പെരുമാതുറ സ്വദേശിയായ അരുൺ ജെറി എന്ന യുവാവിനെ കഴിഞ്ഞ ജൂൺ പതിനെട്ടിനാണ് കണിയാപുരം റെയിൽവെ സ്റ്റേഷന് സമീപം ട്രെയിൻ തട്ടി മരിച്ച നിലയിൽ കണ്ടെത്തിയത്. അന്ന് മംഗലപുരം എസ്ഐ ആയിരുന്ന ജ്യോതി സുധാകറിൻ്റെ നേതൃത്വത്തിലാണ് പോലീസ് ഇൻക്വസ്റ്റ് നടപടികൾ പൂർത്തിയാക്കിയത്. ഇതിനിടെ ജ്യോതി സുധാകർ ഫോൺ മോഷ്ടിച്ചെന്നാണ് നിഗമനം.
മരിച്ച യുവാവിൻ്റെ മൊബൈൽ ഫോൺ കണ്ടെത്താൻ കഴിയാതെ വന്നതോടെ ബന്ധുക്കൾ പോലീസിൽ പരാതി നൽകി. യുവാവിൻ്റെ മൊബൈൽ ഫോൺ കാണാനില്ലെന്നും മരണത്തിൽ ദുരൂഹതയുണ്ടെന്നും വ്യക്തമാക്കിയായിരുന്നു പരാതി. കേസെടുത്ത് അന്വേഷണം ആരംഭിച്ചതിനൊപ്പം സൈബർ സെൽ നടത്തിയ അന്വേഷണത്തിൽ കാണാതായ മൊബൈൽ ഫോൺ ഉപയോഗിക്കുന്നത് എസ്ഐ ആണെന്ന് കണ്ടെത്തി. ഇതിനിടെ ജ്യോതി സുധാകർ ചാത്തന്നൂരിലേക്ക് സ്ഥലംമാറി പോകുകയും ചെയ്തിരുന്നു.
മരിച്ച യുവാവിൻ്റെ മൊബൈൽ ഫോൺ മോഷ്ടിച്ച എസ്ഐ ഔദ്യോഗിക സിം കാർഡാണ് ഇതിൽ ഉപയോഗിച്ചതെന്നും അന്വേഷണത്തിൽ കണ്ടെത്തിയതോടെയാണ് സസ്പെൻഷൻ നടപടിയുണ്ടായത്. പിടിക്കപ്പെടുമെന്ന് വ്യക്തമായതോടെ ജ്യോതി സുധാകർ ഫോൺ മംഗലപുരം പോലീസ് സ്റ്റേഷനിൽ എത്തിച്ചിരുന്നതായും റിപ്പോർട്ടുകളുണ്ട്. ഇതിനിടെ പോലീസിനാകെ നാണക്കേട് ഉണ്ടാക്കുന്ന വിവരം മേലുദ്യോഗസ്ഥരിൽ എത്തിയതോടെ സസ്പെൻഷൻ ഉത്തരവ് പ്രകടിപ്പിക്കുകയായിരുന്നു. ട്രെയിൻ തട്ടി മരിച്ച അരുൺ ജെറിയുടെ മരണം ആത്‌മഹത്യയാണെന്നാണ് പോലീസിൻ്റെ വിലയിരുത്തൽ.
