കൊച്ചി> ഓണ്ലൈന് ക്ലാസിന് ശേഷം കുഴഞ്ഞുവീണ് മരിച്ച അധ്യാപികയ്ക്ക് ആദരാഞ്ജലിയര്പ്പിച്ച് വിദ്യാഭ്യാസമന്ത്രി വി ശിവന് കുട്ടി. അധ്യാപിക കുഞ്ഞുങ്ങളോട് പറഞ്ഞ വാചകം മാധ്യമങ്ങള് റിപ്പോര്ട്ട് ചെയ്തത് വായിക്കുമ്പോള് അറിയാതെ കണ്ണുകള് നിറയുമെന്നും മന്ത്രി പറഞ്ഞു.
ഫേസ്ബുക്ക് കുറിപ്പ്
‘വിഡിയോ ഓണ് ആക്ക്യേ, എല്ലാരേം എനിക്കൊന്ന് കാണാനാ’ – ഓണ്ലൈന് ക്ളാസിനിടെ പതിവില്ലാതെ കള്ളാര് അടോട്ടുകയ ഗവ.വെല്ഫെയര് എല് പി സ്കൂളിലെ അധ്യാപിക ചുള്ളിയോടിയിലെ സി മാധവി എന്ന അധ്യാപിക കുഞ്ഞുങ്ങളോട് പറഞ്ഞ വാചകം മാധ്യമങ്ങള് റിപ്പോര്ട്ട് ചെയ്തത് വായിക്കുമ്പോള് അറിയാതെ കണ്ണുകള് നിറയും. ചുമയുള്ളതിനാല് ബാക്കി അടുത്ത ക്ളാസിലെടുക്കാം എന്ന് പറഞ്ഞ് ഹോംവര്ക്കും നല്കിയ ശേഷമാണ് മാധവി ടീച്ചര് ക്ളാസെടുക്കുന്നത് അവസാനിപ്പിച്ചതത്രെ.
മാധവി ടീച്ചര് ഇന്ന് നമ്മോടൊപ്പം ഇല്ല. ആ ക്ളാസിന് പിന്നാലെ വിട പറഞ്ഞു. കുട്ടികള്ക്ക് ഏറെ ഇഷ്ടമുള്ള ടീച്ചര് ആയിരുന്നു എന്നാണ് മനസിലാക്കുന്നത്. മാധവി ടീച്ചര്ക്ക് ആദരാഞ്ജലികള്.
