Also Read :
അതേസമയം, ഇന്ന് അതിതീവ്ര മഴയ്ക്ക് സാധ്യതയില്ലെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം വ്യക്തമാക്കി. എന്നാൽ ഒറ്റപ്പെട്ട ശക്തമായ മഴയുണ്ടാകുമെന്നാണ് റിപ്പോര്ട്ട്. അറബിക്കടലിലെ ന്യൂനമര്ദ്ദത്തിന്റെ ശക്തി കുറയുമെന്നാണ് പ്രതീക്ഷിക്കുന്നത്.
മലയോര മേഖലയിൽ ജാഗ്രത തുടരണമെന്നും ചൊവ്വാഴ്ച വരെ മഴതുടരുമെന്നാണ് കാലാവസ്ഥ വകുപ്പിന്റെ പ്രവചനം. ദുരന്ത നിവാരണ പ്രവര്ത്തനങ്ങള് ഇന്ന് തുടരും. കോട്ടയം, ഇടുക്കി ജില്ലകളില് കാണാതായവര്ക്കായുള്ള തിരച്ചിൽ പുനരാരംഭിക്കും.
ഇന്നലെ ഏറ്റവും നാശനഷ്ടമുണ്ടായി എന്ന് കരുതുന്ന കോട്ടയം ജില്ലയിലെ കൂട്ടിക്കലിലും ഇടുക്കി ജില്ലയിലെ കൊക്കയാറിലും രാവിലെ തന്നെ രക്ഷാപ്രവര്ത്തനം തുടരും. രണ്ടിടങ്ങളിലായി 15 പേരെയാണ് ഇനി കണ്ടെത്താനുള്ളത് എന്നാണ് റിപ്പോര്ട്ട്. കൂട്ടിക്കലിൽ ഇന്നലെ മൂന്ന് മരണം സ്ഥിരീകരിച്ചിരുന്നു. കെ കെ റോഡിൽ ഗതാഗതം പുനസ്ഥാപിച്ചു.
കോട്ടയം ഇടുക്കി അതിര്ത്തിയിലെ കൊക്കയാറിലും ഉരുള്പൊട്ടലുണ്ടായിരുന്നു. കൊക്കയാര് പഞ്ചായത്തിലെ പൂവഞ്ചിയിൽ ഉരുള്പൊട്ടി ഏഴ് പേരെ കാണാതായി. പതിനേഴോളം പേരെ രക്ഷപെടുത്തിയതായാണ് പ്രദേശാവാസികള് നൽകുന്ന വിവരം. നൂറിലധികം കുടുംബങ്ങള് താമസിക്കുന്ന സ്ഥലത്തിന് സമീപമാണ് ഉരുള്പ്പൊട്ടലുണ്ടായത്.
Also Read :
കൂട്ടിക്കലിലെ കാവാലിയിലാണ് ഇനി തെരച്ചില് നടത്താനുള്ളത്. ഇവിടെ ഇനി ഏഴ് പേരെ കണ്ടെത്താനുണ്ടെന്ന് ഏഷ്യാനെറ്റ് ന്യൂസ് റിപ്പോര്ട്ട് ചെയ്യുന്നു.
കരസേന ദേശീയ ദുരന്ത നിവാരണ സേന, സംസ്ഥാന പൊലീസ്, റവന്യൂ അധികാരികൾ, അഗ്നിശമന സേന എന്നിവർ രംഗത്തുണ്ട്. സംസ്ഥാന ദുരന്ത പ്രതികരണ സെൽ 24 മണിക്കൂറും പ്രവര്ത്തിക്കുന്നുണ്ട്. 112 എന്ന നമ്പറിൽ പോലീസ് സഹായവും തേടാവുന്നതാണ്.
