മഴക്കെടുതിയിൽ 13.67 കോടിയുടെ നാശനഷ്ടം വൈദ്യുതി ബോർഡിന് ഉണ്ടായെന്നാണ് യോഗത്തിന്റെ വിലയിരുത്തൽ. 4.18 ലക്ഷം വൈദ്യുതി കണക്ഷനുകൾ തകരാറിലായി. 60 ട്രാൻസ്ഫോർമറുകൾ, 339 പോസ്റ്റുകൾ, 1398 ലോ ടെൻഷൻ പോസ്റ്റുകൾ, 11 കെവി ലൈനുകൾ എന്നിവയും നശിച്ചിട്ടുണ്ട്. ഇവ യുദ്ധകാലാടിസ്ഥാനത്തിൽ പുനഃസ്ഥാപിക്കാനാണ് തീരുമാനം. ചീഫ് എഞ്ചിനീയറുടെ നേതൃത്വത്തിൽ ജില്ലാ തലത്തിൽ ടാസ്ക് ഫോഴ്സ് രൂപീകരിക്കാനും തീരുമാനമുണ്ട്.
കക്കി ഡാമിലെ ജലനിരപ്പ് ഇപ്പോൾ 979 അടിയാണ്. 978 ൽ എത്തിയപ്പോഴാണ് റെഡ് അലേർട്ട് പ്രഖ്യാപിച്ചത്. ഇടുക്കി, ഇടമലയാർ, കക്കി ഡാമുകൾ ഇപ്പോൾ തുറക്കേണ്ടതില്ലെന്നാണ് തീരുമാനം. കക്കി ഡാമിന്റെ കാര്യത്തിൽ നേരത്തെ ആശങ്ക നിലനിന്നിരുന്നു. വൈദ്യുതി ഉത്പാദനം കൂട്ടി ജലനിരപ്പ് നിയന്ത്രിക്കാനാകുമെന്നാണ് വിലയിരുത്തൽ.
ഡാമിന്റെ വൃഷ്ടിപ്രദേശത്ത് ഇപ്പോൾ നീരൊഴുക്ക് കുറവാണെന്നാണ് റിപ്പോർട്ട്. ഇന്ന് രാത്രി പെയ്യുന്ന മഴയുടെ അളവ് കണക്കിലെടുത്താകും തുടർ തീരുമാനങ്ങൾ കൈക്കൊള്ളുക. നിലവിൽ മഴ കുറയുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.
അതേസമയം പ്രധാനമന്ത്രി നരേന്ദ്ര മോദി ടെലിഫോണിൽ വിളിച്ച് സംസ്ഥാനത്തെ മഴക്കെടുതികൾ സംബന്ധിച്ച വിവരങ്ങൾ ആരാഞ്ഞതായി മുഖ്യമന്ത്രി പിണറായി വിജയൻ അറിയിച്ചു. അതിതീവ്രമഴയും ഉരുൾപൊട്ടലും അതിൻ്റെ ഫലമായി ഉണ്ടായ ആൾനാശവും സംസ്ഥാനത്തിന് കനത്ത ആഘാതം ഏൽപ്പിച്ചിരിക്കുകയാണ്. ഈ സാഹചര്യത്തിൽ ആവശ്യമായ സഹായങ്ങൾ കേന്ദ്രം നൽകാമെന്ന് പ്രധാനമന്ത്രി വാഗ്ദാനം ചെയ്തു- മുഖ്യമന്ത്രി വ്യക്തമാക്കി.
“കേരളത്തിൽ കനത്ത മഴയിലും ഉരുൾപൊട്ടലിലും ഏതാനും ജീവനുകൾ നഷ്ടമായത് ദുഖകരമാണ്. മരണമടഞ്ഞവരുടെ കുടുംബാംഗങ്ങളോട് അനുശോചനം അറിയിക്കുന്നു. കേരളത്തിലെ കനത്ത മഴയുടെയും മണ്ണിടിച്ചിലിന്റെയും പശ്ചാത്തലത്തിൽ മുഖ്യമന്ത്രി പിണറായി വിജയനുമായി സംസാരിച്ച് സ്ഥിതിഗതികൾ ചർച്ച ചെയ്തു. പരിക്കേറ്റവരെയും ദുരിതബാധിതരെയും സഹായിക്കാൻ ഉദ്യോഗസ്ഥർ രംഗത്തുണ്ട്. എല്ലാവരുടെയും സുരക്ഷയ്ക്കും ക്ഷേമത്തിനും വേണ്ടി ഞാൻ പ്രാർത്ഥിക്കുന്നു.” പ്രധാനമന്ത്രി നരേന്ദ്ര മോദി ട്വീറ്റ് ചെയ്തു.
