ലഹരി മരുന്ന് കള്ളപ്പണക്കേസിൽ ബിനീഷ് കോടിയേരിയ്ക്ക് ജാമ്യം അനുവദിച്ച് കര്‍ണാടക ഹൈക്കോടതി

ബെംഗളൂരു: ലഹരിമരുന്ന് ഇടപാടുമായി ബന്ധപ്പെട്ട കേസിൽ ബിനീഷ് കോടിയേരിയ്ക്ക് ഒടുവിൽ ജാമ്യം. അറസ്റ്റിലായി ഒരു വര്‍ഷം പിന്നിടുമ്പോഴാണ് ജയിൽമോചിതനാകാൻ ബിനീഷ് കോടിയേരിയ്ക്ക് അവസരമൊരുങ്ങുന്നത്. കള്ളപ്പണക്കേസിൽ നാളെയണ് ബിനീഷ് കോടിയേരി അറസ്റ്റിലായി ഒരു വര്‍ഷം പൂര്‍ത്തിയാകുന്നത്. കര്‍ണാടക ഹൈക്കോടതിയാണ് ജാമ്യം അനുവദിച്ചത്.

ലഹരി മരുന്ന് കച്ചവടവുമായി ബന്ധപ്പെട്ട് കള്ളപ്പണ ഇടപാട് നടത്തിയെന്ന ആരോപണമാണ് ബിനീഷ് കോടിയേരിയ്ക്കെതിരെ ഉയര്‍ന്നത്. കഴിഞ്ഞ വര്‍ഷം ഓഗസ്റ്റിൽ ബിനീഷ് കോടിയേരിയുടെ സുഹൃത്തുക്കളായ മുഹമ്മദ് അനൂപ് അടക്കമുള്ളവരെ ലഹരിമരുന്ന് ഇടപാടുമായി ബന്ധപ്പെട്ട് നാര്‍ക്കോട്ടിക്സ് കൺട്രോള്‍ ബ്യൂറോ അറസ്റ്റ് ചെയ്തു ചോദ്യം ചെയ്തതോടെയാണ് അന്വേഷണം ബിനീഷ് കോടിയേരിയിലിയേക്ക് എത്തിയത്. ഇരുവരും തമ്മിലുള്ള പണമിടപാടുകള്‍ ലഹരിമരുന്ന് ഇടപാടുമായി ബന്ധപ്പെട്ടാണെന്നായിരുന്നു റിപ്പോര്‍ട്ടുകള്‍. കേസുമായി ബന്ധപ്പെട്ട ചോദ്യം ചെയ്യലിനു ബെംഗളൂരുവിലേയ്ക്ക വിളിച്ചു വരുത്തിയ ബിനീഷിനെ അന്വേഷണസംഘം നാടകീയമായി അറസ്റ്റ് ചെയ്യുകയായിരുന്നു. ഇതുമായി ബന്ധപ്പെട്ട് ബിനീഷ് കോടിയേരിയെ ചോദ്യം ചെയ്തെങ്കിലും വ്യക്തമായ തെളിവുകളുടെ അടിസ്ഥാനത്തിൽ എൻസിബി കേസിൽ ബിനീഷിനെ പ്രതി ചേര്‍ത്തിരുന്നില്ല.

Also Read:

എന്നാൽ മുഹമ്മദ് അനൂപ് അടക്കമുള്ള പ്രതികളുമായി ബിനീഷ് കോടിയേരി നടത്തിയ സാമ്പത്തിക ഇടപാടുകള്‍ സംബന്ധിച്ച് എൻഫോഴ്സ്മെൻ്റ് ഡയറക്ടറേറ്റ് നടത്തിയ അന്വേഷണം ബിനീഷിനു കുരുക്കാകുകയായിരുന്നു. വ്യക്തമായ രേഖകളില്ലാതെ 5.17 കോടി രൂപ ബാങ്ക് അക്കൗണ്ടിലെത്തിയതായിരുന്നു ബിനീഷിനെതിരായ ആരോപണം. ഇത് ലഹരിമരുന്ന് കച്ചവടവുമായി ബന്ധപ്പെട്ട തുകയാണെന്നും ഇഡി ആരോപിച്ചു. ഈ കേസിൽ നാലാം പ്രതിയായിരുന്നു ബിനീഷ് കോടിയേരി.

Also Read:

എന്നാൽ എൻസിബിയുടെ കുറ്റപത്രത്തിൽ ബിനീഷ് കോടിയേരി പ്രതിയല്ലെന്ന കാര്യമാണ് ബിനീഷിൻ്റെ അഭിഭാഷഖൻ കോടതിയിൽ ഉയര്‍ത്തിക്കാട്ടിയത്. ലഹരിമരുന്ന് ഇടപാടുമായി ബിനീഷ് കോടിയേരിയ്ക്ക് ബന്ധമുണ്ടെന്ന് കണ്ടെത്താൻ കഴിഞ്ഞിട്ടില്ലെന്നും ഇതിലും വൻതുകയുടെ കള്ളപ്പണ ഇടപാടുകള്‍ നടത്തിയവര്‍ക്ക് ജാമ്യം നല്‍കിയിട്ടുണ്ടെന്നും അഭിഭാഷകര്‍ കോടതിയെ അറിയിക്കുകയായിരുന്നു. തുടര്‍ന്നാണ് ജസ്റ്റിസ് ഉണ അധ്യക്ഷയായ ബെഞ്ച് ജാമ്യം അനുവദിച്ചതെന്ന് ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു. ഉപാധികളോടെയാണ് കോടതി ജാമ്യം അനുവദിച്ചിട്ടുള്ളത്.

Also Read:

മുഹമ്മദ് അനൂപിനെ ഹോട്ടൽ നടത്തിപ്പുമായി ബന്ധപ്പെട്ട് ബിനീഷ് കോടിയേരി സാമ്പത്തികമായി സഹായിച്ചിരുന്നുവെന്നും ഇതാണ് ഇരുവരും തമ്മിലുള്ള സാമ്പത്തിക ഇടപാടെന്നുമാണ് ബിനീഷ് കോടിയേരി വ്യക്തമാക്കിയത്. എൻസിബിയുടെ കുറ്റപത്രത്തിൽ പേരില്ലാത്തതിനാൽ ഇഡി ചുമത്തിയിട്ടുള്ള കേസ് നിലനിൽിക്കില്ലെന്നും ഇഡി ചൂണ്ടിക്കാട്ടി. ഒരു വര്‍ഷമായി പരപ്പന അഗ്രഹാര ജയിലിൽ കഴിയുകയാണ് ബിനീഷ് കോടിയേരി. മുൻപ് പല തവണ ബിനീഷിൻ്റെ ജാമ്യാപേക്ഷ കോടതി തള്ളിയിരുന്നു.