കള്ളപ്പണം വെളുപ്പിക്കൻ കേസിൽ ജയിൽ മോചിതനായ മരുതം കുഴിയിലെ വീട്ടിലെത്തിയ സന്ദർഭത്തിലാണ് കോടിയേരി പ്രതികരണം നടത്തിയത്. ഒരു വർഷത്തിന് ശേഷം മകനെ കണ്ടതിൽ ആശ്വാസമുണ്ട്. കേസ് നടപടികൾ കോടതിയിൽ നിലനിൽക്കുന്നതിനാൽ വിഷയത്തിൽ കൂടുതൽ പ്രതികരിക്കാനില്ല. ബിനീഷിന് ജാമ്യം ലഭിച്ചതിൽ സന്തോഷമുണ്ടെന്നും അദ്ദേഹം പറഞ്ഞു.
എൻ ഫോഴ്സ്‌മെൻ്റുമായി ബന്ധപ്പെട്ട് മുൻപ് ഉന്നയിക്കപ്പെട്ട ആരോപണങ്ങൾ ശരിവെക്കുന്ന കാര്യങ്ങളാണ് പിന്നീട് ഉണ്ടായതെന്ന് കോടിയേരി പറഞ്ഞു. വിവിധ സംസ്ഥാനങ്ങളിൽ നടക്കുന്ന കാര്യങ്ങൾ അതാണ് സാക്ഷ്യപ്പെടുത്തിക്കൊണ്ടിരിക്കുന്നതെന്നും അദ്ദേഹം കൂട്ടിച്ചേർത്തു.
വീട്ടിലേക്ക് വരുന്നത് ഒരു വർഷത്തിന് ശേഷമാണെന്ന് ബിനീഷ് പറഞ്ഞു. ആദ്യം ബന്ധുക്കളെ കാണണം. പിന്തുണച്ചവർക്കെല്ലാം നന്ദി. ഒരു പാട് കാര്യം പറയാനുണ്ട്. വിശദമായി പിന്നീട് കാണാമെന്നും അദ്ദേഹം പറഞ്ഞു. കേരളത്തിൽ നടന്ന ഒരു കേസിൽ ചിലരെ കുരുക്കാൻ വേണ്ടിയാണ് എൻഫോഴ്സ്‌മെൻ്റ് (ഇഡി) അറസ്റ്റ് ചെയ്തതെന്ന ആരോപണത്തിൽ അദ്ദേഹം ഉറച്ച് നിൽക്കുകയാണ്.
ബെംഗളൂരു പരപ്പന അഗ്രഹാര ജയിലിൽ നിന്ന് ശനിയാഴ്ച രാത്രി എട്ട് മണിയോടെയാണ് ബിനീഷ് പുറത്തിറങ്ങിയത്. കള്ളപ്പണം വെളുപ്പിക്കൽ കേസിൽ ഒരു വർഷത്തിന് ശേഷം കഴിഞ്ഞ വ്യാഴാഴ്ചയാണ് കർണാടക കോടതി ബിനീഷിന് ജാമ്യം അനുവദിച്ചത്. 2021 ഫെബ്രുവരിയിൽ ബെംഗളൂരുവിലെ പ്രത്യേക കോടതി ജാമ്യാപേക്ഷ രണ്ട് പ്രാവശ്യം തള്ളിയതിനെ തുടർന്നാണ് ഹൈക്കോടതിയെ സമീപിച്ചത്. 2021 ഏപ്രിലിലാണ് ഹൈക്കോടതിയിൽ ജാമ്യാപേക്ഷയിൽ വാദം ആരംഭിച്ചത്. ജാമ്യ ഹർജി പരിഗണിക്കുന്നതിനിടെ മൂന്ന് പ്രാവസ്യം ഹൈക്കോടതി ബഞ്ച് മാറിയതോടെ ഹർജിയിൽ തീരുമാനം ഉണ്ടാകുന്നത് വൈകി.
കർശന ജാമ്യവ്യവസ്ഥകളോടെയാണ് ബിനീഷ് ജാമ്യത്തിലിറങ്ങിയത്. അഞ്ച് ലക്ഷം രൂപയുടെ രണ്ട് ആൾജാമ്യം, അനുമതിയില്ലാതെ രാജ്യം വിടരുത്, അന്വേഷണ ഉദ്യോഗസ്ഥർക്കും കോടതിക്കു മുന്നിലും കൃത്യമായി ഹാജരാകണം, സാക്ഷികളെ സ്വാധീനിക്കരുത്, തെളിവ് നശിപ്പിക്കരുത് തുടങ്ങിയ ഉപാധികളോടെയാണ് കോടതി ബിനീഷിന് ജാമ്യം നൽകിയത്. ജാമ്യ വ്യവസ്ഥയുടെ കർശന സ്വഭാവം മൂലമാണ് ആദ്യം ജാമ്യക്കാർ പിന്മാറിയത്. ഇഡിയുടെ നിരീക്ഷണത്തിലാകുമെന്ന ഭയം പിന്മാറാൻ പ്രേരിപ്പിച്ചെന്നാണ് റിപ്പോർട്ട്.
