കോട്ടയം: ഇടുക്കി ജില്ലയിലെ കൊക്കയാറിലും കോട്ടയം ജില്ലയിലെ കൂട്ടിക്കലിലുമുണ്ടായ ഉരുൾപൊട്ടലിൽ ഇരുപത്തഞ്ചോളംപേരെ കാണാതായി.കൂട്ടിക്കലിൽനിന്ന് മൂന്നുപേരുടെ മൃതദേഹം കണ്ടെത്തി. എന്നാൽ ഇവ ആരൊക്കെയാണ് എന്ന് തിരിച്ചറിഞ്ഞിട്ടില്ല. കൂട്ടിക്കലിൽ 15 പേരെയും കൊക്കയാറിൽ പത്തുപേരെയുമാണ് കാണാതായതെന്നാണ് വിവരം.
ശനിയാഴ്ച രാവിലെ പതിനൊന്നോടെയാണ്പ്ലാപ്പള്ളിയിൽ ഉരുൾപൊട്ടലുണ്ടായത്. പ്ലാപ്പള്ളി പ്രദേശം പൂർണമായും ഒറ്റപ്പെട്ട നിലയിലാണ്. കനത്തമഴയും പിന്നീടുണ്ടായ ഉരുൾപൊട്ടലുകളും രക്ഷാപ്രവർത്തനത്തിന് തടസ്സം സൃഷ്ടിച്ചു.
കൂട്ടിക്കൽ പ്ലാപ്പള്ളി ടൗണിലെ ചായക്കടയും രണ്ടുവീടും ഉരുൾപൊട്ടലിൽഒലിച്ചുപോയി. പ്ലാപ്പള്ളിയിൽ കാണാതായവരിൽ ചിലരെ തിരിച്ചറിഞ്ഞിട്ടുണ്ട്. തൊട്ടിപ്പറമ്പിൽ മോഹനന്റെ ഭാര്യ സരസമ്മ, ആറ്റുചാലിൽ ജോമി ആന്റണിയുടെ ഭാര്യ സോണിയ, മുണ്ടശേരി വേണുവിന്റെ ഭാര്യ റോഷ്നിഎന്നിവരെയാണ് കാണാതായതായി സ്ഥിരീകരിച്ചത്.
കൊക്കയാറിൽ ഒട്ടലാങ്കൽ മാർട്ടിൻ, ഭാര്യ സിനി, മക്കളായ സ്നേഹ, സോന, സാന്ദ്ര തുടങ്ങിയവരെയാണ് കാണാതായതായി സ്ഥിരീകരിച്ചിട്ടുള്ളത്.
content highlights:about 25 people missing in landlside in idukki kokkayar and kottayam koottikkal
