അതേസമയം വ്യാഴാഴ്ചയാണ് പന്തീരാങ്കാവ് യുഎപിഎ കേസിൽ താഹ ഫസലിന് സുപ്രീംകോടതി ജാമ്യം നൽകിയത്. കേസിൽ രണ്ടാം പ്രതിയാണ് താഹ. ഒന്നാം പ്രതി അലൻ ഷുഹൈബിന്റെ ജാമ്യം റദ്ദാക്കണമെന്ന എൻഐഎയുടെ ആവശ്യം സുപ്രീംകോടതി തള്ളി. ജസ്റ്റിസ് അജയ് റസ്തോഗിയും ജസ്റ്റിസ് ശ്രീനിവാസും അടങ്ങുന്ന ബെഞ്ചാണ് കേസ് പരിഗണിച്ചത്.
താഹ ഫസലിനെ എത്രയും വേഗം വിചാരണ കോടതിയിൽ ഹാജരാക്കി തുടർ നടപടികൾ പൂർത്തിയാക്കണമെന്ന് സുപ്രീംകോടതി നിർദ്ദേശിച്ചു. വിധിയുടെ പ്രസക്ത ഭാഗങ്ങൾ മാത്രമാണ് കോടതിയിൽ വായിച്ചത്. 2019 നവംബറിലാണ് മാവോയിസ്റ്റ് പ്രവർത്തനം ആരോപിച്ച് പന്തീരാങ്കാവ് യുഎപിഎ കേസിൽ അലൻ ഷുഹൈബിനെയും താഹ ഫസലിനെയും പോലീസ് അറസ്റ്റ് ചെയ്തത്.
പിന്നീടാണ് കേസ് അന്വേഷണം എൻഐഎ ഏറ്റെടുത്തത്. ഇരുവർക്കും വിചാരണ കോടതി ജാമ്യം അനുവദിച്ചിരുന്നു. പിന്നീട് താഹയുടെ ജാമ്യം ഹൈക്കോടതി റദ്ദാക്കി. അലന്റെ ജാമ്യം ശരിവെയ്ക്കുകയും ചെയ്തു. ഒരാൾക്ക് മാത്രം ജാമ്യം നൽകിയതിനെതിരെ സുപ്രീംകോടതി നേരത്തെ നിലപാടെടുത്തിരുന്നു. ഹൈക്കോടതി വിധി ചോദ്യം ചെയ്ത് സമർപ്പിച്ച ഹർജികളാണ് സുപ്രീംകോടതി ഇന്ന് പരിഗണിച്ചത്.
