കര്‍ണാടക സ്വദേശികളായ ജാമ്യക്കാര്‍ അവസാന നിമിഷം പിന്മാറുകയായിരുന്നുവെന്നാണ് റിപ്പോര്‍ട്ട്. ജാമ്യവ്യവസ്ഥയിലുള്ള എതിര്‍പ്പ് മൂലമാണ് ജാമ്യക്കാര്‍ പിന്മാറിയതെന്നാണ് മനോരമ റിപ്പോര്‍ട്ടിൽ പറയുന്നത്. ഇവര്‍ക്കു പകരം മറ്റു ചിലരെ വിചാരണക്കോടതിയിൽ എത്തിച്ചപ്പോഴേയ്ക്കും കോടതി വിടുതൽ സര്‍ട്ടിഫിക്കറ്റ് നല്‍കാനുള്ള സമയം കഴിയുകയായിരുന്നു. ഈ സാഹചര്യത്തിൽ നാളെയായിരിക്കും ബിനീഷ് കോടിയേരിയുടെ ജയിൽമോചനം.
Also Read:
വ്യാഴാഴ്ചയയിരുന്നു ബിനീഷ് കോടിയേരിയ്ക്ക് കര്‍ണാടക ഹൈക്കോടതി ജാമ്യം അനുവദിച്ചത്. ലഹരിമരുന്ന് ഇടപാടുമായി ബന്ധപ്പെട്ട കള്ളപ്പണക്കേസിൽ എൻഫോഴ്സ്മെൻ്റ് ഡയറക്ടറേറ്റ് പ്രതി ചേര്‍ത്തതോടെയാണ് ബിനീഷ് കോടിയേരി ജയിലിലായത്. കേസിലെ നാലാം പ്രതിയാണ് ബിനീഷ് കോടിയേരി. കേസിൽ അറസ്റ്റിലായി ഒരു വര്‍ഷം പിന്നിടുമ്പോഴാണ് ബിനീഷിന് കോടതി ജാമ്യം അനുവദിക്കുന്നത്.
അഞ്ച് ലക്ഷം രൂപയുടെ രണ്ട് ആള്‍ ജാമ്യം ഉള്‍പ്പെടെ കര്‍ശന വ്യവസ്ഥകളായിരുന്നു കര്‍ണാടക ഹൈക്കോടതി മുന്നോട്ടു വെച്ച ആവശ്യങ്ങല്‍. നിലവിൽ പരപ്പന അഗ്രഹാര ജയിലിലാണ് ബിനീഷ് കോടിയേരി കഴിയുന്നത്. വിചാരണക്കോടതിയിലെ നടപടികള്‍ പൂര്‍ത്തിയാക്കി ജയിൽമോചനത്തിന് ജയിൽ വകുപ്പിന് ഉത്തരവ് ലഭിച്ചതാൽ ബിനീഷ് കോടിയേരി ഇന്നു ജയിൽമോചിതനാകുമെന്നായിരുന്നു പ്രതീക്ഷ. സഹോദരൻ ബിനോയ് കോടിയേരിയ്ക്കൊപ്പം റോഡ് മാര്‍ഗം ഇന്ന് തിരുവനന്തപുരത്തേയ്ക്ക് തിരിക്കുമെന്നും റിപ്പോര്‍ട്ടുകളുണ്ടായിരുന്നു. എന്നാൽ ഇതിനിടയിലാണ് തിരിച്ചടി.
Also Read:
അതേസമയം, കോടതി ജാമ്യം അനുവദിച്ചെങ്കിലും ബിനീഷ് ഉള്‍പ്പെടെയുള്ളവര്‍ക്കെതിരെ അന്വേഷണം ശക്തമാക്കാനുള്ള ഒരുക്കത്തിലാണ് എൻഫോഴ്സ്മെൻ്റ് ഡയറക്ടറേറ്റ്. അതേസമയം, ഇഡി ചുമത്തിയ കേസിന് ആസ്പദമായ എൻസിബിയുടെ കുറ്റപത്രത്തിൽ ബിനീഷ് പ്രതിയല്ല. ഇക്കാര്യമാണ് ബിനീഷിൻ്റെ അഭിഭാഷകൻ കോടതിയിൽ ചൂണ്ടിക്കാട്ടിയതും. എന്നാൽ കേസിൽ ഇതുവരെ ചോദ്യം ചെയ്യലിനു ഹാജരാകാത്ത ബിനീഷിൻ്റെ ഡ്രൈവര്‍ അനിക്കുട്ടനിലേയ്ക്കും ബിസിനസ് പങ്കാളിയായ അരുണിലേയ്ക്കും അന്വേഷണം നീട്ടാനുള്ള നീക്കത്തിലാണ് ഇഡി.
ചെയ്യാത്ത കുറ്റം സമ്മതിപ്പിക്കാൻ അന്വേഷണ ഏജൻസി ശ്രമിക്കുകയാണെന്നായിരുന്നു ഒരു വര്‍ഷത്തോളമായി ബിനീഷ് കോടിയേരി കോടതിയിൽ ഉയ‍ര്‍ത്തിയ വാദം. സിപിഎം നേതാവിൻ്റെ മകൻ എന്ന നിലയിൽ ഇഡി തന്നെ വേട്ടയാടുകയാണെന്നും ബിനീഷ് വാദിച്ചു. എൻസിബി കുറ്റപത്രത്തിൽ ബിനീഷിൻ്റെ പേരില്ലാത്തതും തുണയായി. എന്നാൽ അന്വേഷണത്തിനിടെ രാജ്യം വിട്ടു പോകരുത് എന്നത് ഉള്‍പ്പെടെ കര്‍ശന ഉപാധികളാണ് കോടതി മുന്നോട്ടു വെച്ചിട്ടുള്ളത്. അക്കൗണ്ടിലെത്തിയ ഒന്നേ മുക്കാൽ കോടി രൂപയുടെ ഉറവിടം വ്യക്തമാക്കാനും ബിനീഷ് കോടിയേരിയ്ക്ക് കഴിഞ്ഞിട്ടില്ല.
