തായ്വാനിലെ ഒരു ഗണിത അധ്യാപകൻ നേരിട്ട പ്രശ്നം കുട്ടികൾ തന്റെ ഓൺലൈൻ ക്ലാസ് ശ്രദ്ധിക്കുന്നില്ല എന്നതാണ്. ഇതിനൊരു പോംവഴി തേടിയ അധ്യാപകൻ ഒടുവിൽ ചെയ്തതെന്തെന്നോ? ഗണിതവുമായി വിദൂരമായി പോലും ബന്ധമില്ലാത്ത അശ്ലീല വെബ്സൈറ്റായ പോൺഹബ്ബിൽ ക്ലാസുകൾ അപ്ലോഡ് ചെയ്തു. വിശ്വസിച്ചാലും ഇല്ലെങ്കിലും, പോൺഹബിൽ 200-ലധികം ഗണിത പാഠങ്ങൾ ഈ അദ്ധ്യാപകൻ പോസ്റ്റ് ചെയ്തിട്ടുണ്ട്. എല്ലാ വീഡിയോകളും പൂർണ്ണമായും ലൈംഗിക ഉള്ളടക്കമില്ലാത്തതും, ഗണിത പ്രശ്നങ്ങളിൽ മാത്രം ശ്രദ്ധ കേന്ദ്രീകരിക്കുകയും ചെയ്യുന്നതാണ്.
ഗണിതശാസ്ത്രത്തിൽ ബിരുദാനന്തര ബിരുദമുള്ള കഴിഞ്ഞ 15 വർഷമായി തായ്വാനീസ് സ്കൂളുകളിൽ പഠിപ്പിക്കുന്ന ഈ അദ്ധ്യാപകൻ ഓൺലൈൻ പഠനം ആരംഭിച്ചതോടെ ആദ്യം യൂട്യൂബിലാണ് വിഡിയോകൾ പോസ്റ്റ് ചെയ്തത്. എന്നാൽ കഴിഞ്ഞ വർഷം പകുതിയോടെ പോൺഹബ്ബിൽ ക്ലാസുകൾ പോസ്റ്റ് ചെയ്യാനാരംഭിച്ചു.
മെൽ മാഗസിന് നൽകിയ അഭിമുഖത്തിൽ, അശ്ലീല വെബ്സൈറ്റിന്റെ ജനപ്രീതി കാരണം അതിൽ വീഡിയോകൾ പങ്കിടാൻ തുടങ്ങിയെന്ന് 34 കാരനായ അധ്യാപകൻ പറഞ്ഞു. “പോൺഹബ്ബ് പോലെയുള്ള വീഡിയോ പ്ലാറ്റ്ഫോമുകളിൽ വീഡിയോകൾ കാണുന്ന ധാരാളം ആളുകൾ ഉള്ളതുകൊണ്ട് എന്റെ വീഡിയോകൾ അവിടെ അപ്ലോഡ് ചെയ്തു. അപ്പോൾ ധാരാളം ആളുകൾ അവ കാണുമല്ലോ,” അദ്ധ്യാപകൻ മാഗസിനോട് പറഞ്ഞു.
200-ലധികം വിഡിയോകൾ പോൺഹബ്ബിൽ അപ്ലോഡ് ചെയ്ത തന്റെ ചാനലിന് പ്രേക്ഷകരുടെ എണ്ണം വർദ്ധിപ്പിക്കാനും കുറഞ്ഞ കാലത്തിനുള്ളിൽ അധ്യാപകന് സാധിച്ചുവത്രെ. അദ്ധ്യാപകന്റെ വീഡിയോകൾ വെബ്സൈറ്റിൽ വൻ ഹിറ്റാണ്. ചിലത് 1.6 ദശലക്ഷത്തിലധികം വ്യൂ നേടിയിട്ടുണ്ട്.
