കൊച്ചി: ഇന്ധനവില വർദ്ധനവിൽ പ്രതിഷേധിച്ച് കോൺഗ്രസ് നടത്തിയ റോഡ് ഉപരോധത്തിനെതിരെ പ്രതിഷേധിച്ച നടൻ ജോജു ജോർജിന്റെ പഴയ വീഡിയോ പങ്കുവെച്ച് കോൺഗ്രസ് നേതാവ് വി.ടി.ബൽറാം. ഓട്ടോമൊബൈൽ വ്ളോഗറായ ബൈജു എൻ. നായർ തന്റെ യൂട്യൂബ് ചാനലിൽ പോസ്റ്റ് ചെയ്ത വീഡിയോയിൽ നിന്നുള്ള ഒരു ഭാഗമാണ് ബൽറാം തന്റെ ഫെയ്സ്ബുക്കിൽ പങ്കുവെച്ചിരിക്കുന്നത്.
അഭിമുഖത്തിനിടയിൽ തങ്ങൾ ആദ്യം കണ്ട സമയത്ത്ജോജുവിന് ഉണ്ടായിരുന്ന വണ്ടിയെക്കുറിച്ച് ബൈജു ചോദിക്കുമ്പോൾ, പെട്രോളടിക്കാൻ കാശില്ലാഞ്ഞിട്ട് ആ വണ്ടി വിറ്റു എന്ന് ജോജു പറയുന്ന ഭാഗമാണ്ബൽറാം പങ്കുവെച്ചിരിക്കുന്നത്. ഇതിന് പിന്നാലെ നിരവധി പേർ സമൂഹമാധ്യമങ്ങളിൽ വീഡിയോ പങ്കുവെച്ചു.
അതേസമയം, ജോജു ജോർജിന്റെ കാർ തകർത്ത കോൺഗ്രസ് പ്രവർത്തകരെ തിരിച്ചറിഞ്ഞു. ഇന്ധനവില വർദ്ധനവിനെതിരെ കോൺഗ്രസിന്റെ റോഡ് ഉപരോധ സമരത്തെ നടൻ ജോജു ജോർജ് ചോദ്യം ചെയ്തതിനെത്തുടർന്നാണ് പ്രശ്നങ്ങൾ തുടങ്ങിയത്. ഇതിന് പിന്നാലെ കോൺഗ്രസ് പ്രവർത്തകരും ജോജുവും തമ്മിൽ വാക്കേറ്റമുണ്ടാകുകയും പ്രവർത്തകർ കാർ തല്ലിത്തകർക്കുകയുമായിരുന്നു. സംഭവത്തിൽ ജോജുവിന്റെ കൈയ്ക്കും പരിക്ക് പറ്റിയിരുന്നു. ആറ് ലക്ഷം രൂപയുടെ നഷ്ടമാണ് വണ്ടിക്കുണ്ടായത്.
ഇന്നലെ നടന്ന റോഡ് ഉപരോധ സമരത്തിന് അനുമതി നൽകിയിരുന്നില്ലെന്ന് ഡിസിപിയും വ്യക്തമാക്കിയിരുന്നു. ഇതുമായി ബന്ധപ്പെട്ട് കൂടുതൽ കോൺഗ്രസ് നേതാക്കളുടെ അറസ്റ്റുണ്ടാകുമെന്നാണ് കമ്മീഷണർ ഇപ്പോൾ വ്യക്തമാക്കുന്നത്. സംഭവവുമായി ബന്ധപ്പെട്ട് ഇന്നലെ കൊച്ചി മുൻ മേയർ ടോണി ചമ്മിണിക്കും മറ്റ് ഏഴു പേർക്കുമെതിരെ കേസെടുത്തിരുന്നു.
Content Highlights: VTbalram shares a video of joju george saying that he sold vehicle due to petrol price hike
