രമ്യ ഹരിദാസിനും, കെകെ രമ എംഎൽഎയ്ക്കും, എംജി യൂണിവേഴ്സിറ്റിലെ എഐഎസ്എഫ് വനിതാ നേതാവിനും വാളയാറിലെ അമ്മയ്ക്കും ഒരു നീതി. മേയർ ആര്യാ രാജേന്ദ്രനും സിപിഐഎം അംഗങ്ങൾക്കും പാർട്ടിയെ പുകഴ്ത്തിയും അനുകൂലിച്ചും പാർട്ടിയുടെ നെറികേടുകൾക്ക് മൗനം പാലിക്കുകയും ചെയ്യുന്ന വനിതകൾക്ക് മറ്റൊരു നീതിയുമാണെന്നും രമ്യാ ഹരിദാസ് പറഞ്ഞു. ഇവിടെ ഇങ്ങനെയാണ് ഭായ് എന്ന് തുടങ്ങുന്ന കുറിപ്പിലാണ് യുഡിഎഫ് എംപിയുടെ പ്രതികരണം.
കേരളം ഇപ്പോൾ ഇങ്ങനെയൊക്കെയാണ്, പാർട്ടിയുടെ, കൊടിയുടെ നിറം നോക്കിയാണ് നീതി നടപ്പാക്കുന്നതെന്നും രമ്യ ഹരിദാസ് ആരോപിച്ചു. ബ്ലോക്ക് പഞ്ചായത്ത് പ്രസിഡണ്ടായിരുന്ന രമ്യ ഹരിദാസിനെ എൽഡിഎഫ് കൺവീനർ അധിക്ഷേപിച്ചപ്പോൾ അത് തെറ്റാണെന്ന് പറയാനോ, അത് പിൻവലിക്കണമെന്ന് പറയാനോ ഇന്ന് ആര്യാ രാജേന്ദ്രനെ പിന്തുണക്കുന്ന മന്ത്രിയും ഡിവൈഎഫ്ഐ നേതാവുമായ മുഹമ്മദ് റിയാസിനെ കണ്ടിരുന്നില്ല. ആ പരാമർശത്തിൽ ഇന്നേവരെ എ.വിജയരാഘവൻ ഖേദം പ്രകടിപ്പിച്ചതായി അറിഞ്ഞിട്ടില്ല. കേസെടുക്കാൻ നിയമോപദേശം തേടുകയോ കേസ് എടുക്കുകയോ ചെയ്തതായി അറിയില്ലെന്നും രമ്യ ഹരിദാസ് പറഞ്ഞു.
പാർലമെന്‍റ് അംഗമായത് മുതൽ നേരിട്ടും സാമൂഹ്യ മാധ്യമങ്ങളിലും ഞാൻ നേരിട്ട അധിക്ഷേപത്തിനും അവഹേളനത്തിനും കാരണം ഞാനൊരു കമ്മ്യൂണിസ്റ്റ് പാർട്ടിക്കാരിയല്ല എന്നതായിരുന്നു. “നിയമസഭ തെരെഞ്ഞെടുപ്പ് സമയത്ത് കാലൊടിഞ്ഞു ചികിത്സയിലായിരുന്ന ഞാൻ പ്രചരണ രംഗത്തിറങ്ങിയത് എത്ര വികൃതമായാണ് സോഷ്യൽ മീഡിയയിൽ ചിത്രീകരിച്ചത്. കഠിനമായ വേദന സഹിച്ചും സ്വന്തം ആദർശത്തിനുവേണ്ടി പ്രചാരണം നടത്തിയ എന്നെ നാടകനടിയാക്കിയാണ് സൈബർ പോരാളികൾ ആഘോഷിച്ചത്. അതിനെതിരെ ഏതെങ്കിലും സിപിഐഎം നേതാക്കൾ പ്രതികരിച്ചോ? സിപിഐഎം അണികളെ അങ്ങനെ ചെയ്യരുതെന്ന് ഏതെങ്കിലും ഒരു നേതാവ് വിലക്കിയോ?”- രമ്യ ഹരിദാസ് ചോദിച്ചു.
Also Read :
രമ്യ ഹരിദാസും മറ്റ് പാർട്ടികളിലുള്ളവരും എല്ലാം സഹിച്ചുകൊള്ളണം,അതായിരുന്നു നിലപാട്. എഐഎസ്എഫിന്‍റെ വനിതാ പ്രവർത്തക എംജി യൂണിവേഴ്സിറ്റിയിലെ എസ്എഫ്ഐക്കാരാൽ അക്രമിക്കപ്പെട്ടപ്പോൾ ജാതി പരമായും ശാരീരികമായും ആക്രമിക്കപ്പെട്ടപ്പോൾ ആ പെൺകുട്ടിയോട് ചോദിച്ചതും തെളിയിക്കാൻ വീഡിയോ കൊണ്ടുവരാനായിരുന്നു. സിപിഎം അല്ലാത്തവരെല്ലാം പരാതി പറഞ്ഞാൽ കള്ളം. അവർ വീഡിയോ തെളിവ് ഹാജരാക്കണം. അല്ലെങ്കിൽ അവർ വ്യാപകമായി അവഹേളിക്കപ്പെടും. എസ്എഫ്ഐക്കെതിരെ പരാതി പറഞ്ഞ എഐഎസ്എഫ് പ്രവർത്തക നേരിട്ട അശ്ലീല പ്രയോഗങ്ങളും കമൻറുകളും എത്രത്തോളം ഭീകരമായിയിരുന്നു. അതിനൊന്നും ഒരു മന്ത്രിമാർക്കും വിഷമം തോന്നിയതായി കണ്ടില്ല. ഇതാണ് ഇരട്ട നീതിയെന്നും ആലത്തൂർ എംപി പറഞ്ഞു.
സിപിഐഎമ്മിന് പുറത്തുള്ളവരുടെ അഭിമാനത്തിനും പരാതികൾക്കും യാതൊരു വിലയും ഇല്ല. അവരെ ആർക്കുവേണമെങ്കിലും ആക്ഷേപിക്കാം അവഹേളിക്കാം, മോർഫിംഗ് നടത്താം വൃത്തികെട്ട അശ്ലീല ട്രോളുകൾ ഇറക്കാം. എല്ലാം സഹിച്ചു കൊള്ളണം. നിരപരാധി ആണെങ്കിൽ പോലും പിന്തുണക്കാൻ സ്വന്തം പാർട്ടിക്കാരല്ലാത്ത ഒരാളെയും പ്രതീക്ഷിക്കരുത്, സാംസ്കാരിക നായകരെ പോലും പ്രതീക്ഷിക്കിച്ചേക്കരുത്. ഇതാണ് ഇന്നത്തെ കേരളം പഠിപ്പിക്കുന്നത്.
എനിക്കെതിരെയുള്ള എ വിജയരാഘവന്‍റെ പദപ്രയോഗങ്ങൾ ദ്വയാർത്ഥമുള്ളതും അവഹേളിക്കുന്നതുമായിരുന്നില്ലേ? കെ മുരളീധരൻ എംപി നടത്തിയ പരാമർശം മേയറുടെ മനസ്സ് വിഷമിച്ചെങ്കിൽ ഖേദം ഖേപ്രകടിപ്പിക്കുന്നു എന്നു പറയാനുള്ള മാന്യത അദ്ദേഹം കാണിച്ചു. അതാണ് ഒരു കോൺഗ്രസുകാരനും സിപിഐഎം കാരനും തമ്മിലുള്ള വ്യത്യാസം. ഒരു കോൺഗ്രസ്, യുഡിഎഫ് നേതാവിന്‍റെ ഏറ്റവും വലിയ ഗുണം അതാണ്. കെ മുരളീധരൻ എം പി ഇന്ന് കാണിച്ചത് ആ ഗുണമാണ്. സിപിഎം നേതാക്കൾക്ക് ഇല്ലാത്തതും അതുതന്നെ. എതിരെ നിൽക്കുന്നവരെ മുഴുവൻ അവഹേളിക്കുകയും സ്വന്തം പാർട്ടിക്കാർ ചെയ്യുന്ന എന്തു നെറികേടുകളും ന്യായീകരിക്കുകയും ചെയ്യുന്ന നേതാക്കളും അണികളും ഉള്ള ഒരു നാട്ടിൽ ഒരാളും നീതി പ്രതീക്ഷിച്ചേക്കരുത്, ഒന്നിച്ച് ഒരു മുന്നണിയിൽ ആണെങ്കിലും എന്നു പറഞ്ഞുകൊണ്ടാണ് രമ്യ ഹരിദാസ് കുറിപ്പ് അവസാനിപ്പിക്കുന്നത്.
