അപകടത്തിൽ പരിക്കേറ്റ ഒരാളുടെ നില ഗുരുതരമാണെന്ന റിപ്പോർട്ടുകൾ പുറത്തുവരുന്നുണ്ട്. ആകാശ് അടക്കമുള്ളവരുടെ പരിക്ക് സാരമുള്ളതല്ല. ആകാശിൻ്റെ സുഹൃത്തുക്കളായ അശ്വിൻ, ഷിബിൻ, അഖിൽ എന്നിവരാണ് അപകടത്തിപ്പെട്ടത്. അശ്വിൻ്റെ നില അതീവ ഗുരുതരമായി തുടരുകയാണ്. തലയ്ക്ക് പരിക്കേറ്റ ഇയാൾ വെൻ്റിലേറ്ററിലാണെന്ന് ‘മനോരമ ന്യൂസ്’ റിപ്പോർട്ട് ചെയ്തു. പരിക്കേറ്റ അഖിൽ ഐസിയുവിലാണുള്ളത്. ഷിബിനും ആകാശിനും സാരമായ പരിക്കേറ്റെങ്കിലും ഇവരും കണ്ണൂരിലെ സ്വകാര്യ ആശുപത്രിയിൽ ചികിത്സയിൽ തുടരുകയാണ്.
അപകടത്തിന് കാരണമായ വാഹനം പോലീസ് സ്റ്റേഷനിലേക്ക് മാറ്റി. ജന്മദിന ആഘോഷ പരിപാടിയിൽ പങ്കെടുത്ത് മടങ്ങുന്നതിനിടെയാണ് അപകടമുണ്ടായതെന്നാണ് വിവരം. കൂത്തുപറമ്പ് ഭാഗത്ത് നിന്നും തില്ലങ്കേരിയിലേക്ക് പോയ കാറാണ് അപകടത്തിൽപ്പെട്ടത്. അപകടവുമായി ബന്ധപ്പെട്ട് കൂത്തുപറമ്പ് പോലീസ് അന്വേഷണം ആരംഭിച്ചു.
ഷുഹൈബ് വധക്കേസിൽ വിചാരണ നേരിടുന്ന ആകാശ് തില്ലങ്കേരി കരിപ്പൂർ സ്വർണക്കടത്ത് ക്വട്ടേഷൻ കേസുകളിൽ ആരോപണം നേരിടുന്നുണ്ട്. സ്വർണക്കടത്ത് കേസുമായി ബന്ധപ്പെട്ട് കണ്ണൂർ തില്ലങ്കേരിയിലെ ആകാശിൻ്റെ വീട്ടിൽ കസ്റ്റംസ് റെയ്ഡ് നടത്തിയിരുന്നു. കരിപ്പൂർ സ്വർണക്കടത്ത് കേസുമായി ബന്ധപ്പെട്ട് അറസ്റ്റിലായ അർജുൻ ആയങ്കിയുമായുള്ള അടുത്ത ബന്ധത്തിൻ്റെ പശ്ചാത്തലത്തിലാണ് ആകാശിൻ്റെ വീട്ടിൽ റെയ്ഡ് നടന്നത്.
