ഇടതു സഹയാത്രികയായി സിപിഎമ്മിൻ്റെ എല്ലാവിധ പ്രവർത്തനങ്ങളിലും പാർട്ടിയിലെ ഒരു അംഗത്തെപ്പോളെ പ്രവർത്തിക്കുന്ന വ്യക്തിയാണ് ഞാൻ. ഈ സാഹചര്യത്തിനിടെയാണ് ഇടത് ബന്ധം അവസാനിപ്പിച്ച് ഞാൻ കോൺഗ്രസിലേക്ക് മടങ്ങുന്നുവെന്ന വാർത്തകൾ പുറത്തുവന്നത്. അടിസ്ഥാനമില്ലാത്ത വാർത്തയാണ് പുറത്തുവന്നത്. കോൺഗ്രസിലേക്ക് ഒരു മടങ്ങിപ്പോക്ക് ചിന്തിച്ചിട്ട് പോലുമില്ലെന്നും ശോഭനാ ജോർജ് വ്യക്തമാക്കി.
സി പി എം മെമ്പർഷിപ്പ് എടുത്ത് പാർട്ടിയിൽ പ്രവർത്തിക്കാനാണ് തീരുമാനം. ഇനി ഇടതുസഹയാത്രിക എന്നല്ല, പാർട്ടി അനുവദിക്കുമെങ്കിൽ മെമ്പർഷിപ്പ് എടുത്ത് കൊണ്ട് സജീവമായി മുന്നോട്ട് പോകും. കഴിഞ്ഞ മൂന്ന് വർഷമായി സിപിഎമ്മുമായി ചേർന്ന് പ്രവർത്തിക്കുകയാണ്. നാടിൻ്റെ നന്മ, വിശാലമായ കാഴ്ചപ്പാട്, സ്ത്രീകൾക്ക് ഏറ്റവും സമാധാനത്തോടെ പ്രവർത്തിക്കാൻ കഴിയുന്ന പാർട്ടി എന്നാണ് കൂടുതൽ അടുത്തറിയുന്തോറും തോന്നുന്നതെന്നും അഭ്യൂഹങ്ങൾക്ക് മറുപടിയായി ശോഭനാ ജോർജ് പറഞ്ഞു.
വിട്ടുവന്ന തിരികെ കോൺഗ്രസിലേക്ക് മടങ്ങിയതോടെയാണ് ശോഭനാ ജോർജും കോൺഗ്രസിലേക്ക് മടങ്ങുമെന്ന വാർത്തകൾ പുറത്തുവന്നത്. കേരള ഖാദിബോർഡ് വൈസ് ചെയർപേഴ്സൺ സ്ഥാനം രാജിവെച്ചതിന് പിന്നാലെയാണ് അവർ കോൺഗ്രസിലേക്ക് മടങ്ങുമെന്ന വാർത്തകൾ സജീവമായത്.
ഒന്നാം പിണറായി വിജയൻ സർക്കാരിൻ്റെ കാലത്ത് ബോർഡ്, കോർപ്പറേഷൻ ചെയർമാർ സ്ഥാനത്തേക്ക് ചുമതലയേറ്റവർ രാജിവെക്കണമെന്ന നിർദേശം സർക്കാർ നൽകിയിരുന്നു. ഇതിന് പിന്നാലെയാണ് ശോഭനാ ജോർജിൻ്റെ രാജിയുണ്ടായത്. മൂന്നര വർഷത്തെ ഉത്തരവാദിത്തം ഭംഗിയായി നിറവേറ്റിയെന്നായിരുന്നു രാജിക്ക് പിന്നാലെ ശോഭനാ ജോർജ് പറഞ്ഞത്. പുതിയ സ്ഥാനങ്ങളെക്കുറിച്ച് തീരുമാനിക്കേണ്ടത് പാർട്ടിയാണെന്നും അവർ പറഞ്ഞിരുന്നു.
കോൺഗ്രസിലേക്ക് മടങ്ങിയതിന് പിന്നാലെ സിപിഎമ്മിനെതിരെ ചെറിയാൻ ഫിലിപ്പ് ആരോപണം ഉന്നയിച്ചിരുന്നു. അഡി. പ്രൈവറ്റ് സെക്രട്ടറി സി എം രവീന്ദ്രൻ സൂപ്പർ സി.എം കളിക്കുകയാണെന്നും മുഖ്യമന്ത്രി പിണറായി വിജയനെ എറ്റവുമധികം വഷളാക്കിയത് രവീന്ദ്രനാണെന്നും അദ്ദേഹം ആരോപിച്ചിരുന്നു. എന്നാൽ ചെറിയാൻ ഫിലിപ്പ് നേരത്തെയുണ്ടായിരുന്ന നിലപാട് മാറ്റുക മാത്രമാണ് ചെയ്തതെന്നും അത് ഇടത് പക്ഷത്തെയോ പാർട്ടിയെയോ ബാധിക്കില്ലെന്നും സിപിഎം സംസ്ഥാന ആക്ടിങ്ങ് സെക്രട്ടറി എ വിജയരാഘവൻ്റെ പ്രതികരിച്ചു. ചെറിയാൻ ഫിലിപ്പ് പാർട്ടി അംഗമായിരുന്നില്ലെന്നും അദ്ദേഹം സംഘടന ചുമതലയൊന്നും നിർവഹിക്കുന്നില്ലെന്നും വിജയരാഘവൻ വാർത്താ സമ്മേളനത്തിൽ പറഞ്ഞിരുന്നു.
