വത്തിക്കാനിലെ പേപ്പൽ ഹൗസിലെ ലൈബ്രറിയിൽ നടന്ന കൂടിക്കാഴ്ചയ്ക്കിടെയാണ് മാർപാപ്പയെ പ്രധാനമന്ത്രി ഇന്ത്യയിലേക്ക് ക്ഷണിച്ചത്. മാർപാപ്പയെ പ്രധാനമന്ത്രി ഇന്ത്യയിലേക്ക് ക്ഷണിച്ചുവെന്ന് കേന്ദ്ര സർക്കാർ വൃത്തങ്ങൾ വ്യക്തമാക്കി. ഇന്ത്യ സന്ദര്‍ശിക്കാനുള്ള ക്ഷണം മാര്‍പാപ്പ സ്വീകരിച്ചെന്ന് വിദേശകാര്യ മന്ത്രാലയവും അറിയിച്ചിരുന്നു. മാർപാപ്പയെ വത്തിക്കാനിൽ സന്ദർശിക്കുന്ന അഞ്ചാമത്തെ പ്രധാനമന്ത്രിയാണ് നരേന്ദ്ര മോദി.
ഇന്ത്യ സന്ദർശിക്കുമെന്ന ഫ്രാൻസിസ് മാർപാപ്പയുടെ തീരുമാനം ഇന്ത്യക്കാർക്ക് അഭിമാന നിമിഷമാണെന്ന് കർദിനാൾ ബസേലിയോസ് മാർ ക്ലിമ്മിസ് കതോലിക്ക ബാവ വ്യക്തമാക്കി. “പ്രധാനമന്ത്രി മോദിയും മാർപാപ്പയും തമ്മിലുള്ള ചർച്ച ഗുണപരമായ മാറ്റം ഉണ്ടാക്കും. ഇന്ത്യയിലെത്താനുള്ള മാർപാപ്പയുടെ തീരുമാനം ഭാരതത്തിലെ സമൂഹങ്ങൾ തമ്മിലുള്ള ബന്ധത്തിൽ വഴിത്തിരിവാകും” – എന്നും അദ്ദേഹം പറഞ്ഞു.
ഫ്രാൻസിസ് മാർപാപ്പയെ ഇന്ത്യയിലേക്ക് ക്ഷണിച്ച തീരുമാനം അഹ്ലാദകരമാണെന്ന് വരാപ്പുഴ അതിരൂപതാധ്യക്ഷൻ ഡോ. ജോസഫ് കളത്തിപ്പറമ്പിൽ പറഞ്ഞു. മാർപാപ്പയുടെ സന്ദർശ പരിപാടിയിൽ കേരളവും ഉൾപ്പെടുമെന്നാണ് പ്രതീക്ഷിക്കുന്നതെന്നും ആർച്ച് ബിഷപ് പറഞ്ഞു.
വത്തിക്കാനിൽ നടന്ന – നരേന്ദ്ര മോദി കൂടിക്കാഴ്ചയിൽ ദേശീയ സുരക്ഷാ ഉപദേഷ്ടാവ് അജിത് ഡോവൽ, വിദേശകാര്യമന്ത്രി എസ് ജയശങ്കര്‍ തുടങ്ങിയവരും പ്രധാനമന്ത്രിയ്ക്കൊപ്പം ഉണ്ടായിരുന്നു. കൂടിക്കാഴ്ച അരമണിക്കൂർ നേരം മാത്രമാണ് നിശ്ചയിച്ചിരുന്നതെങ്കിലും ഇരുവരും തമ്മിലുള്ള ചർച്ച ഒന്നേകാൽ മണിക്കൂറുകളോളം നീണ്ടു. കൊവിഡ്-19 വ്യാപനം, കാലാവസ്ഥാ വ്യതിയാനം എന്നിവയടക്കമുള്ള വിഷയങ്ങൾ കൂടിക്കാഴ്ചയിൽ ചർച്ചയായെന്നാണ് പുറത്തുവരുന്ന റിപ്പോർട്ട്. മാര്‍പാപ്പയുമായുള്ള കൂടിക്കാഴ്ച മികച്ചതായിരുന്നുവെന്നാണ് പ്രധാനമന്ത്രി നരേന്ദ്ര മോദിയും പ്രതികരിച്ചത്. മാർപാപ്പയെ സന്ദർശിച്ച ശേഷം വത്തിക്കാൻ വിദേശകാര്യ സെക്രട്ടറി കർദിനാൾ പിയത്ര പരോളിൻ ഉൾപ്പെട്ട പ്രതിസംഘവുമായി മോദി കൂടിക്കാഴ്ച നടത്തി.
ദാരിദ്ര്യനിര്‍മാര്‍ജനവും കാലാവസ്ഥാ മാറ്റവം അടക്കമുള്ള വിഷയങ്ങള്‍ ഇരുനേതാക്കളും തമ്മിൽ ചര്‍ച്ച ചെയ്തെന്നും ഭൂമിയെ കൂടുതൽ മെച്ചപ്പെടുത്തുന്നത് എങ്ങനെയെന്ന് ഇരുവരം ചേര്‍ന്ന് ചര്‍ച്ച ചെയ്തെന്നും ബന്ധപ്പെട്ട വൃത്തങ്ങളെ ഉദ്ധരിച്ച് എൻഡിടിവി റിപ്പോര്‍ട്ട് ചെയ്തു. വെള്ളിയിൽ തീർത്ത മെഴുകുതിരി പീഠവും കാലാവസ്ഥ വ്യതിയാനവുമായി ബന്ധപ്പെട്ട പുസ്തകവുമാണ് മോദി മാർപാപ്പയ്ക്ക് നൽകിയത്. ബൈബിളിൽ പ്രതീക്ഷയുടെ അടയാളമായ ഒലിവില ചില്ല പതിപ്പിച്ച വെങ്കല ഫലകമായിരുന്നു ഇന്ത്യൻ പ്രധാനമന്ത്രിക്ക് പോപ്പ് നൽകിയ സമ്മാനം.
മാർപാപ്പയെ വത്തിക്കാനിൽ സന്ദർശിക്കുന്ന അഞ്ചാമത്തെ പ്രധാനമന്ത്രിയാണ് നരേന്ദ്ര മോദി. മുൻപ് അടൽ ബിഹാരി വാജ്പേയ് പ്രധാനമന്ത്രിയായിരുന്നപ്പോഴാണ് അവസാനമായി ഇന്ത്യൻ പ്രധാനമന്ത്രിയും മാര്‍പാപ്പയും തമ്മിൽ കൂടിക്കാഴ്ച നടത്തിയത്. അന്ന് ജോൺ പോള്‍ രണ്ടാമനായിരുന്നു മാര്‍പാപ്പ.
