽ സര്‍ക്കാരിനു വലിയ സാമ്പത്തികബാധ്യതയുണ്ടാകുമന്നും യൂണിയനുകള്‍ ആത്മപരിശോധന നടത്തണമെന്നും ഗതാഗതമന്ത്രി ആവശ്യപ്പെട്ടു.
Also Read:
അതേസമയം, സമരത്തിൽ നിന്ന് ജീവനക്കാരെ പിന്തിരിപ്പിക്കാനായി സര്‍ക്കാര്‍ ഡയസ്നോൺ പ്രഖ്യാപിച്ചിട്ടുണ്ട്. ജോലിയ്ക്ക് ഹാജരായില്ലെങ്കിൽ പണിമുടക്ക് ദിവസത്തെ വേതനം നല്‍കില്ലെന്നും ഈ തുക ശമ്പളത്തിൽ നിന്നു നല്‍കുമെന്നുമാണ് മുന്നറിയിപ്പ്. ജീവനക്കാര്‍ പണി മുടക്കുമെന്നു മുന്നറിയിപ്പ് നല്‍കിയതിനു പിന്നാലെ ഗതാഗതമന്ത്രി ആൻ്റണി രാജു യൂണിയനുകളുമായി ചര്‍ച്ച നടത്തിയിരുന്നെങ്കിലും പരാജയപ്പെട്ടിരുന്നു. ഈ സാഹചര്യത്തിൽ അവശ്യ സര്‍വീസ് മുടങ്ങാതിരിക്കാൻ സര്‍വീസ് ഡയസ്നോൺ പ്രഖ്യാപിച്ചിരിക്കുകയായിരുന്നു.
Also Read:
യൂണിയനുകള്‍ പുതിയ ശമ്പള സ്കെയിൽ സംബന്ധിച്ച് മുന്നോട്ടു വെച്ച നിര്‍ദേശങ്ങള്‍ തള്ളിക്കളയുന്നില്ലെന്ന നിലപാടാണ് മന്ത്രിയുടേത്. എന്നാൽ പുതിയ സ്കെയിൽ അംഗീകരിച്ചാൽ അടുത്ത മാസം 30 കോടി രൂപയാണ് സര്‍ക്കാരിന് അധികമായി കണ്ടെത്തേണ്ടി വരിക. ഇക്കാര്യങ്ങള്‍ മുഖ്യമന്ത്രിയും ധനമന്ത്രിയുമായും ആലോചിക്കേണ്ടതുണ്ടെന്നും സാവകാശം വേണമെന്നും ഗതാഗതമന്ത്രി ആവശ്യപ്പെട്ടു. എന്നാൽ കഴിഞ്ഞ മാസം 20-ാം തീയതി തന്നെ പണിമുടക്കിനു നോട്ടീസ് നല്‍കിയിരുന്നുവെന്നും 24 മണിക്കൂറിനുള്ളിൽ തന്നെ തീരുമാനം അറിയിക്കണമെന്നും ട്രേഡ് യൂണിയനുകള്‍ സര്‍ക്കാരിനോട് ആവശ്യപ്പെട്ടു. എന്നാൽ ഇത് സാധ്യമല്ലെന്നു മന്ത്രി അറിയിച്ചതോടെ ചര്‍ച്ച പരാജയപ്പെടുകയായിരുന്നു. യൂണിയനുകൾ ഇരിക്കുന്ന കൊമ്പ് മുറിക്കരുതെന്നും തീരുമാനം മാറ്റാൻ തയ്യാറാകണമെന്നും അദ്ദേഹം ആവശ്യപ്പെട്ടു.
അതേസമയം, നവംബർ 9 മുതൽ സംസ്ഥാനത്തെ സ്വകാര്യ ബസുടമകളും അനിശ്ചിതകാല സമരം പ്രഖ്യാപിച്ചിട്ടുണ്ട്. ബസ് ചാർജും വിദ്യാർഥികളുടെ യാത്രാനിരക്കും വർധിപ്പിക്കണമെന്നും കൊവിഡ് കാലത്തെ നഷ്ടം പരിഹരിക്കാൻ നികുതിയിളവ് വേണമെന്നുമാണ് ബസുടമകളുടെ ആവശ്യം.
