മുല്ലപ്പെരിയാർ കേസിൽ സുപ്രീംകോടതി നിർദ്ദേശത്തെ പോസിറ്റീവായാണ് കാണുന്നതെന്ന് മന്ത്രി പറഞ്ഞു. റൂൾ കർവിലെ പ്രശ്നങ്ങൾ ബോധ്യപ്പെടുത്താൻ സമയം ലഭിക്കും. ഡാം തുറക്കുമ്പോൾ പെരിയാർ തീരദേശവാസികളുടെയടക്കം സുരക്ഷയ്ക്കായി മതിയായ മുൻകരുതലുകൾ സ്വീകരിച്ചതായും മന്ത്രി പറഞ്ഞു- മനോരമ ന്യൂസ് റിപ്പോർട്ട് ചെയ്തു.
നവംബർ 11 വരെ മുല്ലപ്പെരിയാർ ഡാമിലെ ജലനിരപ്പ് 139.5 അടിയിൽ കൂടരുതെന്നാണ് സുപ്രീംകോടതി ഉത്തരവ്. നവംബർ 11 ന് കേസ് വീണ്ടും പരിഗണിക്കും. റൂൾ കർവിനെക്കുറിച്ച് കേരളം ഉന്നയിച്ച വാദം സുപ്രീംകോടതി വിശദമായി കേൾക്കും. വിഷയത്തിൽ നവംബർ ഒൻപതിനകം കേരളം വിശദമായ സത്യവാങ്മൂലം നൽകണം. നവംബർ പത്തിന് ശേഷം ജലനിരപ്പ് 142 അടി വരെ പോകാമെന്നാണ് തമിഴ്നാടിന്റെ റൂൾ കർവ്.
അതേസമയം ജലനിരപ്പ് താഴ്ന്നില്ലെങ്കിൽ മുല്ലപ്പെരിയാർ അണക്കെട്ട് ഒക്ടോബർ 29 ന് തുറക്കുമെന്ന് മന്ത്രി റോഷി അഗസ്റ്റിൻ ബുധനാഴ്ച വ്യക്തമാക്കിയിരുന്നു. ഡാം തുറക്കുന്നതിനുള്ള മുന്നൊരുക്കം കേരളം സ്വീകരിച്ചിട്ടുണ്ടെന്ന് മന്ത്രി പറഞ്ഞു.
മുല്ലപ്പെരിയാർ വിഷയത്തിൽ രണ്ട് സംസ്ഥാനങ്ങളിലേയും ജനങ്ങളുടെ താൽപര്യം സംരക്ഷിക്കുമെന്ന് എം കെ സ്റ്റാലിൻ മുഖ്യമന്ത്രി പിണറായി വിജയന് അയച്ച കത്തിൽ വ്യക്തമാക്കിയിരുന്നു. മുല്ലപ്പെരിയാറിലെ ജലനിരപ്പ് നിരീക്ഷിക്കുകയാണ്. വിഷയത്തിൽ കേരളവുമായി ആശയവിനിമയം തുടരുകയാണ്. ഡാമുമായി ബന്ധപ്പെട്ട എല്ലാ നടപടികളും കേരളത്തെ അറിയിക്കാൻ നിർദ്ദേശം നൽകിയിട്ടുണ്ടെന്നും അദ്ദേഹം പറഞ്ഞു.
കേരളത്തിന്റെ ആവശ്യപ്രകാരം പരമാവധി വെള്ളം വൈഗ ഡാമിലേക്ക് കൊണ്ടുപോകുന്നുണ്ട്. ബുധനാഴ്ച രാവിലെ എട്ട് മുതൽ വൈഗയിലേക്ക് കൊണ്ടുപോകുന്ന വെള്ളത്തിന്റെ അളവ് 2300 ക്യൂസെക്സ് ആക്കിയിട്ടുണ്ട്. ജലനിരപ്പ് നിരീക്ഷിക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ടെന്നും അദ്ദേഹം പറഞ്ഞു.
