കോട്ടയം: ട്രെയിനിലെ ശുചിമുറിയുടെ വാതിലെന്ന് കരുതി പുറത്തേക്കുള്ള വാതിൽ തുറന്ന പത്ത് വയസുകാരൻ ഓടുന്ന ട്രെയിനിൽ നിന്ന് വീണ് മരിച്ചു. മലപ്പുറം മമ്പാട് പുള്ളിപ്പാടം സിദ്ദിഖിൻ്റെ മകൻ മുഹമ്മദ് ഇഷനാണ് (10) മരിച്ചത്. കൊച്ചുവേളി – നിലമ്പൂർ റോഡ് രാജ്യറാണി ട്രെയിനിൽ നിന്നാണ് കുട്ടി വീണ് മരിച്ചത്.
തിങ്കളാഴ്ച രാത്രി 11.45ഓടെ കോട്ടയം മൂലേടം ഭാഗത്ത് വെച്ചായിരുന്നു അപകടമുണ്ടായത്. ഒരു വിവാഹത്തിൽ പങ്കെടുത്ത ശേഷം തിരുവനന്തപുരത്ത് നിന്നും കുടുംബം മടങ്ങുകയായിരുന്നു. രാത്രിയിൽ ശുചിമുറിയിൽ പോകാൻ എണീറ്റ ഇഷന് വാതിൽ മാറിപ്പോയതാകാം അപകടത്തിപ്പെടാൻ കാരണമായതെന്നാണ് കരുതുന്നത്.
കുട്ടി പുറത്തേക്ക് വീണതിന് പിന്നാലെ ചങ്ങല വലിച്ച് ട്രെയിൻ നിർത്തി കുട്ടിയെ കോട്ടയം ജനറൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. വീഴ്ചയുടെ ആഘാതത്തിൽ കുട്ടിക്ക് ഗുരുതരമായി പരിക്കേറ്റുവെന്നാണ് സൂചനകൾ. ശുചിമുറിയെന്ന് കരുതിയാകാം ഇഷൻ ട്രെയിനിൻ്റെ പുറത്തേക്കുള്ള വാതിൽ തുറന്നതെന്നാകാം എന്നാണ് ബന്ധുക്കൾ പറയുന്നത്. ട്രെയിൽ കോട്ടം റെയിൽവെ സ്റ്റേഷനിൽ കുറച്ച് നേരം നിർത്തിയിടുകയും ചെയ്തിരുന്നു. അപകടവുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല.
